Ŋaawoo Kpakpa ni Salomo Kɛha yɛ—Nɔ Ni Sa Akɛ Akane He

“WOJI babaoo feemɔ lɛ ebɛ naagbee, ni nikasemɔ tuutu lɛ ehaa etɔɔ heloo.” (Jajelɔ 12:12) Nilelɔ Maŋtsɛ Salomo ni hi shi yɛ Israel lɛ kɛ wiemɔi nɛɛ ni eŋmala aaafee afii 3,000 ni eho nɛ lɛ ejeee mɛi anijiaŋ wui ni amɛkakane nii. Shi moŋ, eewie bɔ ni ehe hiaa akɛ ahala nibii ni abaakane lɛ mli lɛ ahe. Kwɛ bɔ ni kaimɔ nɛɛ ji nɔ ni yɔɔ ebe naa ha, ejaakɛ afi fɛɛ afi lɛ ayaa nɔ afeɔ woji akpekpei toi akpei abɔ yɛ woji akalamɔ hei ni yɔɔ je lɛŋ lɛ amli!

Eka shi faŋŋ akɛ “woji babaoo” ni Salomo tsĩi tã lɛ ji woji ni etswaaa mɔ emaaa shi ni amɛwooo mɔ hewalɛ. No hewɔ lɛ, etsɔɔ mli akɛ yɛ nɔ najiaŋ ni nyɔmɔwoo kpakpa ni sɛɛ tsɛɔ aaajɛ amɛkasemɔ mli kɛba lɛ, ‘amɛhaa etɔɔ heloo’ lɛ moŋ.

Shi kɛlɛ, ani Salomo miikɛɛ akɛ woji ni kɛ gbɛtsɔɔmɔ kpakpa ní anyɛɔ akɛ he fɔɔ nɔ haa, ni he baanyɛ aba sɛɛnamɔ aha mɔ ní kaneɔ lɛ bɛ shihilɛ mli? Dabi, ejaakɛ eŋma hu akɛ: “Nilelɔi awiemɔi tamɔ tsina kpalamɔ akpɔlɔi, ni amɛtamɔ plɛkoobii ni akala, tookwɛlɔ kome bua enɛɛmɛi fɛɛ naa.” (Jajelɔ 12:11) Yɛ anɔkwale mli lɛ, wiemɔi ni aŋmala yɛ ni baanyɛ amɛkɛ hewalɛwoo ni tswaa mɔ emaa shi aha “tamɔ tsina kpalamɔ akpɔlɔi.” Amɛbaanyɛ amɛkanya mɔ yɛ gbɛ kpakpa nɔ. Kɛfata he lɛ, amɛbaanyɛ amɛwaje yiŋkpɛi ní amɛha mɔ afĩ shi shiŋŋ ‘tamɔ plɛkoobii ni akala.’

Nɛgbɛ wɔbaanyɛ wɔná nilee wiemɔi nɛɛ kɛjɛ? Salomo tsɔɔ akɛ amɛteŋ nɔ ni fe fɛɛ lɛ ji nɔ ni jɛ Tookwɛlɔ kome, ni ji Yehowa ŋɔɔ. (Lala 23:1) No hewɔ lɛ, Biblia ni jɛ Nyɔŋmɔ mumɔ mli lɛ ji wolo ni hi fe fɛɛ ni mɔ ko baanyɛ ehala ní ená nilee wiemɔi nɛɛ kɛjɛ mli. Wiemɔi ni jɛ mumɔ mli nɛɛ akanemɔ daa baanyɛ aye abua ni mɔ “aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17.