Jeŋ Toiŋjɔlɛ—Yɛ Mɛɛ Gbɛ Nɔ?

ANI etsɛŋ ni abaaná jeŋ toiŋjɔlɛ? Kulɛ nakai ji bɔ ni mɛi babaoo susu be ko, shi amrɔ nɛɛ, amɛyiŋ feɔ amɛ kɔshikɔshi. Taakɛ amaniɛbɔɔ ni gbaa naagbai ni baaba wɔ wɔsɛɛ be mli lɛ ahe saji ni akala yɛ South Africa Daily Mail & Guardian lɛ mli lɛ tsɔɔ lɛ, “majimaji ateŋ maŋkwramɔŋ gbɛjianɔtoo hee he saji ni agba kɛtsɔ hiɛ afii 10 pɛ ni eho nɛ lɛ, efee tamɔ hiɛnɔkamɔ kpakpa ni baŋ mli agbɛnɛ.”

Mɛi ni ŋma lɛ tsɔɔ hiɛnɔkamɔ he nifeemɔ ni tee nɔ afii nyɔŋma kɛkɛ ni eho lɛ. No mli lɛ, Béi lɛ ba naagbee etsɛko, ni jeŋ nɔyelii ni he wa lɛ ateŋ béi lɛ sɛɛ efo. Yɛ nɔ ni tamɔ yinɔ hee shishijee lɛ, mɛi babaoo kpa gbɛ akɛ adesai baaje shishi aya hiɛ waa diɛŋtsɛ yɛ ohia, hela kɛ shihilɛhei amli naagbai ahe nitsumɔ mli. Amaniɛbɔɔ lɛ kɛɛ akɛ: “Amrɔ nɛɛ, nakai saji ni agba kɛtsɔ hiɛ lɛ efee tamɔ susumɔ kpakpa ko kɛkɛ ni baŋ mli. Béi komɛi eje shishi kpaako yɛ hei ni kulɛ wɔsusuko akɛ eeeba yɛ jɛmɛ lɛ; ohia ni ayeɔ yɛ jeŋ fɛɛ lɛ miiya hiɛ lolo. Aná maji enyɔ afata he ni hiɛ nuklea tawuu nibii. Bulɛ ni ayɔɔ kɛha UN lɛ efite kwraa akɛni enyɛɛɛ etsu adesai anaagbai ni yaa nɔ be fɛɛ be lɛ he nii tsɔ̃ lɛ hewɔ. Shihilɛ lɛ ejɛ yiŋsusumɔ kɛkɛ ni ayɔɔ lɛ mli kɛmiibote shihilɛ ni efite kwraa mli.”

Biblia he nikaselɔi eyɔse akɛ, mɔdɛŋ ni adesai bɔɔ lɛ nyɛŋ aba mli jogbaŋŋ kɔkɔɔkɔ yɛ jwɛŋmɔ kpakpa ni ahiɛ yɛ he lɛ fɛɛ sɛɛ. Mɛni hewɔ ni eji nakai? Ejaakɛ taakɛ Biblia lɛ kɛɔ lɛ, “jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Akɛni je lɛ yɛ Satan kudɔmɔ shishi hewɔ lɛ, anyɛŋ aha je lɛ atsɔ Paradeiso taakɛ Nyɔŋmɔ bɔ lɛ akɛ eji lɛ.

Yɛ nakai beaŋ nɔŋŋ lɛ, ayɛ nɔ ni abaadamɔ nɔ aná hiɛnɔkamɔ. Yehowa Nyɔŋmɔ wo shi akɛ ekɛ jeŋ toiŋjɔlɛ baaba, jeee ni eeesaa nibii agbɛjianɔtoo lɛ, shi ni ekɛ “shikpɔŋ hee ni jalɛ hiɔ mli” lɛ baaba. (2 Petro 3:13) Hɛɛ, abaatsɔ Nyɔŋmɔ Maŋtsɛyeli lɛ nɔ atsake wɔ shikpɔŋ muu lɛ fɛɛ afee lɛ shia ni toiŋjɔlɛ kɛ miishɛɛ yɔɔ mli, he ni wala kɛ nitsumɔ baafee nɔ ni haa adesai ni feɔ toiboo náa miishɛɛ daa. Kɛfata he lɛ, Nyɔŋmɔ wo shi akɛ “[ebaatsumɔ] amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” Nɛkɛ shiwoi nɛɛ damɔɔɔ adesai agbalɛi ni anyɛŋ akɛ he afɔ̃ nɔ lɛ nɔ. Shi moŋ, amɛdamɔ Bɔlɔ ni nyɛŋ amale lɛ Wiemɔ ni ma shi shiŋŋ lɛ nɔ.—Kpojiemɔ 21:4; Tito 1:2.