Mɔdɛŋbɔi ni Woɔ Jeŋba He Tɛi Kpakpai Amli Hewalɛ

Yɛ afi 2001 naagbee gbɛ lɛ, mɛi ni bo Radio Mozambique maŋ adafitswaa lɛ toi lɛ nu nɛkɛ adafitswaa nɛɛ:

“Maŋ hiɛnyiɛlɔ lɛ yasara Yehowa Odasefoi anitsumɔhe nine ni yɔɔ Maputo lɛ. Ewo nɛkɛ jamɔ kuu nɛɛ hewalɛ koni amɛha mɔdɛŋ ni amɛbɔɔ koni amɛwo jeŋba he tɛi kpakpai amli hewalɛ yɛ wekui amli kɛ wolokasemɔ kɛha mɛi ni edara lɛ kɛtsɔ amɛ nikanemɔ kɛ niŋmaa gbɛjianɔtoi lɛ anɔ lɛ mli awa. Aaafee mɛi 10,000 ená gbɛjianɔtoi nɛɛ ahe sɛɛ momo. Taakɛ Maŋ Hiɛnyiɛlɔ Chissano tsɔɔ lɛ, esa akɛ ajieɔ gbɛjianɔtoi ni tamɔ enɛɛmɛi ayi, akɛni amɛhe yɛ sɛɛnamɔ waa kɛha maŋbii lɛ yɛ tsabaa ni ataoɔ aná kɛha wolokasemɔ he naagbai ni maŋ nɛɛ kɛkpeɔ lolo lɛ hewɔ.”

Adafitswaa lɛ tsa nɔ kɛ wiemɔi fioo ko ni jɛ hiɛnyiɛlɔ lɛ wiemɔ ni amɔmɔ awo kpãa nɔ lɛ mli, akɛ: “Eji nɔ ni woɔ wɔ hewalɛ akɛ wɔɔna akɛ mɛi babaoo yɛ nikanemɔ kɛ niŋmaa he miishɛɛ. Etsɔɔ wɔ akɛ mɛi foji lɛ baaye abua wɔ koni wɔha nikanemɔ kɛ niŋmaa aya hiɛ. No hewɔ lɛ, masumɔ ni mawo Yehowa Odasefoi lɛ hewalɛ koni amɛha amɛ nikanemɔ kɛ niŋmaa gbɛjianɔtoi lɛ amli awa, yɛ wiemɔ fɛɛ wiemɔ mli. Nɔ ni he hiaa diɛŋtsɛ ji akɛ ni mɛi ale nikanemɔ kɛ niŋmaa, ni akɛ, mɛi baanyɛ amɛkɛ amɛhe ashara yɛ gbɛ ni waaa nɔ, ni yɛ wɔsɛɛ be mli lɛ amɛná gbɛfaŋnɔ babaoo yɛ wolokasemɔ mli.”

Yehowa Odasefoi ni yɔɔ Mozambique lɛ feɔ nikanemɔ kɛ niŋmaa skul yɛ hei 850 yɛ maŋ lɛ mli fɛɛ bɔni afee ni mɛi anyɛ akane Nyɔŋmɔ Wiemɔ lɛ amɛha amɛ diɛŋtsɛ amɛhe. Kɛfata he lɛ, amɛfeɔ shia Biblia mli nikasemɔi aaafee 50,000 yaka daa otsi. Enɛɛmɛi fɛɛ ji jeŋ fɛɛ Biblia tsɔsemɔ he gbɛjianɔtoo ni amrɔ nɛɛ eyashɛ shikpɔji 235 nɔ lɛ fã. (Mateo 24:14) Bo hu obaanyɛ oná nɛkɛ gbɛjianɔtoo nɛɛ he sɛɛ. Ofainɛ, okɛ Yehowa Odasefoi ni yɔɔ okutso lɛ mli lɛ agba sane.