Suɔmɔ Kpo ni Ajieɔ Atsɔɔ “Mɛi ni Ji Hemɔkɛyeli lɛ Webii Lɛ”
ANƆKWA Kristofoi kɛ amɛhe hiɔ shi yɛ ekomefeemɔ mli tamɔ weku. Lɛɛlɛŋ, amɛtsɛ amɛhe akɛ “nyɛmimɛi hii” kɛ “nyɛmimɛiyei” aahu kɛjɛ klɛŋklɛŋ afi oha Ŋ.B. kɛbaa nɛɛ mli. (Marko 3:31-35; Filemon 1, 2) Jeee wiemɔi foji kɛkɛ nɛ; etsɔɔ bɔ ni Nyɔŋmɔ jálɔi naa amɛhe amɛhaa. (Okɛto 1 Yohane 4:7, 8 he.) Yesu kɛɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.
Aye suɔmɔ ni tamɔ nakai he odase yɛ July 1997 mli, beni nugbɔ nɛ waa ni ekɛ nu afua ba Chile yɛ nuhɔmɔ be kakadaŋŋ ko sɛɛ lɛ. Trukaa kɛkɛ ni niyenii, atade, kɛ nibii krokomɛi he bahia gbɔmɛi pii. Yɛ amanehulu bei amli lɛ, Yehowa Odasefoi bɔɔ mɔdɛŋ koni amɛkɛ ŋaa ni Paulo wo Galatabii lɛ atsu nii: “Belɛ akɛ nɔ ni wɔyɔɔ dekã hewɔ lɛ, nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.”—Galatabii 6:10.
Enɛ hewɔ lɛ, Yehowa Odasefoi kɛ oyaiyeli to amɛhe gbɛjianɔ koni amɛtsu he nii. Abua niyenii, atade kɛ nibii ni tamɔ enɛɛmɛi anaa, ajara mli awo henɔi sɔrɔtoi amli, ni ato amɛ jogbaŋŋ, ni akɛmaje kɛtee he ni oshara lɛ eba yɛ lɛ. Gbekɛbii po kɛ tsobii maje! Efee nyɛmi yoo ko naakpɛɛ beni ena akɛ Maŋtsɛyeli Asa lɛ mli eyi obɔ kɛ yelikɛbuamɔ nibii lɛ. Ekɛɛ: “Minaa kpɛ mihe kɛdamɔ shi, ni kɛ ŋmɔ miŋmɔɔ jio, fo mifoɔ jio, mileee. No nɔŋŋ ji nɔ ni he hiaa wɔ.”
Kɛkɛ ni trukaa lɛ, shikpɔŋ hosomɔ ba yɛ he ni nu afua lɛ eba yɛ lɛ fã. Shiai babaoo kumɔ. Bɔni afee ni atsu hiamɔ ni eba lɛ he nii lɛ, ato yelikɛbuamɔ ajinafoi babaoo ahe gbɛjianɔ. Kpokpaa nɔ Tsũmaa He Ajinafoi Akuu ní fɔɔ Yehowa Odasefoi akpeehe he nibii ahe nitsumɔ ye amɛbua, ni amɛkɛ sɛɛfimɔ ha. Mɛni jɛ mli ba? Amamɔ tsũi ni sa—tsũi ni nyɛmimɛi lɛ diɛŋtsɛ to he gbɛjianɔ—aha mɛi ni amɛshiai ekumɔ lɛ. Eyɛ mli akɛ shiai nɛɛ bɛ haŋtsii moŋ, shi ehi kwraa fe nɔ ni asako emligbɛ shikpɔŋ lɛ, kɛ samfɛji lɛ, ni apɛŋteko he, ni yelikɛbuamɔ he gbɛjianɔtoo ko etsɔ shikafaa nɔ ekɛha lɛ.
Nyɛmimɛi komɛi fã gbɛ kakadaŋŋ koni amɛyaye amɛbua. Eyɛ mli akɛ Kpokpaa nɔ Tsũmaa He Ajinafoi Akuu lɛ asɛinɔtalɔ lɛ eko taa shwiili sɛi nɔ moŋ—shi ekɛ gbii enyɔ kpa he ni oshara lɛ eba yɛ lɛ mli fɛɛ. Nyɛmi nuu ko ni eshwila tsu nii waa ni etereɔ tsei ehaa kapintɛfonyo lɛ ni egbalaa mli taakɛ bɔ ni ehe hiaa. Nyɛminuu ko ni emu toi lɛ holeɔ tsei lɛ kɛyaa hei ni amɛhe hiaa yɛ lɛ.
Gbɔmɛi babaoo ni na lɛ, amii shɛ amɛhe waa yɛ yelikɛbuamɔ ni nyɛmimɛi kɛhaa lɛ hewɔ. Yɛ maŋ ko mli lɛ polisifoi lɛ kɛ amɛtsɔne yama nyɛmi yoo ko ni aasaa eshia lɛ masɛi. Polisifoi lɛ miitao ni amɛle nɔ ni afeɔ lɛ he sane. Amɛteŋ mɔ ko bi nyɛmi ko akɛ: “Namɛi ji nitsulɔi ni yɔɔ miishɛɛ waa nɛɛ, ni nyɔmɔwoo enyiɛ ahãa amɛ?” Nyɛmi nuu lɛ tsɔɔ mli akɛ amɛ fɛɛ amɛji mɛi ni kɛ amɛhe eha ni awooo amɛ nyɔmɔ ko. Polisifoi lɛ ateŋ mɔ ko kɛɛ akɛ, ekɛ mlijaa nyɔŋma haa amɛ osɔfo lɛ daa, shi ni shikpɔŋ hosomɔ lɛ ba nɛɛ ebasarako lɛ po! No gbi lɛ sɛɛ lɛ, polisifonyo lɛ eko tswa nyɛmi yoo lɛ tɛlifoŋ. Lɛ hu ena nitsulɔi lɛ. Ekɛɛ akɛ ekãa ni mɛi lɛ kɛtsuɔ nii lɛ ná enɔ hewalɛ aahu akɛ eka ni ekɛ ehe awo mli!
Lɛɛlɛŋ, mɔdɛŋ ni abɔ koni akɛ yelikɛbuamɔ aha yɛ Chile lɛ ji niiashikpamɔ ko ni yɔɔ miishɛɛ kɛha mɛi ni kɛ amɛhe ha nitsumɔ lɛ, ni agbɛnɛ hu eji odaseyeli ni nɔ bɛ kɛha mɛi ni na lɛ.