Ani Obaanyɛ Ofee Nɔ ni Okaneɔ lɛ He Mfoniri yɛ Ojwɛŋmɔŋ?

KƐ́ ONYƐ ofee nibii ahe mfoniri yɛ ojwɛŋmɔŋ lɛ, ebaaye ebua bo koni ole hei ni okaneɔ amɛhe saji lɛ. Ákɛ nɔkwɛmɔnɔ lɛ, susumɔ maŋsɛɛ sanekpakpa he gbɛ̀i ni bɔfo Paulo fã, ni yɔɔ Biblia mli wolo ni ji Bɔfoi lɛ Asaji lɛ mli lɛ he okwɛ. Eje eklɛŋklɛŋ maŋsɛɛ sanekpakpa shiɛmɔ he gbɛfaa lɛ shishi yɛ Antiokia, ni ji maŋ ni atsɛ́ Yesu kaselɔi lɛ klɛŋklɛŋ yɛ akɛ Kristofoi lɛ. Ejɛ jɛmɛ efã gbɛ kɛtee hei tamɔ Salami, Antiokia ni yɔɔ Pisidia, Ikoniom, Listra, kɛ Derbe. Ani obaanyɛ ofee hei ni maji nɛɛ yɔɔ lɛ he mfoniri yɛ ojwɛŋmɔŋ?

Ekolɛ ja ohiɛ shikpɔŋ he mfoniri. Akɛ shikpɔŋ he mfoniri ni tamɔ nɛkɛ ewo wolo hee bibioo ni hiɛ baafai 36, ni ji ‘Kwɛmɔ Shikpɔŋ Kpakpa Lɛ’ lɛ mli. Mɔ ko ni jɛ Montana, yɛ U.S.A ni kane wolo nɛɛ lɛ kɛ hiɛsɔɔ wie akɛ: “Mina hei ni Paulo fã gbɛ kɛtee lɛ, ni mibɔ mɔdɛŋ mifee gbɛ ni etsɔ nɔ kɛtee, kɛ nii ni ekɛ mra be mli Kristofoi krokomɛi lɛ tsu kɛshiɛ sanekpakpa lɛ he mfoniri yɛ mijwɛŋmɔŋ. Miida nyɛ shi yɛ shikpɔŋ he mfoniri wolo fɛfɛo nɛɛ hewɔ.”

Paulo gbɛfaa lɛ he shikpɔŋ he mfoniri lɛ ji shikpɔŋ he mfonirii babaoo ni yɔɔ wolo bibioo nɛɛ mli ni baaye abua mɛi ni kaneɔ Biblia lɛ ni amɛfee nɔ ni amɛkaneɔ lɛ he mfoniri yɛ amɛjwɛŋmɔŋ lɛ ateŋ ekome kɛkɛ. Obaanyɛ obi ni aha bo wolo bibioo ni ji ‘Kwɛmɔ Shikpɔŋ Kpakpa Lɛ’ eko kɛtsɔ nii ni oooŋmala owo gbɛ ni yɔɔ enɛ shishi lɛ mli, ni okɛmaje kɛtsɔ adrɛs ni atsɔɔ yɛ biɛ loo adrɛs srɔtoi ni yɔɔ baafa 2 lɛ ateŋ nɔ ni sa lɛ nɔ.

□ Nyɛmajea mi wolo bibioo ni ji ‘Kwɛmɔ Shikpɔŋ Kpakpa Lɛ’ eko, ní ekɛmajemɔ he sɔ̃ ko kãaa minɔ. Tsɔɔmɔ wiemɔ mli ni obaasumɔ yɛ.

□ Nyɛfainɛ nyɛbasaraa mi kɛha shia Biblia mli nikasemɔ ni aheee nɔ ko.

[He ni Mfoniri ni yɔɔ baafa 32 lɛ Jɛ]

Pictorial Archive (Near Eastern History) Est.