Nilee ní ‘Akɛaatsɔ Hiɛ Ana Nɔ ni Baaba Lɛ’
“AMƐJI gbɔmɛi ni jwɛŋmɔ kpakpa elaaje amɛ, ni amɛbɛ niiashishinumɔ. Amɛle nii kulɛ, amɛaanu enɛ shishi, ni amɛaana nɔ ni baaba amɛnɔ.”—5 Mose 32:28, 29, Beck.[1]
Mose wie wiemɔi nɛɛ etsɔɔ Israelbii lɛ beni amɛdamɔ Shiwoo Shikpɔŋ lɛ husui anaa lɛ. Mose miitsɔ hiɛ eegba be ni amɛbaakpoo Yehowa ní amɛsusuŋ nɔ ni baajɛ amɛnifeemɔi lɛ amli kɛba lɛ he. Yɛ afii ohai abɔ ni nyiɛ sɛɛ lɛ mli lɛ, Israelbii lɛ—ní maŋtsɛmɛi babaoo fata he lɛ—kpoo Nyɔŋmɔ kɔkɔbɔi lɛ.
Ákɛ nɔkwɛmɔnɔ lɛ, Salomo le ŋwɛi famɔ akɛ, akɛ mɛi ni jáa nyɔŋmɔi krokomɛi yɛ Yehowa sɛɛ lɛ akabote gbalashihilɛ mli. (5 Mose 7:1-4) Ni kɛlɛ, ebana “maŋsɛɛ yei pii.” Mɛni jɛ mli ba? Nɔ ni aŋma yɛ Biblia lɛ mli lɛ kɛɔ akɛ: “Eba mli akɛ, beni Salomo gbɔ lɛ, eŋamɛi lɛ dɔ etsui kɛyanyiɛ nyɔŋmɔi krokomɛi asɛɛ; ni etsui yeee emuu yɛ Yehowa, e-Nyɔŋmɔ lɛ, hiɛ, tamɔ etsɛ David tsui.” (1 Maŋtsɛmɛi 11:1, 4) Eyɛ mli akɛ eji nuu nilelɔ moŋ, shi Salomo náaa jwɛŋmɔ kpakpa ni ‘ekɛaatsɔ hiɛ ena nɔ ni baaba lɛ’ kɛ́ egbo Nyɔŋmɔ famɔ lɛ nɔ toi lɛ.
Ni wɔ hu? Wɔbaanyɛ wɔjo piŋmɔi babaoo anaa foi kɛji wɔtsɔ hiɛ wɔsusu wɔshihilɛi amli yiŋkpɛi ahe. Ákɛ nɔkwɛmɔnɔ lɛ, awoɔ Kristofoi aŋaa koni ‘amɛtsuu amɛhe kɛjɛ heloo kɛ mumɔ fɛɛ he muji mli.’ (2 Korintobii 7:1) Ŋaawoo ni nilee yɔɔ mli nɛ, shi mɛi babaoo bɛ jwɛŋmɔ kpakpa ni amɛkɛaana nɔ ni baaba kɛ́ amɛbuuu Paulo ŋaawoo lɛ. Ákɛ nɔkwɛmɔnɔ lɛ, oblahii kɛ oblayei babaoo woɔ amɛgbɔmɔtsei lɛ ahe muji kɛtsɔ tawa shɛremɔ nɔ, ni amɛsusuɔ akɛ enɛ haa amɛfeɔ mɛi ni le nii ní edara. Kwɛ dɔlɛ sane ni eji akɛ, nɔ ni jɛɔ mli baa yɛ sɛɛ mli ji akɛ, amɛteŋ mɛi babaoo náa tsui helai, flufla mli kansa, loo hela ni atsɛɔ lɛ emphysema ni haa mɔ musu fũuɔ lɛ, yɛ shihilɛ mli!
Ehe miihia ni wɔkɛ hiɛdɔɔ asusu nɔ ni jɛɔ wɔyiŋkpɛi kɛ nifeemɔi amli kɛbaa lɛ he. Yiŋtoo kpakpa hewɔ ni Paulo ŋma akɛ: “Nɔ pɛ ni gbɔmɔ dũɔ lɛ, no nɔŋŋ ebaakpa hu. Ejaakɛ mɔ ni dũɔ yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ; shi mɔ ni dũɔ nii yɛ mumɔ mli lɛ, mumɔ lɛ mli nɔŋŋ ebaakpa naanɔ wala kɛjɛ.”—Galatabii 6:7, 8.
[Caption on page 32]
ANI OBAASUMƆ NI ABASARA BO?
Obaanyɛ ona miishɛɛ yɛ jeŋ ni haomɔi yɔɔ mli nɛɛ po mli kɛjɛ Biblia mli anɔkwa nilee ni kɔɔ Nyɔŋmɔ, kɛ e-Maŋtsɛyeli lɛ, kɛ enaakpɛɛ yiŋtoo kɛha adesai ahe lɛ mli. Kɛji obaasumɔ ni ole nibii babaoo aloo ni mɔ ko aba oŋɔɔ ni ekɛ bo afee shia Biblia mli nikasemɔ ni aheee nɔ ko lɛ, ofainɛ ŋmaa kɛya Watch Tower, P. O. Box GP 760, Accra, Ghana, aloo kɛya adrɛs ni atsɔɔ yɛ baafa 2 lɛ mli nɔ ni sa.