“Ani Nyɛle Nɔ Hewɔ ni Mikɛ Nyɛ Shika lɛ Baa Abaha Nyɛ Lɛ?”

NANA, ni ji fɔlɔ kome mɔ ni hiɛ bihii etɛ ni yɔɔ Kaspi yɛ Republic of Georgia lɛ shwie eyiŋ akɛ: ‘Oo, shika he hiaa mi nɛkɛ!’ Leebi ko lɛ, eshwelɛ akɛ eeená eko lɛ ba mli. Ena lari 300 yɛ polisifoi anitsumɔhe ko masɛi. Mɔ ko mɔ ko bɛ jɛmɛ. Eji shika ko ni fa waa diɛŋtsɛ. Yɛ anɔkwale mli lɛ, yɛ afii enumɔ ni lari batsɔ maŋ lɛŋ shika ni ayeɔ nɛɛ lɛ, Nana enako lari 100 wolo shika lɛ eko dã. Maŋ lɛŋ jarayelɔi nyɛŋ aná nakai shika falɛ yɛ afii babaoo ni amɛkɛaatsu nii lɛ sɛɛ.

Nana shwie eyiŋ akɛ: ‘Mɛni shika nɛɛ he hiaa mi kɛyafee kɛji akɛ hemɔkɛyeli, Nyɔŋmɔ gbeyeishemɔ, kɛ mumɔŋ shidaamɔ ni miyɔɔ lɛ baaŋmɛɛ mi?’ Etɛo nɛkɛ Kristofoi asui nɛɛ yɛ be mli ni ekɛ shitee-kɛ-woo ni naa wa kɛ yii po kpe lɛ mli, ni edamɔ naa yɛ ehemɔkɛyeli lɛ hewɔ.

Beni Nana yaa polisifoi anitsumɔhe lɛ, ena polisifoi enumɔ ni kɛ hehiamɔ miitao nɔ ko. Eyɔse akɛ shika lɛ amɛtaoɔ lɛ, no hewɔ lɛ, etsi ebɛŋkɛ amɛ ni ekɛɛ: “Ani nyɛ nɔ ko elaaje?”

Amɛha hetoo akɛ: “Shika.”

“Enyiɛ?”

“Lari 300!”

Nana kɛɛ akɛ: “Mina nyɛ shika lɛ.” Kɛkɛ ni ebi akɛ: “Ani nyɛle nɔ hewɔ ni mikɛ nyɛ shika lɛ baa abaha nyɛ lɛ?” Amɛleee nɔ hewɔ.

Etsa nɔ akɛ: “Ejaakɛ Yehowa Odasefoi lɛ ateŋ mɔ kome ji mi. Eji mijeee amɛteŋ mɔ ko kulɛ, mikɛ nyɛ shika lɛ ebahaŋ nyɛ.”

Polisifonyo onukpa ni laaje shika lɛ ha Nana lari 20, ni ekɛtsɔɔ ehiɛsɔɔ yɛ enɔkwayeli su lɛ hewɔ.

Sane lɛ gbɛ eshwã oyayaayai yɛ Kaspi kpokpaa lɛ nɔ fɛɛ. Enɔ jetsɛremɔ lɛ, awula ko ni saa polisifoi anitsumɔhe lɛ kɛɛ Nana akɛ: “Be fɛɛ be lɛ [Polisifonyo onukpa lɛ] kɛ nyɛwoji lɛ eko toɔ ɔfis ni etsuɔ nii yɛ lɛ. Agbɛnɛ, ekolɛ ebaabu nyɛwoji lɛ waa diɛŋtsɛ.” Polisifonyo ko po kɛɛ akɛ: “Eji gbɔmɛi fɛɛ ji Yehowa Odasefoi kulɛ, namɔ baaye awui?”