Sanebimɔi ni Jɛ Kanelɔi Adɛŋ

Kolosebii 1:16 lɛ kɛɔ yɛ Nyɔŋmɔ Bi lɛ he akɛ “nii lɛ fɛɛ lɛ, enɔ atsɔ abɔ, ni lɛ nɔŋŋ abɔ aha.” Mɛɛ shishinumɔ naa abɔ nii fɛɛ “aha” Yesu ni ji Nyɔŋmɔ Bi lɛ yɛ?

Yehowa kɛ e-Bi koome lɛ tsu nii ákɛ nitsulɔ ŋaalɔ yɛ nibii krokomɛi abɔɔ mli, ni ji akɛ, nibii fɛɛ ja Yesu diɛŋtsɛ pɛ. (Abɛi 8:27-30; Yohane 1:3) Eja gbɛ jogbaŋŋ akɛ, Bi lɛ náa miishɛɛ kɛjɛɔ nitsumɔi nɛɛ amli, ni yɛ shishinumɔ nɛɛ naa lɛ abɔ “aha” lɛ.

Wɔle akɛ adesai ni ji fɔlɔi lɛ kpaa gbɛ ni bei pii lɛ, amɛnáa miishɛɛ waa kɛjɛɔ—bihii kɛ biyei ni amɛfɔ lɛ adɛŋ. No hewɔ lɛ, Biblia mli abɛ lɛ wieɔ yɛ ‘bi ko ni etsɛ náa ehe tsui’ lɛ he. (Abɛi 3:12; 29:17) Nakai nɔŋŋ hu Yehowa Nyɔŋmɔ ná miishɛɛ kɛjɛ Israel beni ewebii lɛ ye anɔkwa lɛ. (Lala 44:4; 119:108; 147:11) Enáa miishɛɛ hu kɛjɛɔ anɔkwa ni ekrɔŋkrɔŋbii lɛ yeɔ kɛbashi wɔbe nɛɛ mli lɛ.—Abɛi 12:22; Hebribii 10:38.

No hewɔ lɛ, eji nɔ ni ja akɛ Nyɔŋmɔ baaha ehefatalɔ nitsulɔ, ni ji Yesu aná miishɛɛ kɛjɛ nibii ni enyɛ etsu lɛ amli. Yɛ anɔkwale mli lɛ, Abɛi 8:31 lɛ kɛɛ akɛ Bi lɛ ‘shwɛɔ yɛ eshikpɔŋ lɛ nɔ, ni enáa gbɔmɛi abii ahe miishɛɛ.’ Shishinumɔ nɛɛ naa Kolosebii 1:16 kɛɛ yɛ akɛ: “Nii lɛ fɛɛ lɛ, enɔ atsɔ abɔ, ni lɛ nɔŋŋ abɔ aha” lɛ. (Wɔma efã ko nɔ mi.)