Ani Okaiɔ?

Ani onyã Buu-Mɔɔ srɔtoi ni ba nyɛsɛɛ nɛɛ akanemɔ he? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni Kristofonyo ko baanyɛ afee kɛ enu he akɛ etɔ lɛ yɛ henumɔŋ kɛ mumɔŋ?

Ehe miihia ni wɔyɔse nɔ ni kɛ tɔlɛ lɛ ba lɛ. Kɛji akɛ wɔpɛi nibii ni wɔfɔɔ feemɔ kɛ nibii ni wɔyɔɔ lɛ amli, ni wɔjie jatsui ni he ehiaa lɛ wɔshwie lɛ, ebaaye ebua wɔ. Wɔbaanyɛ wɔkɛ otii ni anyɛɔ atsuɔ he nii amamɔ wɔhiɛ taakɛ wɔshihilɛi baaŋmɛ wɔ gbɛ. Wɔmumɔŋ hewalɛnamɔ he nii ni wɔɔtsu lɛ ji nɔ ko ni he hiaa waa, ni esa akɛ wɔkɛ sɔlemɔ ni wɔɔsɔle daa kɛ nii anɔjwɛŋmɔ hu afata.—8/15, baafa 23-26.

• Mɛni hewɔ Yehowa Odasefoi buɔ yibɔ ni ji 144,000 lɛ akɛ eji yibɔ diɛŋtsɛ lɛ?

Beni akɛ bɔfo Yohane wie mɛi 144,000 lɛ he yɛ ninaa mli agbe naa lɛ, ena “asafo babaoo ni mɔ ko mɔ ko nyɛŋ akane.” (Kpojiemɔ 7:4, 9, wɔma efã ko nɔ mi.) Kɛji akɛ yibɔ ni ji 144,000 lɛ ji mfonirifeemɔŋ nɔ lɛ, no lɛ srɔtofeemɔ ni yɔɔ kukuji enyɔ nɛɛ ateŋ lɛ shishinumɔ baalaaje. Yesu wie mɛi ni kɛ lɛ baaye nɔ lɛ ahe akɛ “asafoku bibioo.” (Luka 12:32, wɔma efã ko nɔ mi.)—9/1, baafa 30.

• Mɛni hewɔ Israelnyo baanyɛ ahɔ̃ɔ kooloo ni egbo ni afɔseko elá ashwieko shi lɛ eha maŋsɛɛ nyo lɛ?

Maŋsɛɛ nyo loo gbɔ ni yɔɔ maŋ lɛ mli ni tsakeko kɛbako Yudafoi ajamɔ mli lɛ bɛ Mla lɛ shishi. No hewɔ lɛ aŋmɛ Israelnyo gbɛ koni ekɛ kooloi ni tamɔ nɛkɛ ake loo ehɔ̃ɔ eha lɛ. (5 Mose 14:21) Shi mɔ ni etsake kɛba Yudafoi ajamɔ mli lɛ bajeɔ Mla lɛ shishi, ni enyɛŋ eye kooloo ni tamɔ nakai lá. (3 Mose 17:10)—9/15, baafa 26.

• Kɛ aawie bɔ ni adesai kaseɔ ŋaa gbɛ̀i ni anaa yɛ adebɔɔ mli lɛ he lɛ, te atsɔɔ tɛŋŋ, ni mɛni hewɔ enɛ baanyɛ akɔ Kristofoi ahe lɛ?

Kɛ aawie bɔ ni adesai kaseɔ ŋaa gbɛ̀i ni anaa yɛ adebɔɔ mli lɛ he lɛ, belɛ aatsɔɔ bɔ ni adesai kwɛɔ ŋaa gbɛ̀i ni anaa yɛ adebɔɔ mli lɛ nɔ amɛkɛfeɔ nii daa lɛ he. Ákɛ nɔkwɛmɔnɔ lɛ, nyɛmimɛi ni ale amɛ akɛ Wright lɛ fee kɔɔyɔŋ lɛlɛ beni amɛkase loofɔji wuji ni miifiliki lɛ ahe nii sɛɛ. No hewɔ lɛ, ŋaa gbɛ̀i ni anaa yɛ adebɔɔ mli ni adesai kaseɔ lɛ baanyɛ akanya Kristofonyo koni ekɛ anunyam aha Bɔlɔ lɛ.—10/1, baafa 9.

• Namɔ awie ehe yɛ 2 Korintobii 12:2-4 lɛ akɛ ashá lɛ kɛtee paradeiso mli lɛ?

Anaa nakai wiemɔ lɛ yɛ kukuji ni Paulo kɛfã ehe akɛ eji bɔfo lɛ sɛɛ nɔŋŋ. Akɛni Biblia lɛ ewieee he akɛ mɔ kroko ji mɔ ni ná niiashikpamɔ nɛɛ, ni Paulo ji mɔ ni gba wɔ he sane hewɔ lɛ, ekolɛ Paulo ji mɔ ni na ninaa nɛɛ.—10/15, baafa 8.

• Mɛni ji sui komɛi ni Yesu yɔɔ ni haa ebafeɔ mɔ ni sa akɛ esɔmɔɔ akɛ Hiɛnyiɛlɔ ni Nyɔŋmɔ ehala?

Yesu hiɛ emuuyeli mli kɛmɔ shi, ni ejie jeŋba kpakpa kɛ anɔkwayeli kpo. Ejɔɔ ehe nɔ kwraa eha Nyɔŋmɔ. Yesu susuɔ gbɔmɛi ahe waa diɛŋtsɛ ni esumɔɔ nitsumɔ.—11/1, baafa 6-7.

• Nɛgbɛ Daimonioi lɛ Baahi yɛ Afii Akpe Nɔyeli lɛ Mli?

Wɔbaanyɛ wɔmu sane naa yɛ gbɛ ni ja nɔ ákɛ akɛ amɛ kɛ Satan fɛɛ baawo bu kwɔŋkwɔŋ lɛ mli yɛ Kristo Afii Akpe Nɔyeli lɛ mli. (Kpojiemɔ 20:1-3) Mose Klɛŋklɛŋ Wolo lɛ 3:15 gba onufu lɛ yitso nɔ̃ ni abaatswa, ni nɔ ni fata he hu ji bu kwɔŋkwɔŋ lɛ mli ni akɛ lɛ baawo yɛ Afii Akpe Nɔyeli lɛ mli efɔ shi. Mɛi ni fata Satan seshi lɛ he ji bɔfoi fɔji loo daimonioi lɛ. Anɔkwale ni eji akɛ mumɔi fɔji lɛ ejie gbeyeishemɔ babaoo kpo yɛ bu kwɔŋkwɔŋ lɛ he lɛ tsɔɔ akɛ amɛle akɛ abaatsĩ amɛnaa awo jɛi wɔsɛɛ. (Luka 8:31)—11/15, baafa 30-31.

• Mɛni hewɔ esa akɛ mɔ akwɛ ehe nɔ jogbaŋŋ yɛ dãa ni wa ni anuɔ he kɛji akɛ ekwɛɔ ehe nɔ jogbaŋŋ koni ekanu bɔ ni baaha ana akɛ etɔ dãa po lɛ?

Mɛi komɛi yɛ ni kɛ́ amɛnu dãa babaoo po lɛ, dãatɔɔ he okadii fioo ko pɛ anyɛɔ anaa yɛ amɛhe. Shi kɛlɛ, fiofio lɛ, mɔ baaya nɔ etsɔ mɔ ni dãanumɔ eka ehe, ni ‘ebaatsɔ dãatɔlɔ.’ (Tito 2:3) Yesu bɔ kɔkɔ yɛ “fufeemɔ kɛ dãatɔɔ kɛ daaŋ-ŋmaa he haomɔi” ahe. (Luka 21:34, 35) Ehe ehiaaa ni daanumɔ aha mɔ atɔ dãa dani efee vii ni etsɔ anihaolɔ yɛ helooŋ kɛ mumɔŋ fɛɛ.—12/1, baafa 19-21.