“Nɔ ko ni Esa akɛ Ekɛ Miishɛɛ Abaha Mɔ Fɛɛ Mɔ”

GBƆMƐI aaashɛ 10,500 yɔɔ Tuvalu, ni ji maŋ fɛfɛo ko ni ŋshɔkpɔi nɛɛhu ni yɔɔ Pasifik Wuoyigbɛ lɛ feɔ maŋ lɛ mli. Ni kɛlɛ, akɛni Yehowa Odasefoi ni yɔɔ jɛmɛ lɛ le akɛ Nyɔŋmɔ “sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli” hewɔ lɛ, amɛsumɔɔ ni amɛná Biblia kasemɔ woji yɛ amɛ diɛŋtsɛ amɛmaŋ wiemɔ mli. (1 Timoteo 2:4) Akɛni amɛbɛ wiemɔi komekomei ashishitsɔɔmɔ wolo yɛ amɛwiemɔ lɛ mli hewɔ lɛ, enɛ bafee sane ni wa. Yɛ afi 1979 lɛ, Yehowa Odasefonyo maŋsɛɛ sanekpakpa shiɛlɔ ko ni miisɔmɔ yɛ Tuvalu lɛ ŋɔ nakai nitsumɔ lɛ efɔ̃ enɔ. Lɛ kɛ eŋa kɛ weku ko ni yɔɔ jɛmɛ lɛ yahi shi, amɛkase wiemɔ lɛ, ni amɛbua Tuvalu wiemɔi komekomei anaa fiofio. Beni shɛɔ afi 1984 lɛ, no mli lɛ afee Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ ní Watchtower Bible and Tract Society of New York, Inc. fee lɛ yɛ Tuvalu wiemɔ mli.

Dr. T. Puapua, ni ji tsutsu Tuvalu maŋsɔɔlɔ nukpa lɛ ŋma wolo ni ekɛtsɔɔ bɔ ni ehiɛ esɔ Hii Shi Daa wolo lɛ. Eŋma akɛ: “Nɛkɛ wolo nɛɛ ebafata Tuvalu ‘gboshinii’ ni he hiaa lɛ ahe. Eka shi faŋŋ akɛ nyɛmii eshɛ nyɛhe waa yɛ gbɛfaŋnɔ ni nyɛná lɛ hewɔ—gbɛfaŋnɔ titri ni nyɛná yɛ maŋ nɛɛ mli bii lɛ amumɔŋ hilɛ-kɛhamɔ lɛ mli. Miheɔ miyeɔ akɛ abaaŋma wolo nɛɛ he sane afata Tuvalu yinɔsane ni kɔɔ nikasemɔ woji akalamɔ he lɛ he. . . . Esa akɛ [nii ni nyɛtsu] nɛɛ kɛ miishɛɛ abaha mɔ fɛɛ mɔ.”

Wiemɔi ní shishitsɔɔlɔi lɛ bua naa lɛ ha afee Tuvalu-Ŋleshi wiemɔi komekomei ashishitsɔɔmɔ wolo yɛ afi 1993 mli. No ji klɛŋklɛŋ wiemɔi komekomei ashishitsɔɔmɔ wolo ni maŋbii lɛ baanyɛ amɛkɛtsu nii yɛ nakai wiemɔ lɛ mli. Nyɛsɛɛ nɛɛ, National Language Board of Tuvalu (Tuvalu Maŋ Wiemɔ Ajinafoi Akuu) lɛ bi ni aha amɛ hegbɛ ní amɛkwɛ nɔ, ni amɛkɛfee klɛŋklɛŋ wiemɔi komekomei ashishitsɔɔmɔ wolo yɛ amɛmaŋ wiemɔ lɛ mli.

Kɛjɛ January 1, 1989 lɛ kɛbaa nɛɛ, akalaa Buu-Mɔɔ wolo tɛtrɛɛ lɛ yɛ Tuvalu wiemɔ mli daa nyɔŋ nɔ. Kɛji ookane wolo tɛtrɛɛ nɛɛ yɛ wiemɔ ni ji enyɔ ni owieɔ lɛ mli lɛ, no lɛ mɛni hewɔ okwɛɛɛ baafa 2 lɛ mli ni okwɛ kɛji obaana akɛ wiemɔ ni owieɔ klɛŋklɛŋ lɛ fata wiemɔi ni akala Buu-Mɔɔ lɛ yɛ mli lɛ he lo? Ŋwanejee ko bɛ he akɛ bo diɛŋtsɛ omaŋ wiemɔ mli ní oookane yɛ lɛ baaha oná miishɛɛ waa.