“Ani Nyɔŋmɔ Buɔ Gbɔmɛi Fɔ ní Ashã Amɛ yɛ Hɛl La Mli Lɛɛlɛŋ?”

“Ani nyɛmiikase Nyɔŋmɔ jamɔ he nii yɛ skul?”

Sanebimɔ nɛɛ ha Joel kɛ Carl naa kpɛ amɛhe. Oblahii enyɔ—ni kɛ amɛhe eha ni miisɔmɔ yɛ Yehowa Odasefoi anitsumɔhe yitso ni yɔɔ Brooklyn, New York lɛ—miikwɛ woji lɛ amli yɛ woji ahɔɔmɔhe ko ni bɛŋkɛ jɛmɛ lɛ mli. Beni Joel kwɛɔ Biblia concordance srɔtoi lɛ amli lɛ, Carl bɔ lɛ sane ko ni ekɛ mɔ ko gba yɛ shiɛmɔ nitsumɔ lɛ mli lɛ. Beni nuu ko ni damɔ amɛmasɛi lɛ nu sanegbaa nɛɛ fã ko lɛ, etsirɛ lɛ ni etsi ebɛŋkɛ amɛ.

Shi kɛlɛ, nuu lɛ miisusu nibii babaoo he fe kɛji oblahii enyɔ lɛ miikase Nyɔŋmɔ jamɔ he nii yɛ skul kɛkɛ. Etsɔɔ mli akɛ: “Yudanyo ji mi, ni minanemɛi Kristofoi lɛ ekomɛi ekɛɛ mi akɛ abaashã mi yɛ hɛl la mli ejaakɛ Yudafoi lɛ kpoo Yesu. Enɛ miigba minaa waa. Toigbalamɔ ni tamɔ nɛkɛ ní jɛ Nyɔŋmɔ ni yɔɔ suɔmɔ lɛ ŋɔɔ lɛ tamɔ nɔ ni ejaaa. Ani Nyɔŋmɔ buɔ gbɔmɛi fɔ ní ashã amɛ yɛ hɛl la mli lɛɛlɛŋ?”

Joel kɛ Carl kɛɛ nuu anɔkwafo nɛɛ akɛ amɛji mɛi ni kɛ hiɛdɔɔ kaseɔ Biblia lɛ. Amɛtsɔɔ lɛ kɛjɛ Ŋmalɛi lɛ amli akɛ gbohii lɛ leee nɔ ko nɔ ko, ni amɛwɔ kɛkɛ yɛ gbele mli ni amɛmiimɛ gbohiiashitee. No hewɔ lɛ, amɛnuuu piŋmɔ loo hɛl la amanehulu ko he. (Lala 146:3, 4; Jajelɔ 9:5, 10; Daniel 12:13; Yohane 11:11-14, 23-26) Beni amɛkɛ minitii 45 egba sane sɛɛ lɛ, nuu lɛ kɛ e-adrɛs ha Joel kɛ Carl ni ebi ni amɛha enine ashɛ saji babaoo ni kɔɔ sane lɛ he lɛ nɔ.

Kɛ́ hɛl ji piŋmɔ he ko ni la tsoɔ yɛ lɛ, kulɛ ani mɔ ko baabi ni eya jɛmɛ? Kɛlɛ, beni blematsɛ Hiob taoɔ ni ejo emanehulu lɛ naa foi lɛ, ebi akɛ: “Namɔ baaha mi enɛ, akɛ ooobu mihe yɛ hɛl, ni oŋɔ mi otee kɛyashi beyinɔ ni omlifu lɛ aaaho?” (Hiob 14:13, Douay Version) Eka shi faŋŋ akɛ, Hiob heee eyeee akɛ hɛl ji piŋmɔ he ko. Shi moŋ, eyatao abobaahe yɛ jɛmɛ. Gbele ji shihilɛ mli ni abɛ, ni Biblia hɛl lɛ ji adesai akwamaŋ gbonyobu.

Kɛ́ obaasumɔ ni ole saji babaoo lolo yɛ nɔ ni baa wɔ nɔ kɛji wɔgboi kɛ hiɛnɔkamɔ ni yɔɔ yɛ no sɛɛ lɛ, no lɛ wɔkɛ miishɛɛ miifɔ̃ bo nine koni ohere tsɛmɔ ni nyiɛ sɛɛ nɛɛ nɔ.