Afi ni Sa Kadimɔ ni Akɛja Biblia Lɛ

GBƆMƐI pii yɛ Biblia lɛ eko fe bei fɛɛ ní eho. Nakai ji bɔ ni amaniɛbɔɔ ni jɛ United Bible Societies dɛŋ lɛ kɛɛ, ejaakɛ Biblia lɛ jaa tee hiɛ yɛ afi 1998 mli kɛ nɔ ni fe akpei ohai enumɔ fe nyɛsɛɛ afi lɛ nɔ̃ lɛ. Yɛ fɛɛ mli lɛ, aja Biblia—muu lɛ fɛɛ loo efãi komɛi—ní fa fe 585,000,000 yɛ je lɛŋ fɛɛ. Amaniɛbɔɔ lɛ tsɔɔ akɛ: “Enɛ kɛ hewalɛwoo haa. Akɛ Nyɔŋmɔ Wiemɔ lɛ eshɛ mɛi babaoo ŋɔɔ ŋmɛnɛ.”

Shi kɛlɛ, srɔtofeemɔ yɛ Biblia lɛ ni mɔ ko yɔɔ kɛ kanemɔ ni mɔ lɛ aaakane lɛ teŋ. Ákɛ nɔkwɛmɔnɔ lɛ, niiamlipɛimɔ ko ni afee lɛ jie lɛ kpo akɛ, kɛ hooo lɛ, Amerikabii oha mlijaa 90 yɛ Biblia lɛ eko, ni mɛi ayibɔ ni tamɔ nakai nɔŋŋ heɔ eyeɔ akɛ jeŋba kpakpa tsɔɔmɔ jɛɛhe ji Biblia lɛ. Shi kɛlɛ, oha mlijaa 59 pɛ kɛɛ akɛ amɛtaoɔ ŋaawoo kɛjɛɔ Biblia lɛ mli. Ni oha mlijaa 29 kpɛlɛ nɔ akɛ ‘amɛleee nɔ ni yɔɔ Biblia lɛ mli tsɔ’ loo “amɛleee kwraa.”

Jeee Biblia kalamɔ kɛ ejaa pɛ Yehowa Odasefoi tsuɔ he nii, shi moŋ, amɛfeɔ shia Biblia mli nikasemɔi ni aheee nɔ ko hu yɛ shikpɔji ni fa fe 230 nɔ. Gbɔmɛi akpekpei abɔ ni yɔɔ jeŋ fɛɛ lɛ miiná Biblia tsɔsemɔ gbɛjianɔtoo nɛɛ he sɛɛ bianɛ. Ayeɔ abua amɛ koni amɛkpee naagbai ni amɛkɛkpeɔ bianɛ lɛ naa, ni amɛkaseɔ nɔ ni Biblia lɛ kɛɔ yɛ wɔsɛɛ be kpakpa ni baahi Nyɔŋmɔ Maŋtsɛyeli lɛ shishi lɛ he nii.—Yesaia 48:17, 18; Mateo 6:9, 10.

[Mfonirii ni yɔɔ baafa 32]

Shia Biblia mli nikasemɔi ni aafee yɛ (kɛjɛ abɛku ŋwɛigbɛ kɛmiiya ninejurɔ) Bolivia, Ghana, Sri Lanka, kɛ England