Ní Wɔɔhi Shi akɛ Anɔkwafoi Kɛha Yehowa

ANƆKWAYELI, eyɛ mli akɛ eji su ko ni efɔɔɔ kaa ŋmɛnɛ moŋ, shi eji su ko ni akɛyɔseɔ Yehowa, ni ji anɔkwa Nyɔŋmɔ lɛ tsuji ŋmɛnɛ. Mɔ ni yeɔ anɔkwa lɛ fiɔ shi yɛ kaai amli ni enijiaŋ ejeee wui, ekɔɔɔ he eko bei abɔ ni ebaaye. Susumɔ Maŋtsɛ kpakpa Hezekia he okwɛ. Biblia lɛ kɛɔ akɛ: “Mɛi ni nyiɛ esɛɛ kɛ mɛi ni nyiɛ ehiɛ lɛ ateŋ mɔ ko mɔ ko tamɔɔɔ lɛ.” Mɛni ha esoro Hezekia kwraa nakai lɛ? Eyɛ mli akɛ Molek, ni ji apasa nyɔŋmɔ lɛ jálɔi ebɔle lɛ kɛkpe moŋ, shi “Eŋɔ ehe ekpɛtɛ Yehowa he.” Hɛɛ, Hezekia ‘kpaleee kɛjɛɛɛ Yehowa sɛɛ, shi etee nɔ eye ekitai anɔ.’—2 Maŋtsɛmɛi 18:1-6.

Bɔfo Paulo hu ji mɔ kroko ní hi shi akɛ anɔkwafo kɛha Yehowa. Esɔɔmɔ nitsumɔ lɛ he sane ní áŋma áfɔ̃ shi taakɛ ejeɔ kpo yɛ Kristofoi a-Hela Ŋmalɛi lɛ amli lɛ yeɔ bɔ ni Paulo tee nɔ ejɛ esusuma muu fɛɛ mli esɔmɔ Nyɔŋmɔ lɛ he odase faŋŋ. Paulo baanyɛ akɛɛ yɛ lɛ diɛŋtsɛ ehe beni ewala heɔ aba naagbee yɛ shikpɔŋ nɔ lɛ, akɛ: “Ta kpakpa lɛ, miwuu; foidamɔ lɛ, midá migbe naa; hemɔkɛyeli lɛ, mihiɛ mli tswɛ.”—2 Timoteo 4:7.

Mɛɛ anɔkwayeli he nɔkwɛmɔnii kpakpai ni tamɔ nɛkɛ Hezekia kɛ Paulo fee po nɛ! Eba akɛ wɔbaakase amɛhemɔkɛyeli lɛ kɛtsɔ shi ni wɔɔhi akɛ anɔkwafoi kɛha Yehowa, ni ji wɔ Jeŋ Muu Fɛɛ Nyɔŋmɔ lɛ nɔ.—Hebribii 13:7.