“Tsɔɔmɔ Gbekɛ Gbɛ”

ABƆƆFEEMƆ ni yeɔ omanye lɛ biɔ babaoo kwraa fe ni aaagbɛ wui komɛi ashwã shikpɔŋ koni no sɛɛ lɛ aku sɛɛ aba yɛ nyɔji fioo komɛi asɛɛ kɛha nikpamɔ. Nitsumɔ babaoo ni wa fata he koni akɛsaa sũ lɛ, ni adũ wui lɛ, koni ashwie dumɔnii lɛ anɔ nu ni akwɛ nɔ koni amɛnyɛ amɛdara jogbaŋŋ.

Gbɛ ni tamɔ nɛkɛ baanyɛ afee anɔkwale ni Abɛi 22:6 ji lɛ he mfoniri jogbaŋŋ, ní kɛɔ akɛ: “Tsɔɔmɔ gbekɛ gbɛ ni sa akɛ etsɔ nɔ, ni kɛ́ egbɔ hu lɛ, ejeŋ nɔ.” Lɛɛlɛŋ, tsɔsemɔ ni fɔlɔ kɛhaa lɛ ji yelikɛbuamɔ nɔ̃ titri ni haa bi tsɔsemɔ yeɔ omanye.

Shi yɛ ŋmɛnɛŋmɛnɛ jeŋ ni aŋmɛɔ nɔ fɛɛ nɔ feemɔ gbɛ yɛ mli lɛ, fɔlɔi babaoo kɛ ŋaawoo nɛɛ tsuuu nii. Kɛ amɛkɛ nilee ni afɔɔ kɛ nitsumɔ ni tsɔɔ akɛ esa akɛ gbekɛbii akase bɔ ni amɛaatsu amɛ diɛŋtsɛ amɛ naagbai ahe nii lɛ tsu nii lɛ, bei pii lɛ, amɛshiɔ amɛbii lɛ koni amɛfee amɛnii ní amɛkɛ yelikɛbuamɔ ko kwraa haaa. Nifeemɔ gbɛ ni tamɔ nɛkɛ haa gbekɛbii feɔ mɛi ni aŋkroaŋkroi ni kɛ shishitoo mla kpakpa tsuuu nii, ní amɛbɛ jeŋba lɛ náa amɛnɔ hewalɛ mra yɛ gbɛ fɔŋ nɔ.—Abɛi 13:20.

Kwɛ bɔ ni ehi jogbaŋŋ kɛha fɔlɔi akɛ amɛaadu Kristofoi ashishitoo mlai amɛwo amɛbii amli kɛtsɔ tsɔsemɔ ni Nyɔŋmɔ gbeyeishemɔ yɔɔ mli ni amɛkɛaaha amɛ beni amɛdarako kwraa nɔ! Te eyɔɔ mra ehaa tɛŋŋ? Bɔfo Paulo kɛɛ: ‘Kɛjɛ gbekɛbiiashi.’ Nakai eji yɛ oblanyo Timoteo gbɛfaŋ. Enyɛ Eunike, kɛ enaa Loise dũ “ŋmalɛi krɔŋkrɔŋi lɛ” amɛwo Timoteo mli, ni yɛ no hewɔ lɛ ‘ekase’ ni ‘eyɛ hewalɛ yɛ nɔ.’ Mɛni jɛ mli ba? Tsɔsemɔ ni tamɔ nɛkɛ tsu gbɛfaŋnɔ ko ni he hiaa he nii yɛ bɔ ni eha efee mɔ ni ‘le nii kɛyaa yiwalaheremɔ mli’ lɛ.—2 Timoteo 1:5; 3:14, 15.

Nakai nɔŋŋ ŋmɛnɛ, fɔlɔi ní haaa ‘ekpakpafeemɔ atɔ amɛ’ lɛ baaná nyɔmɔwoi babaoo kɛ́ ‘amɛnijiaŋ ejeee wui lɛ.’ (Galatabii 6:9) Maŋtsɛ Salomo ni le nii lɛ kɛɛ: “Jalɔ tsɛ aaanya babaoo.”—Abɛi 23:24.