Ani Biblia lɛ Baanyɛ Aye Abua Wɔ Ŋmɛnɛ?
“KƐ WƆƆŊƆ Biblia muu lɛ fɛɛ lɛ, aaafee emli oha mlijaa 1 pɛ sa kanemɔ, nɔ ni eshwɛ lɛ he ehiaaa ni ebe eho hu.” Nakai ji bɔ ni oblanyo ko kɛɛ. Mɛi babaoo kɛ lɛ baakpã gbee. Eyɛ mli akɛ Biblia lɛ kã he eji wolo ni ahɔɔ fe fɛɛ yɛ je lɛŋ moŋ, shi toiboo fioo pɛ mɛi akpekpei abɔ feɔ amɛhaa Biblia lɛ ni amɛleee emli tsɔɔmɔi lɛ.
Germany adafitswaa wolo ko ni ji Süddeutsche Zeitung lɛ wie yɛ afi 1996 Blonya nɔ lɛ mli akɛ, Biblia lɛ “hiɛ kanelɔi ayifalɛ ni baa shi be fɛɛ be. Yɛ be mli ni nilee ni ayɔɔ yɛ adebɔɔ he nilee lɛ kɛ je lɛŋ nifeemɔi ahe lɛ faa kɛyaa hiɛ lɛ, kɛha mɛi babaoo lɛ, Biblia lɛ mli saji bafeɔ nɔ ni yɔɔ naakpɛɛ kɛ nɔ ni ewa akɛ aaanu shishi.” Niiamlipɛimɔi akɔntaabui maa adafitswaa nɛɛ nɔ mi. Niiamlipɛimɔi komɛi ejie lɛ kpo hu akɛ gbekɛbii babaoo leee mɔ diɛŋtsɛ po ni Yesu ji. Yɛ niiamlipɛimɔ akɔntaabuu ko mli lɛ, mɛi ni abibii amɛ saji lɛ ateŋ mɛi ni shɛɛɛ fã baanyɛ agba Biblia mli saji ni kɔɔ bi nyenyeŋtswi lɛ kɛ naanyo Samarianyo lɛ he sane.
Swiss Evangelical Church lɛ wolo ni ji Reformiertes Forum lɛ wie akɛ yɛ Switzerland lɛ, hiamɔ kɛha Biblia lɛ tamɔɔɔ bɔ ni eji tsutsu lɛ. Yɛ mɛi ni yɔɔ Biblia lɛ eko po ateŋ lɛ, bei babaoo lɛ mulu yiɔ lɛ yɛ wojiatoohe lɛ. Shihilɛ lɛ jeee nɔ ni yɔɔ srɔto yɛ Britania. Taakɛ niiamlipɛimɔ akɔntaabuu kome ko tsɔɔ lɛ, eyɛ mli akɛ mɛi babaoo yɛ Biblia lɛ eko moŋ, shi amɛteŋ mɛi ni fa efɔɔɔ kanemɔ.
Yɛ gbɛ kroko nɔ lɛ, mɛi akpekpei abɔ yɛ je lɛŋ fɛɛ ni susuɔ Biblia lɛ he yɛ gbɛ kroko nɔ. Amɛbuɔ lɛ akɛ eji Nyɔŋmɔ Wiemɔ, ni amɛkpɛlɛɔ nɔ akɛ ejara wa ni ehe yɛ sɛɛnamɔ. No hewɔ lɛ, amɛkaneɔ be fɛɛ be. Oblayoo ko ŋma akɛ: “Mibɔɔ mɔdɛŋ akɛ makane Biblia lɛ yitso kome loo enyɔ daa gbi. Mináa he miishɛɛ waa diɛŋtsɛ.” Nɛkɛ aŋkroaŋkroi nɛɛ kadiɔ nɔ ni Biblia lɛ tsɔɔ lɛ jogbaŋŋ, ni amɛbɔɔ mɔdɛŋ koni amɛkɛ emli ŋaawoo lɛ atsu nii yɛ amɛshihilɛ mli. Amɛheɔ amɛyeɔ akɛ Biblia lɛ baanyɛ aye abua amɛ yɛ ŋmɛnɛŋmɛnɛ jeŋ ni haomɔ yɔɔ mli nɛɛ mli.
Te osusuɔ he tɛŋŋ? Ani Biblia lɛ he ehiaaa yɛ ŋmɛnɛŋmɛnɛ beaŋ? Aloo ani eji nɔ ni jara wa ni ehe yɛ sɛɛnamɔ? Ani Biblia lɛ baanyɛ aye abua wɔ ŋmɛnɛ?