Nitsumɔ kɛ Hejɔɔmɔ ní Aaaha Eŋmɛ Pɛpɛɛpɛ

“HEJƆƆMƆ ji atade fɛfɛo ni awoɔ, shi ejeee nɔ ko ni abaanyɛ awo daa.” Niŋmalɔ ko ni atsɔɔɔ egbɛi lɛ kɛ nɛkɛ wiemɔi nɛɛ tsɔɔ sɛɛnamɔ ni yɔɔ hejɔɔmɔ he lɛ yɛ gbɛ ni ja nɔ. Shi kɛlɛ, etsɔɔ akɛ, esa akɛ aha ekɛ nitsumɔ ni woɔ yibii aŋmɛ pɛpɛɛpɛ.

Biblia ŋmalɔ Salomo ni mumɔ kanya lɛ lɛ hu wie sane nɛɛ he. Nɛkɛ maŋtsɛ ni le nii nɛɛ tsɔɔ nibii enyɔ ni afeɔ kɛtekeɔ nɔ ni esa akɛ akwa. Klɛŋklɛŋ lɛ, ekɛɛ akɛ: “Kwashia kotaa eniji, ni eyeɔ lɛ diɛŋtsɛ eheloo.” (Jajelɔ 4:⁠5) Hɛɛ, anihaofeemɔ baanyɛ eha mɔ aye ohia. Nɔ ni jɛɔ mli baa ji, ebaanyɛ ekɛ oshara aba anihaolɔ lɛ hewalɛnamɔ nɔ, ewala tete po. Yɛ gbɛ kroko nɔ lɛ, mɛi komɛi yɛ ni kɛ nɔ fɛɛ nɔ shãa afɔle yɛ nitsumɔ ni wa hewɔ. Salomo wie amɛdeŋmegbomɔ ni baaa naagbee lɛ he akɛ “yakayaka nɔ ko kɛ kɔɔyɔɔ hakumɔ.”​—⁠Jajelɔ 4:⁠4.

Salomo kɛ yiŋtoo kpakpa jie pɛpɛɛpɛ ŋmɛɛ yi eha akɛ: “Dɛkɔkɔ obɔ̃ ni hejɔlɛ yɔɔ mli hĩ fe dɛkɔkɔi enyɔ obɔ̃bɔ̃ ni deŋmegbomɔ kɛ kɔɔyɔɔ hakumɔ yɔɔ mli.” (Jajelɔ 4:⁠6) Esa akɛ gbɔmɔ “aye nii kpakpai amli ŋɔɔmɔ yɛ edeŋmegbomɔ lɛ mli”​—⁠ni ji akɛ, esa akɛ ená be fiofio ni ekɛná nɔ ni jɛ nii ni etsu lɛ mli kɛba lɛ mli ŋɔɔmɔ. (Jajelɔ 2:​24) Ni esa akɛ afee nibii krokomɛi hu yɛ shihilɛ mli yɛ heloonaa nitsumɔ sɛɛ. Esa akɛ wɔná be hu wɔha wɔweku lɛ. Salomo ma nɔ mi akɛ jeee heloonaa nitsumɔ ji nɔ̃ tuuntu ni ji wɔgbɛnaa nii lɛ, shi moŋ Nyɔŋmɔ sɔɔmɔ. (Jajelɔ 12:​13) Ani ofata mɛi ni náa nitsumɔ ni ŋmɛɔ pɛpɛɛpɛ lɛ mli gbɛfaŋnɔ lɛ ahe?