Sane ko ni Yɔɔ Miishɛɛ ni Aŋma

KƐJƐ afi 1928 kɛyashi afi 1956 lɛ, shikpɔji ahe nibii ashikpálɔ Richard E. Byrd fã gbɛ shii enumɔ kɛtee Antarctic shikpɔji lɛ anɔ kɛha nibii ashikpamɔ. Kɛtsɔ eshihilɛ kɛ woji ni eŋmalaa nibii ewoɔ mli lɛ nɔ lɛ, lɛ kɛ mɛi ni fata ehe kɛkpáa nibii ashi lɛ nyɛ amɛna he ni kɔɔyɔɔ lɛ tswaa kɛyaa, ni amɛfee shikpɔŋ he mfonirii, ni amɛnine shɛ saji saŋŋ ni kɔɔ Antarctic shikpɔŋ wulu lɛ he lɛ nɔ.

Byrd gbɛfaa lɛ tsɔɔ bɔ ni ehe hiaa ni aná wolo ni aŋmalaa nibii ni yaa nɔ lɛ he saji awoɔ mli gbi fɛɛ gbi. Aŋmalaa nibii ni yaa nɔ yɛ lɛlɛ gbɛfaa mli loo kɔɔyɔŋ lɛlɛ gbɛfaa mli lɛ he saji ni yɔɔ fitsofitso awoɔ gbɛfaa he wolo mli. Abaanyɛ akɛ nɛkɛ sane nɛɛ atsu nii yɛ sɛɛ mli ni akɛkwɛ nibii ni tee nɔ lɛ mli loo akɛpɛi sane ni he baanyɛ aba sɛɛnamɔ yɛ wɔsɛɛ gbɛfaai amli lɛ mli akwɛ.

Ŋmalɛi lɛ kɛ amaniɛbɔɔ ni yɔɔ miishɛɛ ni kɔɔ Nu Afua ni ba yɛ Noa gbii lɛ amli lɛ he lɛ haa. Nakai jeŋ muu fɛɛ Nu Afua lɛ ye fe afi. Beni Noa, eŋa, amɛbihii etɛ lɛ kɛ amɛŋamɛi lɛ sáa amɛhe kɛha Nu Afua ni baa lɛ, amɛye afii 50 loo 60 kɛkpɛ adeka—lɛlɛ agbo ko ni dalɛ aaashɛ mitai 40,000 koji ejwɛ. Mɛɛ yiŋtoo he nii ebaatsu? Koni ébaa adesai kɛ kooloi komɛi ayi yɛ Nu Afua lɛ mli.—1 Mose 7:1-3.

Biblia mli wolo ni ji Mose Klɛŋklɛŋ Wolo lɛ yɛ nɔ ni abaanyɛ atsɛ lɛ akɛ sane ni Noa ŋma efɔ̃ shi ni gbaa wɔ nibii kɛjɛ Nu Afua lɛ shishijee mli aahu kɛbashi be mli ni lɛ kɛ eweku lɛ je kpo kɛjɛ adeka lɛ mli lɛ. Ani nɔ ko yɛ mli ni kɔɔ wɔhe ŋmɛnɛ?