Ani Okaiɔ?

Ani onya Buu-Mɔɔ srɔtoi ni ba nyɛsɛɛ nɛɛ akanemɔ he? Kɛji nakai ni lɛ, obaana he miishɛɛ akɛ oookai nɔ ni nyiɛ sɛɛ nɛɛ:

◻ Mɛni hewɔ wɔbaanyɛ wɔná hekɛnɔfɔ̃ɔ yɛ aŋkroaŋkroi ni Yehowa halaa koni amɛnyiɛ ewebii lɛ ahiɛ lɛ mli lɛ?

Yehowa halaa aŋkroaŋkroi ni hiɛ sui ni he hiaa koni amɛkɛkudɔ ewebii lɛ yɛ gbɛ ni etaoɔ ni amɛtsɔ nɔ yɛ be pɔtɛɛ ko mli kɛha gbɛnaa nii komɛi.—8/15, baafa 14.

◻ Mɛni wɔbaanyɛ wɔkase kɛjɛ Yona niiashikpamɔ lɛ mli?

Yona susu lɛ diɛŋtsɛ ehe babaoo tsɔ̃, ni esusu mɛi krokomɛi ahe bibioo pɛ. Wɔbaanyɛ wɔkase nii kɛjɛ Yona ŋɔɔ kɛtsɔ wɔ diɛŋtsɛ wɔhe kɛ wɔhenumɔi ni wɔɔha ehi sɛɛ lɛ nɔ.—8/15, baafa 19.

◻ Abaanyɛ awie akɛ “mɔɔ ni wa ji Yehowa gbɛi lɛ” yɛ mɛɛ gbɛ nɔ? (Abɛi 18:10)

Nyɔŋmɔ gbɛi ni wɔkɛfeɔ wɔbobaahe lɛ tsɔɔ akɛ wɔkɛ wɔhe fɔ̃ɔ Yehowa diɛŋtsɛ nɔ. (Lala 20:2; 122:4) Etsɔɔ maŋtsɛ ni eji lɛ sɛɛfimɔ, emlai kɛ eshishitoo mlai amli hiɛmɔ, hemɔkɛyeli ni ayɔɔ yɛ eshiwoi amli kɛ hetuu-kɛhamɔ ni akɛhaa ekome pɛ. (Yesaia 50:10; Hebribii 11:6)—9/1, baafa 10.

◻ Gbɛ ni Paulo tsɔ nɔ eye mɛi ni je agbo odase lɛ kɛ nɔkwɛmɔnɔ haa wɔ yɛ mɛɛ gbɛ nɔ?

Beni Paulo kɛ Maŋtsɛ Agripa wieɔ lɛ, ekɛ sɛɛyoomɔ tsu nii, ni ema saji otii ni lɛ kɛ Agripa fɛɛ kpɛlɛɔ nɔ lɛ nɔ mi. Nakai nɔŋŋ esa akɛ wɔma sanekpakpa lɛ mli saji otii ni sa lɛ anɔ mi, ni wɔma hiɛnɔkamɔi ni wɔ fɛɛ wɔhiɛ lɛ nɔ mi. (1 Korintobii 9:22)—9/1, baafa 31.

◻ Namɛi Yehowa tsuishitoo lɛ he baaba sɛɛnamɔ kɛha?

Yɛ Yehowa tsuishitoo lɛ hewɔ lɛ, akɛ hegbɛ miiha gbɔmɛi akpekpei babaoo koni ahere amɛyiwala kɛtsɔ “Yehowa gbi” lɛ mli. (2 Petro 3:9-15) Etsuishitoo lɛ hu miiŋmɛ wɔteŋ mɔ fɛɛ mɔ gbɛ koni ‘wɔya nɔ wɔkɛ gbeyeishemɔ kɛ hekpokpomɔ atsu wɔ diɛŋtsɛ wɔyiwalaheremɔ he nii.’ (Filipibii 2:12)—9/15, baafa 20.

◻ Te Septuagint Biblia lɛ shishitsɔɔmɔ lɛ jara wa ha tɛŋŋ?

Nɛkɛ shishitsɔɔmɔ nɛɛ ná gbɛfaŋnɔ ni he hiaa waa yɛ Yehowa Nyɔŋmɔ he nilee kɛ e-Maŋtsɛyeli lɛ kɛtsɔ Yesu Kristo akɛ Maŋtsɛ lɛ nɔ lɛ gbɛɛ-kɛ-shwãmɔ mli. Kɛtsɔ Septuagint lɛ nɔ lɛ, ato shishitoo nii ni he hiaa ama shi kɛha Yudafoi ni wieɔ Hela lɛ kɛ Jeŋmajiaŋbii ni yɔɔ klɛŋklɛŋ afii oha lɛ mli lɛ koni amɛkpɛlɛ Maŋtsɛyeli sanekpakpa lɛ nɔ.—9/15, baafa 30.

◻ Mɛni bi nyenyeŋtswi lɛ he abɛbua lɛ tsɔɔ wɔ yɛ Nyɔŋmɔ he?

Klɛŋklɛŋ lɛ, etsɔɔ wɔ akɛ Yehowa ji “musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii.” (2 Mose 34:6) Nɔ ni ji enyɔ lɛ ji akɛ ‘eŋɔfaa mra’ yɛ be mli ni tsuitsakemɔ ko kɛ nɔdaamɔ nɔ ni akɛjieɔ mɔbɔnalɛ kpo atsɔɔ lɛ haa. (Lala 86:5)—10/1, baafa 12, 13.

◻ Mɛɛ be toiŋjɔlɛ shihilɛi ni áwo shi yɛ he yɛ Yesaia 65:21-25 lɛ mli lɛ baaba mli?

Ákɛ Yehowa jalɔi ni amɛ́fee ekome yɛ mumɔŋ paradeiso lɛ mli ŋmɛnɛ lɛ, mɛi ni afɔ amɛ mũ lɛ kɛ “tooi krokomɛi” lɛ anine miishɛ toiŋjɔlɛ ni Nyɔŋmɔ kɛha lɛ nɔ bianɛ. (Yohane 10:16) Ni toiŋjɔlɛ ni tamɔ nɛkɛ lɛ mli baakpã kɛyabote Paradeiso diɛŋtsɛ lɛ mli, beni ‘Nyɔŋmɔ suɔmɔnaa nii yaa nɔ yɛ shikpɔŋ lɛ fɛɛ nɔ taakɛ eyaa nɔ yɛ ŋwɛi lɛ.’ Yɛ nakai beaŋ lɛ, gbalɔ Yesaia wiemɔi lɛ baaná emlibaa kɛmɔ shi. (Mateo 6:10)—10/15, baafa 24.

◻ Mɛni hewɔ Kristofoi yeɔ yookpeemɔ he afi gbii juji ni amɛyeee fɔmɔ he afi gbii juji lɛ?

Biblia lɛ eteee shi ewooo gbalashihilɛ. Kɛji Kristofoi aaahala ni amɛye amɛ yookpeemɔ he afi gbi jurɔ, ní amɛkɛsusu miishɛɛ ni amɛná yɛ nakai gbi lɛ nɔ lɛ he, ní amɛkɛwo yiŋ ni amɛkpɛ lɛ mli hewalɛ, ní amɛtsu nii yɛ omanyeyeli mli akɛ gbalashihilɛ mli hefatalɔi lɛ, no lɛ, eji amɛteemɔŋ sane. Shi kɛlɛ, fɔmɔ gbi gbijurɔyelii pɛ ni yɔɔ Biblia lɛ mli lɛ ji wɔŋjalɔi anɔ, ni afee yiwalɛ nii yɛ enɛɛmɛi ashishi.—10/15, baafai 30, 31.

◻ Yɛ Paulo nɔkwɛmɔnɔ ni aŋma yɛ 1 Korintobii 3:12, 13 lɛ, mɛni “la” lɛ damɔ shi kɛha, ni mɛni esa akɛ Kristofoi fɛɛ ale?

La ko yɛ ní wɔ fɛɛ wɔkɛkpeɔ yɛ shihilɛ mli—wɔhemɔkɛyeli he kaai. (Yohane 15:20; Yakobo 1:2, 3) Abaaka mɔ fɛɛ mɔ ni wɔtsɔɔ lɛ anɔkwale lɛ akwɛ. Taakɛ Paulo bɔ kɔkɔ lɛ, kɛ́ wɔtsɔɔɔ amɛ nii jogbaŋŋ lɛ, no lɛ ekolɛ nibii ni yɔɔ awerɛho baajɛ mli aba. (1 Korintobii 3:15)—11/1, baafa 11.

◻ Noa ‘kɛ anɔkwa Nyɔŋmɔ lɛ nyiɛ’ yɛ mɛɛ gbɛ nɔ? (1 Mose 6:9)

Noa kɛ Nyɔŋmɔ nyiɛ, kɛ shishinumɔ akɛ efee nɔ ni Nyɔŋmɔ kɛɛ lɛ akɛ efee lɛ. Akɛni Noa tuu ewala eha Nyɔŋmɔ suɔmɔnaa nifeemɔ hewɔ lɛ, ená ekɛ Nyɔŋmɔ teŋ wekukpaa ni bɛŋkɛ kpaakpa ni miishɛɛ yɔɔ mli lɛ mli ŋɔɔmɔ.—11/15, baafa 10.

◻ Akɛni wɔleee be pɔtɛɛ ni Nyɔŋmɔ kɛbaatsu eweletɔɔ lɛ he nii yɛ efɔŋfeelɔi lɛ anɔ hewɔ lɛ, mɛɛ hegbɛi anaa gbeleɔ kɛhaa wɔ?

Enɛ haa wɔnáa hegbɛ ni wɔkɛaatsɔɔ akɛ wɔsumɔɔ Yehowa lɛɛlɛŋ, ni wɔmiisumɔ ni wɔnyiɛ yɛ egbɛ̀i anɔ kɛya naanɔ. Etsɔɔ hu akɛ, wɔyeɔ Nyɔŋmɔ anɔkwa ni wɔkɛ wɔhe fɔ̃ɔ gbɛ ni etsɔɔ nɔ etsuɔ saji ahe nii lɛ nɔ. Agbɛnɛ hu, eyeɔ ebuaa wɔ ni ehaa wɔhiɛ hiɔ wɔhe nɔ, ni wɔhiɛ kãa yɛ mumɔŋ. (Mateo 24:42-44)—11/15, baafa 18.

◻ Mɛni hemɔkɛyeli ni aaaná yɛ “Nyɔŋmɔ bi lɛ gbɛi anɔ” lɛ tsɔɔ? (1 Yohane 5:13)

Etsɔɔ toiboo ni aaafee aha Kristo kitai lɛ fɛɛ, ni nɔ ni fata he ji ekita ni ji ‘wɔsumɔ wɔhe’ lɛ. (Yohane 15:14, 17) Suɔmɔ taoɔ ni efee ekpakpa eha mɛi krokomɛi. Ejieɔ hewolo nɔ sui fɛɛ, jamɔi, kɛ wekui ahe jwɛŋmɔ fɔŋ namɔ kɛyaa.—12/1, baafa 7.

◻ Mɛni hewɔ Yehowa Odasefoi ji ‘mɛi ni anyɛɔ amɛ’ lɛ? (Mateo 10:22)

Anyɛɔ Yehowa Odasefoi yɛ gbɛ ni ejaaa nɔ, yɛ yiŋtoi ahewɔ ni awa mra be mli Kristofoi lɛ ayi lɛ nɔŋŋ. Klɛŋklɛŋ lɛ, Yehowa Odasefoi tsuɔ amɛjamɔ mli hemɔkɛyelii lɛ ahe nii yɛ gbɛ̀i ni haa mɛi komɛi sumɔɔɔ amɛsane lɛ anɔ. Nɔ ni ji enyɔ lɛ, amɛtsɔmɔ mɛi ni akɛ amale naafolɔmɔi shiɔ amɛ—amalei diɛŋtsɛ kɛ amɛhemɔkɛyelii lɛ ahe wiemɔi ni atsɔmɔ lɛ.—12/1, baafa 14.