Nɔyeli Hegbɛi Jie Odasefoi Ayi

YƐ Cadiz, Spain, yɛ ŋshɔnaa maŋ ko ni yɔɔ he ni kɛ Madrid wuoyigbɛ jɛkɛmɔ shɛɔ kilomitai 500 lɛ mli lɛ, maŋ onukpa Doña Teófila Martínez kɛ tao fɛfɛo ni aŋmala nɔ nii (mfoniri ni yɔɔ yiteŋgbɛ lɛ) ha Yehowa Odasefoi. Ekaneɔ nɛkɛ: “Akɛ Cádiz maŋtiase asa lɛ eha Yehowa Odasefoi koni akɛtsɔɔ hiɛsɔɔ ni ayɔɔ kɛha ekomefeemɔ kɛ mɔdɛŋ ni amɛbɔɔ kɛha maŋ lɛ.” Mɛni Odasefoi lɛ fee ni amɛnine shɛ woo nɛɛ nɔ?

Aŋɔ ha Odasefoi lɛ yɛ nii ni amɛtsu kɛsaa maŋtiase lɛ shwɛmɔhe lɛ fã ko, ni ayɔse lɛ hewɔ. Odasefoi ohai abɔ jɛ amɛsuɔmɔ mli amɛkɛ otsii anaagbee pii ye bua kɛsaa niiasɛɛyaahei ni yɔɔ Carranza bɔɔltswaahe lɛ shishigbɛ tsũi lɛ amli lɛ. Amrɔ nɛɛ, mɛi fɛɛ ni yaa shwɛmɔhe nɛɛ náa paipii, kɛ nu ni baa kɛtsɔɔ paipii amli, kɛ shikpɔŋ ni asaa lɛ lɛ ahe sɛɛ.

Be saŋŋ nɛ ní Yehowa Odasefoi kɛ Cádiz maŋ lɛ ená tsakpaa kpakpa mli ŋɔɔmɔ. Daa afi lɛ, maŋtiase nɔyelɔi jɛɔ mlihilɛ mli amɛkɛ Carranza shwɛmɔhe lɛ haa Odasefoi, kɛha amɛ daa afi kpokpaa wulu nɔ kpee lɛ feemɔ. No hewɔ lɛ, Odasefoi lɛ yɛ he miishɛɛ akɛ amɛaafee bɔ fɛɛ bɔ ni amɛaanyɛ koni amɛkɛye amɛbua ni amɛha shwɛmɔhe lɛ afee he ni yɔɔ fɛo.

Shi kɛlɛ, kɛfata nii ni akɛ hewalɛ tsuɔ yɛ be pɔtɛɛ komɛi amli lɛ he lɛ, Yehowa Odasefoi lɛ yasaraa maŋtiase lɛ mli bii lɛ ni amɛyeɔ amɛbuaa amɛ yɛ gbɛ kroko hu nɔ. Amɛjajeɔ Nyɔŋmɔ Maŋtsɛyeli lɛ he “sanekpakpa” lɛ amɛtsɔɔ. Yɛ anɔkwale mli lɛ, amɛkɛ amɛhe wooo maŋ shiɛmɔ nitsumɔ lɛ mli bɔni afee ni amɛná yijiemɔ kɛjɛ gbɔmɛi aŋɔɔ. Amɛfeɔ koni amɛkɛtsɔɔ bulɛ ni amɛyɔɔ kɛha Yesu famɔ akɛ ashiɛ “maŋtsɛyeli lɛ he sanekpakpa lɛ” koni ‘ayafee jeŋmaji fɛɛ kaselɔi’ lɛ hewɔ. (Mateo 24:14; 28:19) Yɛ nɛkɛ gbɛ nɔ lɛ, Yehowa Odasefoi heɔ amɛyeɔ akɛ amɛbaasɔmɔ akutso lɛ kɛtsɔ gbɔmɛi anitsɔɔmɔ yɛ “jalɛ gbɛ lɛ nɔ” lɛ nɔ.​—⁠Abɛi 12:⁠28.