Be ko lɛ Wɔji Klãji—Amrɔ Nɛɛ Wɔji Tooi!

Beni mi kɛ Sakina ji gbekɛbii yei lɛ, no mli lɛ akutsoŋbii ji wɔ. Sakina da ni eyɛ hewalɛ, yɛ be mli ni mi lɛ midaaa. Bei pii lɛ wɔbéɔ, shi gbi ko lɛ wɔbé kɛ hiɛdɔɔ diɛŋtsɛ. Kɛjɛ nakai gbi lɛ nɔ kɛyaa lɛ, wɔkɛ wɔhe ewieee dɔŋŋ lɛ wɔŋaaa wɔhe dɔŋŋ. Naagbee mli lɛ, wɔ fɛɛ wɔfa ni wɔleee he ni mɔ kroko lɛ yɔɔ.

Yɛ afi 1994 mli lɛ, Yehowa Odasefoi kɛ mi bɔi Biblia lɛ kasemɔ, ni fiofio lɛ misu tsake. Afii ejwɛ sɛɛ beni miyaa wɔ gbi kome kpee krɛdɛɛ yɛ Bujumbura, Burundi lɛ, minaa kpɛ mihe waa beni mikɛ Sakina kpe lɛ. Miná miishɛɛ akɛ eba jɛmɛ, shi wɔŋaaa wɔhe ekpakpa ko. Nakai gbi lɛ mli lɛ, minaa kpɛ mihe beni mina lɛ yɛ mɛi ni abaabaptisi amɛ lɛ ateŋ lɛ! Lɛ hu etsake kwraa. Ejeee mɔ ni sumɔɔ béi ni mikɛ lɛ fɔɔ béi lɛ dɔŋŋ. Kwɛ bɔ ni eyɔɔ naakpɛɛ akɛ mana akɛ eeye ehenɔjɔɔmɔ kɛha Nyɔŋmɔ lɛ he odase yɛ faŋŋ mli kɛtsɔ ehe ni ekɛhaa kɛha nu mli baptisimɔ lɛ nɔ!

Beni eje nu lɛ mli lɛ, mikɛ oyaiyeli yafua lɛ ni miwo etoiŋ akɛ: “Ani okaiɔ bɔ ni wɔbéɔ lɛ?” Ekɛɛ akɛ: “Hɛɛ mikaiɔ, shi eji blema sane. Amrɔ nɛɛ, gbɔmɔ hee ji mi.”

Wɔ fɛɛ wɔná miishɛɛ akɛ wɔna Biblia mli anɔkwale ní fee wɔ ekome ni etsake wɔsu ni tamɔ klãŋ nɔ̃ lɛ kɛtee too su nɔ ni yɔɔ Tookwɛlɔ Kpeteŋkpele, Yehowa Nyɔŋmɔ mli lɛ mli. Eji anɔkwale akɛ, Biblia mli anɔkwale lɛ tsakeɔ mɔ shihilɛ.