Ani Obaanyɛ Otsi Obɛŋkɛ Nyɔŋmɔ ko Ni Onaaa Lɛ?

Ekolɛ obaabi akɛ: ‘Te mafee tɛŋŋ maná mikɛ mɔ ko ni minaaa lɛ lɛ teŋ wekukpaa lɛ?’ Ebaafee tamɔ nɔ ni eji sanebimɔ ni ja. Shi susumɔ enɛ he okwɛ:

TE NINAMƆ he hiaa ha tɛŋŋ yɛ suɔmɔ kɛ wekukpai ni hiɔ shi daa ní aaaná lɛ mli? Ani nibii ni anaaa lɛ ahe ehiaaa nakai nɔŋŋ, kɛ́ jeee nɔ ni fe nakai po? Nakai ni! Enɛ hewɔ lɛ, mɛi komɛi ená amɛkɛ mɛi krokomɛi ateŋ wekukpaa ní mli wa kɛtsɔ woji aŋmalamɔ nɔ—amɛwoji lɛ wieɔ nɔ ni amɛsumɔɔ, kɛ nɔ ni amɛsumɔɔɔ, otii ni mamɔ amɛhiɛ, shishitoo mlai, nɔ ni woɔ amɛnaa ŋmɔlɔ, kɛ sui loo nibii krokomɛi ni amɛnáa he miishɛɛ lɛ ahe.

Shwilafoi hu etsɔɔ akɛ ninamɔ he ehiaaa tsɔ koni akɛná mɔ kɛ mɔ kroko teŋ wekukpaa. Susumɔ Edward kɛ Gwen, ni ji gbalashihilɛ mli hefatalɔi ní amɛshwila lɛ nɔkwɛmɔnɔ lɛ he okwɛ.a Edward kɛ Gwen kpe yɛ shwilafoi a-skul, he ni Gwen ji naanyo skulnyo lɛ. Ená Gwen sui ahe miishɛɛ, titri lɛ, anɔkwa ni eyeɔ yɛ wiemɔ kɛ nifeemɔ mli, kɛ su fɛfɛo ni eyɔɔ kɛha nitsumɔ lɛ. Gwen hu ná Edward he miishɛɛ ejaakɛ yɛ Gwen wiemɔi amli lɛ, “ejie sui fɛɛ ni atsɔse mi ni mibahe miye akɛ amɛhe hiaa lɛ kpo.” Amɛje nyiɛmɔ ni tsɔɔ gbalashihilɛ hiɛ shishi, ni yɛ afii etɛ sɛɛ lɛ, amɛbote gbalashihilɛ mli.

Edward kɛɛ akɛ: “Kɛji nyɛ yɛ ekome lɛ, shwilamɔ haaa srɔtofeemɔ ko aba okɛ mɔ ko teŋ wekukpaa ni oooná lɛ mli. Ekolɛ, nyɛnyɛŋ nyɛna nyɛhe, shi henumɔi jeee nɔ ni wa akɛ aaayɔse.” Amrɔ nɛɛ, yɛ afii 57 sɛɛ lɛ, amɛkã he amɛsumɔɔ amɛhe waa lolo. Amɛtsɔɔ mli akɛ, kɛ hoo lɛ, nɔ ni kɛ amɛwekukpaa ni yɔɔ naakpɛɛ nɛɛ ba amɛteŋ lɛ kɔɔ nibii ejwɛ he: (1) mɔ kroko lɛ sui ní oooyɔse, (2) nakai sui lɛ ahe susumɔ kɛ nakai sui lɛ ni ooonya he, (3) sanegbaa kpakpa mli ni ooohiɛ, kɛ (4) ekome ni nyɛaafee kɛfee nii.

Otii ejwɛ nɛɛ ahe miihia waa kɛha wekukpaa kpakpa, kɛji yɛ nanemɛi ateŋ jio, gbalashihilɛ mli hefatalɔi ateŋ jio, loo nɔ ni he hiaa fe fɛɛ lɛ, yɛ adesai kɛ Nyɔŋmɔ teŋ jio. Yɛ sane ni nyiɛ sɛɛ lɛ mli lɛ, wɔbaakwɛ bɔ ni otii nɛɛ kɛ nitsumɔ baanyɛ aye abua wɔ ní wɔná wɔkɛ Nyɔŋmɔ teŋ wekukpaa, eyɛ mli akɛ wɔnyɛɛɛ wɔna lɛ.b

[Shishigbɛ niŋmai]