‘Ŋa ni He Yɔɔ Fɛo lɛ Wu ni Yɔɔ Miishɛɛ’

BEI komɛi lɛ, mɛi komɛi folɔɔ Yehowa Odasefoi anaa akɛ amɛfiteɔ mɛi agbalashihilɛ. Shi kɛlɛ, gbalashihilɛi babaoo ni eye omanye yɛ hei ni hefatalɔ kome lɛ ji Yehowa Odasefoi ateŋ mɔ kome lɛ etsɔɔ akɛ enɛ jeee anɔkwale. Biblia mli ŋaawoo ni aaabo toi yɛ weku shihilɛ mli lɛ kɛ gbalashihilɛi ni miishɛɛ yɔɔ mli baa, taakɛ wolo ni nyiɛ sɛɛ, ni aŋma yɛ France adafitswaa wolo ko mli lɛ tsɔɔ lɛ.

“Mikɛ nɔ ni miihe ashɛ afii 28 sɔŋŋ ehi shi akɛ ŋa ni he yɔɔ fɛo, ni ji Yehowa Odasefoi ateŋ mɔ kome wu ni yɔɔ miishɛɛ. Etsɔse mibii enumɔ ní amɛteŋ mɛi enyɔ jeee lɛ diɛŋtsɛ ebii lɛ kɛ kwɛmɔ ni ŋmɛɔ pɛpɛɛpɛ kɛ suɔmɔ babaoo. Akɛni amrɔ nɛɛ, miji nitsumɔtsɛ ni mikɛ mɛi 45 miitsu nii hewɔ lɛ, manyɛ mawie kɛ nɔmimaa akɛ eye ebua mi babaoo ni minyɛ miye omanye yɛ minitsumɔ lɛ mli. Enɛ hewɔ ni beni mina sane ko yɛ adafitswaa wolo ni mifɔɔ hemɔ lɛ mli, ni miiwie Yehowa Odasefoi ahe akɛ mɛi ni he yɔɔ gbeyei yɛ Lot-et-Garonne niiaŋ lɛ, mikpɛ miyiŋ akɛ mikɛ odaseyeli ni ma shi shiŋŋ nɛɛ aaaha nyɛ lɛ.”

Wolo ni aŋma lɛ hu kɛɛ akɛ: “Amɛshɛreee zigarɛt ni amɛtɔɔɔ dãa hu. Ani hegbeyeiwoo nɛ? Amɛji Kristofoi ni yɔɔ mɛi ahe tsui ní kɛ mlai ni amɛnyiɛɔ sɛɛ lɛ fiii mɔ ko mɔ ko nɔ. Yɛ no najiaŋ lɛ, amɛji mɛi ni feɔ nɔkwɛmɔnii yɛ hei srɔtoi. . . . Amɛkɛ amɛhe wooo juu-kɛ-fɔ loo tsofai fɔji ahɔɔmɔ mli. Amɛkãaa hetsemɔ mli ni amɛaahiɛ lɛ he kita, ni manyɛ makɛɛ bo kɛ nɔmimaa akɛ, amɛhiɔ shi bɔ ni sa. . . .

“Ekolɛ obaabi mi akɛ: No hewɔ lɛ, mɛni hewɔ bo diɛŋtsɛ lɛ ojeee Yehowa Odasefoi ateŋ mɔ kome lɛ? Ejaakɛ Kristofoi ahemɔkɛyeli kɛ jeŋba kpakpa he miihia, ni afɔɔɔ enɛɛmɛi anamɔ yɛ gbɔmɛi babaoo ateŋ.”[1]