Nihamɔ ni Jara Wa yɛ Yehowa Hiɛ

Yehowa odasefoi anitsumɔhe nine ni yɔɔ mozambique lɛ nine shɛ wolo ni nyiɛ sɛɛ nɛɛ nɔ:

“Miji gbekɛ nuu ni eye afii kpawo. Mikã he miiya shishijee skul lolo. Mikɛ nɛkɛ shika nɛɛ ni miná kɛjɛ wuɔbi ko ni milɛ lɛ mli lɛ miimaje. Mihɔ̀ɔ lɛ Meticais 12,000 [U.S, dɔla 1.00]. Miida Yehowa shi akɛ eha miklɛŋklɛŋ wuɔbi ni milɛ lɛ eda ni etsɔ wuɔ nuu. Masumɔ ni akɛ mi nikeenii lɛ atsu Yehowa Maŋtsɛyeli nitsumɔ lɛ he nii.

“Nyɛfainɛ: Mitsɛ ye bua mi kɛŋma wolo nɛɛ.”

Mɛi komɛi susuɔ akɛ mɛi ni yɔɔ heloonaa nii ni fa kɛteke nɔ ji mɛi ni baanyɛ ake nii. Shi kɛlɛ, kɛji wɔkane Biblia lɛ amaniɛbɔɔ ni kɔɔ okulafo lɛ ni kɛ “leptoi enyɔ (tsaakpoo) bawo” onia adeka lɛ mli lɛ he lɛ, wɔhiɛ baanyɛ asɔ akɛ jeee nii ni akɛhaa lɛ falɛ akwɛɔ, shi moŋ tsui kpakpa lɛ akwɛɔ.—Luka 21:1-4.

Yehowa hiɛ sɔɔ nikeenii fɛɛ, ekɔɔɔ he eko bɔ ni eji bibioo ha, no ji nɔ ni jɛ tsui ni suɔmɔ tsirɛ lɛ lɛ mli. Ejɔɔ mɛi ni kaseɔ emlihilɛ nifeemɔ lɛ kɛtsɔ amɛbe, hewalɛ, loo heloonaa nibii ni amɛkɛhaa yɛ Maŋtsɛyeli lɛ hewɔ lɛ babaoo.—Mateo 6:33; Hebribii 6:10.