“Manyɛ Manu Toiŋjɔlɛ Shihilɛ lɛ He”

NUU ko ni jɛ Germany tee kpee ko ni Yehowa Odasefoi fee lɛ shishi bɔni afee ni “eyakpá” Odasefoi lɛ “ashi.” Mɛni hewɔ? Eyiŋtoo ji koni “eyakpá nɛkɛ kuu nɛɛ he mama ni ekpɔ enanemɛi lɛ ni amɛkadu gbɛ.” Beni étee kpee lɛ sɛɛ lɛ, eŋma wolo ni nyiɛ sɛɛ nɛɛ emaje enanemɛi lɛ:

“Beni mishɛ kpeehe lɛ, misusu akɛ midu gbɛ. Mɔ ko mɔ ko bɛ agbo lɛ naa, ni jwɛi loo biɛr tsɛŋsii kãaa shikpɔŋ. Beni mibɛŋkɛɔ jɛmɛ lɛ, mina oblahii enyɔ damɔ shwɛmɔhe lɛ agbo lɛ naa. Amɛŋa mi ni amɛha mibote mli.

“Mikpa gbɛ akɛ manu bolɔmɔ kɛjɛ mɛi akpei abɔ ni asusuɔ akɛ amɛyɔɔ jɛmɛ lɛ aŋɔɔ shi jɛmɛ efee dioo. Misusu yɛ miyitsoŋ akɛ, ‘Ojogbaŋŋ, ekolɛ, gbɔmɛi fioo ko kɛkɛ egbɛ eshwã shwɛmɔhe lɛ mli fɛɛ.’

“Beni mibote mli lɛ, mijwɛŋmɔ tee drama ko ni afeɔ yɛ shiɛmɔ kpoku lɛ nɔ lɛ nɔ amrɔ nɔŋŋ. Sɛɛ mli dani miyɔse akɛ shwɛmɔhe lɛ mli eyi obɔ kɛ toibolɔi akpei abɔ ni efee dioo. Manyɛ manu toiŋjɔlɛ shihilɛ lɛ he. Nɔ ni minu, ni mina, kɛ henumɔ ni mina yɛ kpee lɛ mli nifeemɔi ni eshwɛ lɛ na minɔ hewalɛ babaoo.

“Beni mikɛ Odasefoi lɛ sharaa lɛ, miyɔse amɛhiɛ ni yɔɔ miishɛɛ kɛ suɔmɔ wiemɔi lɛ jogbaŋŋ. Amrɔ nɔŋŋ lɛ, minyɛɛɛ matsi jwɛŋmɔ nɛɛ naa ni ji, ‘Mɛnɛɛmɛi ji Nyɔŋmɔ webii lɛɛlɛŋ!’ ”

Yɛ nɔ najiaŋ ni ‘eeekpɔ enanemɛi lɛ kɛjɛ gbɛduu mli lɛ,’ oblanyo lɛ bi koni akɛ lɛ akase Biblia lɛ. Mɛni jɛ mli ba? Ŋmɛnɛ, eji Kristofonyo onukpa. Lɛ kɛ eweku lɛ yɛ ekãa yɛ asafoi ni yɔɔ Zug, Switzerland lɛ ateŋ ekome mli.