“Nilelɔi Etɛ Lɛ”—Namɛi Ni?

Bei pii lɛ, Yesu fɔmɔ he mfonirii lɛ tsɔɔ hii etɛ ni wo atadei kakadaji kɛ amɛfukpɔŋɔi ni amɛbashɛ kooloi atsũ ko he, he ni abifao Yesu kã yɛ kooloi aniyeniianɔ mli lɛ. Afɔɔ saralɔi ni ewula amɛhe fe nine nɛɛ atsɛmɔ akɛ nilelɔi etɛ lɛ. Mɛni Biblia lɛ kɛɔ yɛ amɛhe?

Taakɛ Biblia lɛ tsɔɔ lɛ, nɛkɛ hii ni afɔɔ amɛ tsɛmɔ akɛ nilelɔi lɛ “jɛ boka,” ni jɛmɛ amɛnu Yesu fɔmɔ lɛ he yɛ. (Mateo 2:1, 2, 9) Ekolɛ eŋɔ nɛkɛ hii nɛɛ be babaoo koni amɛkɛfa gbɛ kɛya Yudea. Yɛ naagbee kwraa beni amɛyana Yesu lɛ, no mli lɛ ejeee abifao ni afɔ lɛ eŋmɔŋ dɔŋŋ ni kã he eyɛ kooloi atsũ mli lolo. Yɛ no najiaŋ lɛ, hii lɛ yana Maria kɛ “abifao lɛ” yɛ shia ko mli.—Mateo 2:11.

Biblia lɛ tsɛɔ hii nɛɛ akɛ magi (nilelɔi) loo “ŋulamiiaŋkwɛlɔi,” ni etsɔɔɔ amɛyibɔ. The Oxford Companion to the Bible lɛ tsɔɔ mli akɛ: “Anaa tsakpaa ni kã ashwãifeemɔ kɛ ŋulamiiaŋkwɛmɔ teŋ lɛ kɛtsɔ miishɛɛ ni saralɔi lɛ jie lɛ kpo yɛ ŋulami ni nyiɛ amɛhiɛ kɛtee Betlehem lɛ nɔ.” Biblia lɛ buɔ ashwãifeemɔi srɔtoi fɛɛ kɛ Babilonbii anifeemɔ ni ji mɔdɛŋ ni abɔɔ ni nine ashɛ adafitswaa nɔ kɛtsɔ ŋulamii anɔ lɛ fɔ yɛ gbɛ ni yɔɔ faŋŋ nɔ.—5 Mose 18:10-12; Yesaia 47:13.

Nɔ̃ kpakpa ko kwraa eyajɛɛɛ adafitswaa ni nɛkɛ hii nɛɛ anine shɛ nɔ lɛ mli kɛbaaa. Enɛ tée Maŋtsɛ Herode yiwalɔ lɛ awuŋayeli mlifu shi. Nɔ ni jɛ enɛ mli ba ji foi ní Yosef, Maria, kɛ Yesu jo kɛtee Mizraim, kɛ gbekɛbii hii fɛɛ ni yɔɔ Betlehem ni eye “afii enyɔ kɛ mɛi ni yeko nakai” lɛ ni agbe amɛ. Herode etsɔ hiɛ etao mli fitsofitso ni ená ele be mli ni afɔ Yesu kɛtsɔ nɔ ni ená ele kɛjɛ ŋulamiiaŋkwɛlɔi lɛ adɛŋ lɛ nɔ. (Mateo 2:16) Yɛ naagbai fɛɛ ni jɛ amɛsaramɔ lɛ mli ba lɛ hewɔ lɛ, nilee yɛ mli akɛ aaamu sane naa akɛ, ŋulami ni amɛna lɛ kɛ adafitswaa ni kɔɔ “Yudafoi amaŋtsɛ ni afɔ lɛ” lɛ he lɛ jɛ Nyɔŋmɔ henyɛlɔ, Satan Abonsam, mɔ ni taoɔ akɛ egbe Yesu lɛ ŋɔɔ.—Mateo 2:1, 2.