“Kɛji Ŋoo Naanu Gbo Lɛ”

AWUU he tai. Ahɔɔ kɛtsake nibii. Tsutsu lɛ, yɛ China lɛ shika tsuru pɛ jara wa fe lɛ. Hɛɛ, adesai aweku lɛ ejɛ jeeŋmɔ eyɔse bɔ ni ŋoo ji guɔnii ni jara wa waa. Kɛbashi ŋmɛnɛ lɛ, akɛtsaa mɔ, ni akɛkuɔ nifitemɔ naa, ni akɛtsuɔ nii yɛ jeŋ muu fɛɛ akɛ nɔ ni haa niyenii ŋɔɔ kɛ nɔ ni akɛbaa nii ayi.

Yɛ sui kpakpai babaoo ni ŋoo yɔɔ kɛ nibii ni akɛtsuɔ hewɔ lɛ, ebɛ naakpɛɛ mɔ akɛ akɛtsu nii yɛ mfonirifeemɔ mli yɛ Biblia lɛ mli. Ákɛ nɔkwɛmɔnɔ lɛ, Mose Mla lɛ biɔ ni awo nɔ̃ fɛɛ nɔ̃ ni akɛbahaa Yehowa yɛ afɔleshaa latɛ lɛ nɔ lɛ ŋoo. (3 Mose 2:​13) Afeee enɛ koni akɛha shãa afɔlei lɛ aŋɔɔ, shi moŋ ekolɛ akɛni ŋoo damɔ shi kɛha heyeli kɛmiijɛ fitemɔ mli lɛ hewɔ.

Yɛ e-Gɔŋ nɔ Shiɛmɔ ni ehe gbɛi lɛ mli lɛ, Yesu Kristo kɛɛ ekaselɔi lɛ akɛ: “Shikpɔŋ lɛ nɔ ŋoo ji nyɛ.” (Mateo 5:​13) Yɛ sane jajemɔ nɛɛ naa lɛ, Yesu miitsɔɔ akɛ Nyɔŋmɔ Maŋtsɛyeli ni amɛshiɛɔ amɛtsɔɔ mɛi krokomɛi lɛ baanyɛ abaa amɛyi, ehere amɛyiwala, aloo ená amɛ toibolɔi lɛ anɔ hewalɛ. Yɛ anɔkwale mli lɛ, mɛi ni kɛ Yesu wiemɔi lɛ tsu nii lɛ baaná hebuu kɛjɛ jeŋba kɛ mumɔŋ fitemɔ mli yɛ akutsei amli he ni amɛyɔɔ ni amɛsɔmɔɔ yɛ lɛ.​—1 Petro 4:​1-⁠3.

Kɛlɛ, Yesu tee nɔ ekɛ kɔkɔbɔɔ ha akɛ: “Shi kɛji ŋoo naanu gbo lɛ, . . . ehiii haaa nɔ ko feemɔ dɔŋŋ akɛ ja atsi ashwie ni anaanaa nɔ.” Beni Biblia nilelɔ Albert Barnes wieɔ enɛ he lɛ, ekɛɛ akɛ ŋoo ni Yesu kɛ ekaselɔi lɛ le lɛ “ji nɔ ni bɛ krɔŋŋ, ni efutu yelibaai, ni sũ mli nibii futu mli.” No hewɔ lɛ, kɛji ŋoo naanu gbo lɛ, “sũ mli nibii falɛ ko” baanyɛ ashwɛ yɛ sɛɛ. Barnes tsɔɔ mli akɛ, “sɛɛnamɔ bɛ enɛ he ákɛ ja . . . atsi ashwie shikpɔŋ taakɛ wɔkɛ ŋmilitsa feɔ lɛ.”

Yɛ nɛkɛ kɔkɔbɔɔ nɛɛ toiboo mli lɛ, esa akɛ Kristofoi akwɛ jogbaŋŋ koni amɛkafɔ̃ɔ amɛ odaseyeli nitsumɔ yɛ maŋ lɛ aloo ni amɛaaku sɛɛ kɛaatee jeŋba ni Nyɔŋmɔ gbeyeishemɔ bɛ mli lɛ mli. Kɛ jeee nakai lɛ, amɛbaafite yɛ mumɔŋ ni sɛɛnamɔ baŋ amɛhe, tamɔ ‘ŋoo ni naanu egbo.’