Bii Atsɔsemɔ He Kaa Yɛ Ŋmɛnɛŋmɛnɛ Beaŋ

NIYELIHE nɔtsɛ ko miito nibii ahe gbɛjianɔ gbi ko gbɛkɛ beni jenamɔ yi ewa koni ekpa ni eya shia. Kɛkɛ ni yei enyɔ komɛi kɛ gbekɛ fioo ko bote niyelihe lɛ akɛ amɛbaahe nii. Akɛni etɔ niyelihe nɔtsɛ lɛ hewɔ lɛ, eka ni kulɛ eha amɛle akɛ ekpa, shi ekpɛ eyiŋ akɛ ebaahɔ̃ɔ niyenii ni amɛbaahe lɛ eha amɛ. Yɛ be mli ni yei enyɔ nɛɛ yeɔ nii kɛ sanegbaa lɛ, belɛ gbekɛ fioo lɛ miikumɔ akpãanɔɔ kɛmiishwie niyelihe lɛ ni eenaanaa nɔ. Yɛ nɔ najiaŋ ni gbekɛ lɛ nyɛ aaatsĩ ebi lɛ naa lɛ, ebɔi ŋmɔlɔ. Beni amɛgbe amɛniyeli lɛ naa ni amɛshi amɛtee sɛɛ lɛ, ehe bahia ni nɛkɛ niyelihe nɔtsɛ ni etɔ lɛ nɛɛ asaa jɛmɛ.

Taakɛ ekolɛ ole lɛ, nɛkɛ nifeemɔ ni tee nɔ diɛŋtsɛ yɛ shihilɛ mli nɛɛ maa nɔ mi akɛ nibii eyaaa nɔ jogbaŋŋ kɛhaaa wekui pii yɛ bii atsɔsemɔ mli. Yiŋtoi pii ahewɔ ebaa lɛ nakai. Fɔlɔi komɛi ŋmɛɔ amɛbii lɛ agbɛ ni amɛfeɔ nɔ ni amɛsumɔɔ, kɛ susumɔ akɛ esa akɛ atsɔse gbekɛbii lɛ yɛ shihilɛ ni ŋmɛɔ nɔ fɛɛ nɔ feemɔ gbɛ mli. Aloo akɛni fɔlɔi lɛ bɛ deka kwraa yɛ shihilɛ mli hewɔ lɛ, ekolɛ amɛnaŋ be amɛha amɛbii lɛ ni amɛkɛ tsɔsemɔ ni he hiaa amɛ lɛ aha amɛ. Fɔlɔi komɛi nuɔ he akɛ amɛbii lɛ askulyaa ji nɔ ni he hiaa fe fɛɛ, no hewɔ lɛ, amɛhaa amɛbii lɛ heyeli ni husu bɛ he shii abɔ ni gbekɛbii lɛ bɔɔ mɔdɛŋ jogbaŋŋ yɛ skul kaai amli ni amɛnáa hegbɛ akɛ amɛyatsa amɛnikasemɔ nɔ yɛ nikasemɔhe wulu ko ni ehe gbɛi waa lɛ mli lɛ.

Kɛlɛ, mɛi komɛi kɛɔ akɛ ehe miihia ni fɔlɔi kɛ maŋbii fɛɛ ajaje amɛsusumɔi. Amɛkɛɔ akɛ gbekɛbii kɛ amɛhe miiwo awuiyeli nifeemɔi srɔtoi fɛɛ amli, ni awuiyeli ni yaa nɔ yɛ skul lɛ miiwo wu be fɛɛ be. Enɛ hewɔ lɛ, nɔtsamɔ skul nɔkwɛlɔ ko ni yɔɔ Seoul, yɛ Republic of Korea lɛ ma nɔ mi akɛ, esa akɛ tsɔsemɔ ni akɛaaha gbekɛbii koni eha amɛsui aya hiɛ lɛ afee hiamɔ nii. Ekɛɛ akɛ: “Esa akɛ sui kpakpai ni aaaha amɛná lɛ aba klɛŋklɛŋ dani nilee ni amɛaaná lɛ anyiɛ sɛɛ.”

Fɔlɔi pii ni sumɔɔ akɛ amɛbii aya skul wuji bɔni afee ni amɛye omanye yɛ shihilɛ mli lɛ booo kɔkɔbɔɔ toi. Kɛ oji fɔlɔ lɛ, mɛɛ gbɔmɔ nɛkɛ osumɔɔ ni obi lɛ atsɔ? Ani oosumɔ akɛ eda ni ebatsɔ onukpa ko ni yɔɔ jeŋba kpakpa ni tsuɔ esɔ̃i ahe nii? Ani oosumɔ ni ebatsɔ mɔ ko ni susuɔ mɛi krokomɛi ahe, ni nyɛɔ etsakeɔ ehe ewoɔ shihilɛ fɛɛ shihilɛ mli, ni kɛ jwɛŋmɔ kpakpa susuɔ nii ahe? Kɛ nakai ni lɛ, ofainɛ, susumɔ sane ni nyiɛ sɛɛ nɛɛ he.