“Eji Nifeemɔ ni Fe Fɛɛ ni Obaanyɛ Okɛ Ohe Awo Mli”

ALEXIS ji gbɛkɛ nuu fioo ko ni eye afii enumɔ ni yɔɔ Morelia, yɛ Mexico ni fɔlɔi kaseɔ Biblia lɛ ni amɛyaa Yehowa Odasefoi akpeei. Beni efata eweku lɛ he kɛtee kpokpaa nɔ kpee ko lɛ, ena ni aafee shiɛmɔ yɛ shia kɛ shia he nɔkwɛmɔnɔ. Ekwɛ etsɛ hiɛ ni ekɛ henumɔ bi lɛ akɛ, “Ataa, Ataa, mɛni hewɔ oyaaa shiɛmɔ lɛ?” Etsɛ ha hetoo akɛ, “Miikase nii lolo bɔni afee ni manyɛ mafee nakai.” Alexis kɛ miishɛɛ here nɔ akɛ, “Ataa, eji nifeemɔ ni fe fɛɛ ni obaanyɛ okɛ ohe awo mli.”

Nɛkɛ gbekɛ fioo nɛɛ na bɔ ni ehe hiaa akɛ efee enii ni ekɛ Yehowa he nilee ni ená lɛ akpãa gbee. Akɛni ekɛ enyɛkwɛ̃ bii ni darako lɛ ateŋ mɛi komɛi yɔɔ shia kome mli hewɔ lɛ, klɛŋklɛŋ lɛ esɔle eha Yehowa ni yɛ no sɛɛ lɛ egba amɛ nibii ni efɔlɔi ye kɛbua lɛ ni ekase yɛ wolo ni ji Mi-Wolo ni Gbaa Biblia Mli Saji lɛ mli lɛ. Eyɛ mli akɛ Alexis leko nikanemɔ moŋ, shi ele saji ni yɔɔ wolo lɛ mli lɛ jogbaŋŋ yɛ mfonirii ni yɔɔ mli ni tsɔɔ saji lɛ anaa lɛ hewɔ. Ewie po akɛ eesumɔ koni eyasara mɛi yɛ amɛshiai amli koni ekɛ amɛ agba nɔ ni ekaseɔ yɛ Nyɔŋmɔ yiŋtoi ahe lɛ he sane.

Yɛ anɔkwale mli lɛ, gbekɛbii kɛ onukpai fɛɛ baanyɛ aha amɛshihilɛ kɛ nɔ ni Yehowa, ni ji “Mɔ krɔŋkrɔŋ” lɛ kpaa gbɛ yɛ amɛdɛŋ lɛ akpãa gbee koni no aha amɛná hegbɛ ni fe fɛɛ ni amɛkɛye ehe odase yɛ jeŋmaji lɛ ateŋ. (Yesaia 43:3; Mateo 21:16) Ŋwanejee ko bɛ he akɛ no ji nifeemɔi ni fe fɛɛ ni mɔ baanyɛ ekɛ ehe awo mli lɛ ateŋ ekome.