Nɔ ni Wɔkaseɔ yɛ Tɛŋ He

“BƆ NI ehe yɔɔ ha lɛ yɛ fɛo ni esoro efɛo lɛ kwraa.” Nakai ji bɔ ni Biblia ensaiklopedia ko tsɔɔ bɔ ni amitsrɔbi tso yɔɔ ha. Yɛ Biblia beaŋ kɛ ŋmɛnɛŋmɛnɛ lɛ, amitsrɔbi tsei haa Mizraim Nilo Jɔɔ lɛ mli feɔ fɛo, ni amɛhaa anáa hɔɔŋ ni haa mɔ tsui nyɔɔ emli yɛ Negev Shia-ŋa lɛ mli hei ni tsei kwɛ̃ɔ yɛ lɛ.

Taakɛ tɛŋ henɔi srɔtoi babaoo ji lɛ, amitsrɔbi tso lɛ kɛɔ tɔrɔmɔɔ diɛŋtsɛ. Ekomɛi akɛlɛmɔ shɛɔ mitai 30 ni amɛyaa nɔ amɛwoɔ yibii afii 150. Hɛɛ, amitsrɔbi tso lɛ feɔ hiŋmɛi lɛ fɛo jogbaŋŋ ni ewoɔ yibii waa diɛŋtsɛ. Daa afi lɛ, ewoɔ amitsrɔbii kushai babaoo. Kusha kome pɛ kɛkɛ baanyɛ awo nɔ ni fa fe amitsrɔbii 1,000. Wolo ko ŋma yɛ amitsrɔbii ahe akɛ: “Eji nɔ ko ni wa waa akɛ mɛi ni . . . amitsrɔbi aduawa gbiŋ pɛ amɛyeɔ ni amɛnáa kɛjɛɔ nakai amitsrɔbii gbiji ni akɛ nɔ ko ekadi he lɛ ahe yɛ hei ni akɛtsɔɔ mɛi yɛ lɛ aaanyɛ asusu bɔ ni eŋɔɔmɔ yɔɔ ha lɛ he kɛ́ ebalɛ akɛ atse lɛ ehee ni abaaye amrɔ nɔŋŋ.”

Esa jogbaŋŋ moŋ akɛ Biblia lɛ kɛ adesai komɛi toɔ tɛŋi ahe. Bɔni afee ni mɔ ko asa Nyɔŋmɔ hiɛ lɛ, esa akɛ mɔ lɛ afee mɔ ni ejeŋba he tse ni esa akɛ eya nɔ etsu nitsumɔi kpakpai tamɔ tɛŋ ni woɔ yibii babaoo. (Mateo 7:17-20) Yɛ enɛ hewɔ lɛ, akɛ tɛŋi ni akpɛ́ yɛ nibii ahe lɛ tsuɔ nii ákɛ wulamɔ nii yɛ Salomo sɔlemɔtsu lɛ mli kɛ Ezekiel ninaa sɔlemɔtsu lɛ hu mli. (1 Maŋtsɛmɛi 6:29, 32, 35; Ezekiel 40:14-16, 20, 22) No hewɔ lɛ, bɔni afee ni mɔ ko jamɔ asa Nyɔŋmɔ hiɛ lɛ, esa akɛ mɔ lɛ aná sui kpakpai tamɔ amitsrɔbi tso lɛ nɔ̃ lɛ. Nyɔŋmɔ Wiemɔ lɛ tsɔɔ mli akɛ: “Jalɔ lɛ aaafrɔke tamɔ tɛŋ.”—Lala 92:13.