“Bɔ ni Nyɔŋmɔ Kpaa Gbɛ akɛ Wɔɔfee lɛ Nakai Pɛpɛɛpɛ Nyɛji”

BENI Kristofoi kɛ je lɛŋ nɔyeli hegbɛi lɛ feɔ ekome “yɛ Nuntsɔ lɛ hewɔ” lɛ, amɛbaanyɛ amɛkpa gbɛ akɛ amɛaaná “ekpakpafeelɔi ayijiemɔ.” (1 Petro 2:13-15) Etsɛko tsɔ ni Yehowa Odasefoi ni yɔɔ South Africa lɛ ná enɛ mli niiashikpamɔ yɛ kpokpaa wulu nɔ kpee ko ni amɛfee yɛ kɔleji ko asa nɔ lɛ shishi.

Yɛ kpee lɛ klɛŋklɛŋ gbi lɛ nɔ lɛ, polisifoi ni buɔ kɔleji lɛ he lɛ fee klalo koni amɛtutua, taakɛ eji yɛ mɛi abɔ ni baa he ko kɛ mlifu lɛ he, ní amɛkɛ mɛi efeee ekome taakɛ amɛnaa yɛ kpeei krokomɛi ahe lɛ. Shi akɛni amɛkɛ Yehowa Odasefoi ekpeko kwraa hewɔ lɛ, amɛbaana naakpɛɛ nɔ ko ni yɔɔ miishɛɛ kɛ̃!

Taakɛ amɛfɔɔ feemɔ ni amɛkwɛɔ mɛi anibii amli yɛ agbói lɛ anaa kɛha shweshweeshwe shihilɛ lɛ, polisifoi ni buɔ nibii ahe lɛ kwɛ tsɔne fɛɛ tsɔne ni boteɔ mli aloo ejeɔ kpo lɛ mli. Amɛnaa kpɛ amɛhe, beni ajie naanyobɔɔ, tsuishitoo, kɛ bulɛ kpo atsɔɔ amɛ lɛ, eyɛ mli akɛ mɛi anibii amli kwɛmɔ lɛ ha mɛi ni ba kpee lɛ kpe sɛɛ moŋ. Amɛnuuu naatsĩi, ŋwanejee, kɛ jɛmɔ wiemɔ ko he kwraa taakɛ afɔɔ feemɔ lɛ. Polisifonyo ko ni kwɛɔ nibii amli lɛ kɛɛ: “Ákɛ nɔ ni tamɔɔɔ gbɔi krokomɛi lɛ, nyɛjieɔ heshibaa mumɔ kɛ dioofeemɔ ni bulɛ yɔɔ mli lɛ kpo taakɛ eyɔɔ faŋŋ yɛ wɔ fɛɛ wɔhiɛ lɛ.”

Beni nibii amlikwɛlɔ nukpa lɛ baná ele Yehowa Odasefoi ajeŋba ni tsɔɔ ekomefeemɔ lɛ, ekpɛ eyiŋ akɛ ehe ehiaaa ni akwɛ tsɔnei lɛ amli, taakɛ ekɛɛ lɛ, “ejaakɛ atsɔse nyɛ jogbaŋŋ.” No hewɔ lɛ, tsɔnei ni akɛ kadimɔ nii ni ji “JW” (Yehowa Odasefoi) ekadi nɔ lɛ boteɔ mli ni akwɛɛɛ amɛmli nibii amli.

Beni agbe kpee lɛ naa lɛ, nibii amlikwɛlɔ nukpa lɛ kɛɛ akɛ, eekpa gbɛ akɛ etsɛŋ ni ebaana Odasefoi lɛ ekoŋŋ. Ekɛɛ akɛ: “Wɔnako mɛi ni baa amɛjeŋ jogbaŋŋ nɛkɛ pɛŋ. Bɔ ni Nyɔŋmɔ kpaa gbɛ akɛ wɔɔfee lɛ nakai pɛpɛɛpɛ nyɛji.” Yijiemɔ ni tamɔ nɛkɛ lɛ ji yelikɛbuamɔ babaoo kɛha anɔkwa Kristofoi akɛ ‘amɛaaba amɛjeŋ jogbaŋŋ,’ bɔni afee ni gbɔmɛi ‘awo Nyɔŋmɔ hiɛ nyam yɛ nitsumɔi kpakpai ni amɛnaa lɛ hewɔ.’—1 Petro 2:12.