Maŋtsɛyeli Jajelɔi Bɔ Amaniɛ

Awo Anɔkwa Nyɔŋmɔ lɛ Sɛɛgbɛ Taomɔ He Nyɔmɔ

YƐ AFII ohai nyɔŋma D.Ŋ.B. lɛ, apasa jamɔ bahe shi waa yɛ Yuda akutsei enyɔ maŋtsɛyeli lɛ mli. Shi kɛlɛ, yɛ nɛkɛ wɔŋjamɔ ni fa babaoo nɛɛ amli lɛ, nuu ko yɛ ni tsui ja yɛ Nyɔŋmɔ hiɛ. Egbɛi ji Yehoshafat. Gbalɛ Yehu wie yɛ ehe akɛ: “Ana nibii kpakpai komɛi yɛ ohe, ejaakɛ . . . oosaa otsui koni otao Nyɔŋmɔ sɛɛgbɛ!” (2 Kronika 19:3, NW) Nakai nɔŋŋ ŋmɛnɛ, yɛ “jaramɔ bei” nɛɛ amli lɛ, gbɔmɛi akpekpei abɔ ‘miisaa amɛtsuii’ koni amɛtao Nyɔŋmɔ sɛɛgbɛ. (2 Timoteo 3:1-5) Wɔnaa enɛ yɛ niiashikpamɔ ni nyiɛ sɛɛ ni jɛ Togo yɛ Afrika Anaigbɛ lɛ mli.

Casimir tee Katolik skul, ni eye eklɛŋklɛŋ Kɔminiɔ beni eye afii nɛɛhu. Shi beni Casimir yeɔ afii 14 lɛ, no mli lɛ ekpa sɔlemɔ yaa. Enɛ ha eshe gbeyei, ejaakɛ esusu akɛ kɛ eyaaa Mass lɛ, akɛ lɛ baawo hɛl la ko ni tsoɔ grigri lɛ mli, aloo kɛhoo lɛ hetsuumɔhe.

Yɛ skul lɛ, Casimir yafata gbekɛbii akuu ko ni kpeɔ shikome yɛ otsi mli amɛkaseɔ Biblia lɛ lɛ ahe. Lɛ diɛŋtsɛ hu ebɔi Biblia lɛ kanemɔ. Be ko lɛ Casimir kane kooloo ko ni he yɔɔ gbeyei ni fã kpo kɛjɛ ŋshɔ lɛ mli lɛ he sane yɛ Kpojiemɔ wolo lɛ mli. (Kpojiemɔ 13:1, 2) Beni ebi Biblia kaselɔi akuu lɛ hiɛnyiɛlɔ lɛ sane ni kɔɔ kooloo lɛ he lɛ, akɛɛ lɛ akɛ, kooloo lɛ ji kooloo ko ni yɔɔ diɛŋtsɛ, ni baafã kpo kɛjɛ ŋshɔ lɛ mli lɛɛlɛŋ. Sane naatsɔɔmɔ nɛɛ gba Casimir naa, ejaakɛ eshia kɛ Atlantik Ŋshɔ lɛ jɛkɛɛɛ. Ená nɔmimaa akɛ, ebaafee klɛŋklɛŋ mɛi ni kooloo awuiyelɔ lɛ baamɔmɔ lɛ ateŋ mɔ kome.

Kɛkɛ ni Casimir kɛ shika bɔi too bɔni afee ni enyɛ ejo foi kɛya shia-ŋa ni yɔɔ kooyigbɛ lɛ nɔ, koni ejo kooloo awuiyelɔ lɛ naa foi. Ekɛ eklasnyo ko gba eyiŋkpɛi nɛɛ he sane. Akɛni eklasnyo lɛ ji Yehowa Odasefoi lɛ ateŋ mɔ kome hewɔ lɛ, ema nɔ mi eha lɛ akɛ kooloo ko ni tamɔ nakai diɛŋtsɛ ejeŋ kpo kɛjɛŋ ŋshɔ lɛ mli. No sɛɛ etsɛɛɛ ni afɔ̃ Casimir nine kɛtee kpeei yɛ Maŋtsɛyeli Asa lɛ nɔ. Ená kpeei lɛ he miishɛɛ, ni ebɔi yaa daa. Ekpɛlɛ ni akɛ lɛ akase Biblia lɛ hu yɛ shia.

Beni Casimir yaa hiɛ yɛ enikasemɔ lɛ mli lɛ, wekumɛi bɔi shitee kɛ lɛ woo. Eweku lɛ jáa blematsɛmɛi lɛ, ni amɛyeɔ loo kɛ elá ni akɛshãa afɔlei ahaa wɔji ni eshwɛ lɛ. Beni Casimir kɛ bulɛ kpoo akɛ eyeee loo lɛ, awo ehe gbeyei, ni akɛɛ lɛ akɛ eshi shia lɛ. Casimir etswaaa esɛŋ, ni atsuuu gbeyeiwoo lɛ he nii. Shi kɛlɛ, yɛ nyɔji etɛ ni nyiɛ sɛɛ lɛ mli lɛ, loo ni tamɔ nɛkɛ pɛ weku lɛ yeɔ. Carimir naaa niyenii ni fa eye, shi eŋmɛ etsui shi yɛ enɛ kɛ shihilɛi ni wawai krokomɛi amli.

Casimir tee nɔ yɛ mumɔŋ aahu kɛyashɛ henɔjɔɔmɔ kɛ baptisimɔ mli. Sɛɛ mli lɛ ahala lɛ akɛ asafoŋ sɔɔlɔ, ni etee Sɔɔmɔ Tsɔsemɔ Skul lɛ eko yɛ Togo. Amrɔ nɛɛ, eená nii ni etsuɔ yɛ nitsumɔhe nine lɛ mli lɛ mli ŋɔɔmɔ.

Hɛɛ, kwɛ bɔ ni Maŋtsɛ David wiemɔi lɛ efee anɔkwale eha yɛ gbɛi pii anɔ akɛ: “Kɛji ootao [Yehowa] lɛ, eeeha ona lɛ.”—2 Kronika 28:9.

[Mfoniri ni yɔɔ baafa 8]

Casimir (ninejurɔ gbɛ) eená nii ni etsuɔ yɛ nitsumɔhe nine lɛ mli ŋɔɔmɔ