Ani Jamɔ Mli Ekomefeemɔ Ebɛŋkɛ? — Buu-Mɔɔ INTANƐT NƆ WOJIATOOHE

Ani Jamɔ Mli Ekomefeemɔ Ebɛŋkɛ?

Christian Krause, ni ji Lutheran World Federation lɛ nɔkwɛlɔ lɛ kɛɛ akɛ: “Wɔmiina gbi ni sa kadimɔ waa yɛ wɔsɔlemɔi lɛ ayinɔsane mli.” Nakai nɔŋŋ Pope John Paul II wie “nifeemɔ be ko ni sa kadimɔ ni yɔɔ gbɛ ni nɔ nyiɛmɔ wa ni atsɔɔ nɔ akɛtswaa Kristofoi ateŋ ekomefeemɔ ni naa wa waa amaa shi ekoŋŋ lɛ” he.

Waonaa gbɛi ni akɛwo Official Common Statement ko shishi yɛ October 31, 1999 yɛ Augsburg, Germany ni maa Joint Declaration (Sane ni Afee Ekome Kɛjaje) ni afee yɛ Doctrine of Justification lɛ hewɔ lɛ nɔ mi ji nɔ ni ha akɛ ekãa jaje saji nɛɛ atsɔɔ. Atsɔɔ be kɛ he ni abaafee nii lɛ yɛ lɛ ojogbaŋŋ. Nɔ ni akɛɛ ji akɛ, yɛ October 31, 1517 lɛ, Martin Luther kɛ esaji 95 lɛ kpɛtɛ mɔɔ lɛ sɔlemɔtsu ni yɔɔ Wittenberg lɛ shinaa lɛ shi, ni ekɛ nakai feemɔ je Protestant Reformation lɛ shishi. Shi kɛlɛ, Augsburg ji he ni Lutherbii ni yɔɔ yɛ afi 1530 lɛ kɛ amɛhemɔkɛyeli lɛ mli saji bibii ni ji Augsburg Confession lɛ ha yɛ, ní Catholic Church lɛ kpoo, ní enɛ ha gbɛ ni anyɛɛɛ ajaje bakã Protestant jamɔ kɛ Catholic jamɔ lɛ teŋ lɛ.

Ani Joint Declaration lɛ baafee nifeemɔ gbɛ diɛŋtsɛ ni akɛaaye mligbalamɔ ni eba sɔlemɔ lɛ mli lɛ nɔ, taakɛ ajaje atsɔɔ lɛ? Jeee fãi srɔtoi lɛ fɛɛ kpa nɔ kpakpa gbɛ. Protestant jamɔ he nilelɔi ni fa fe 250 kɛ amɛ waonaa gbɛi wo nibimɔ ni teɔ shi woɔ nii lɛ shishi, ní bɔɔ kɔkɔ eshiɔ Catholic Church lɛ ni baaye enɔ lɛ. Protestantbii lɛ amli fũ hu beni Catholic Church lɛ jaje nɔ ko krɛdɛɛ ko ni ekɛ ehe wo mli kɛha afi 2000 lɛ ni ji nifeemɔ koome too lɛ nɔŋŋ ni ha gbɛ bakã amɛteŋ aaafee afii 500 ni eho nɛ lɛ. Ni akɛni akɛ Augsburg Confession kɛ Katolik shitee-kɛ-woo nifeemɔ ni Council of Trent lɛ kɛba lɛ miitsu nii lolo hewɔ lɛ, ebaawa waa akɛ aaaná ekomefeemɔ.

Mligbalamɔ kɛ béi ni yaa nɔ yɛ Kristendom lɛ naa wa kwraa fe nɔ ni sane ni afee ekome kɛjaje atsɔɔ lɛ baanyɛ ajaje. Kɛfata he lɛ, ekomefeemɔ damɔ hemɔkɛyelii ni damɔ Nyɔŋmɔ Wiemɔ ni ji Biblia lɛ nɔ lɛ nɔ. (Efesobii 4:3-6) Yɛ nɔ najiaŋ ni ekomefeemɔ ni mli wa aaaba kɛtsɔ sane he ni aŋmɛɛɔ akɛsaa lɛ nɔ lɛ, ebaa kɛtsɔɔ nɔ ni Nyɔŋmɔ biɔ kɛjɛɔ wɔdɛŋ lɛ ni wɔɔkase ni wɔfee lɛ nɔ. Gbalɔ anɔkwafo Mika jaje akɛ: “Majimaji lɛ fɛɛ ateŋ mɔ fɛɛ mɔ nyiɛɔ yɛ enyɔŋmɔ gbɛi amli; shi wɔ lɛ wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ!”—Mika 4:5.

[He ni Mfoniri ni yɔɔ baafa 32 lɛ Jɛ]