Susumɔ Jamɔŋ Hegbɛ Hemɔ loo Hɔɔmɔ He!
ABUƆ Simon ni jɛ Samaria lɛ waa diɛŋtsɛ yɛ akutso mli ni eyɔɔ lɛ. Ehi shi yɛ klɛŋklɛŋ afii oha Ŋ.B. lɛ mli, ni ŋkunyaa ni eyeɔ lɛ sa gbɔmɛi atsuii ahe aahu akɛ, amɛwieɔ akɛ: “Mɔ nɛɛ ji Nyɔŋmɔ hewalɛ ni atsɛɔ lɛ kpeteŋkpele” lɛ.—Bɔfoi lɛ Asaji 8:9-11.
Shi yɛ Simon baptisimɔ ákɛ Kristofonyo lɛ sɛɛ lɛ, ebayɔse hewalɛ ni da kwraa fe nɔ ni eyɔɔ tsutsu lɛ. Eji hewalɛ ni aŋɔha Yesu bɔfoi lɛ, ni ye ebua amɛ ni amɛkɛ nikeenii ni yɔɔ naakpɛɛ ni ji mumɔ krɔŋkrɔŋ lɛ haa mɛi krokomɛi lɛ. Simon naa kpɛ ehe aahu ákɛ, ekɛɛ bɔfoi lɛ akɛ ebaaha amɛ shika, ekɛɛ akɛ: “Nyɛhaa mi hu nɛkɛ hewalɛ nɛɛ, koni mɔ fɛɛ mɔ ni mikɛ miniji aaaŋmɛlɛ enɔ lɛ ana Mumɔ krɔŋkrɔŋ lɛ.”—Bɔfoi lɛ Asaji 8:13-19.
Bɔfo Petro kã Simon hiɛ ni ekɛɛ akɛ: “Okɛ oshika lɛ fɛɛ hiɛ akpata, ejaakɛ osusuɔ akɛ, Nyɔŋmɔ nɔkeenɔ lɛ, shika akɛheɔ! Obɛ gbɛnaa loo gbɛfaŋnɔ ko yɛ nɛkɛ sane nɛɛ mli; ejaakɛ otsui ejaaa yɛ Nyɔŋmɔ hiɛ.”—Bɔfoi lɛ Asaji 8:20, 21.
Biblia mli sane nɛɛ mli ajɛ ni aná wiemɔ ni ji “simony,” ni atsɔɔ shishi akɛ “eshafeemɔ ni tsɔɔ jamɔ mli hegbɛ loo gbɛhenamɔ ni akɛ shika heɔ loo ahɔɔ.” New Catholic Encyclopedia lɛ kpɛlɛɔ nɔ akɛ, titri lɛ, kɛjɛ afii ohai 9 lɛ nɔ kɛmiibote afii ohai 11 lɛ mli nɛɛ lɛ, “jamɔ mli hegbɛ loo gbɛhenamɔ ni akɛ shika heɔ loo ahɔɔ lɛ hé shi waa yɛ mɔ kome shihilɔi ashihilɛhei, osɔfo bibii, osɔfo nukpai kɛ paapai lɛ po ateŋ.” The Encyclopædia Britannica (1878) lɛ nɔ̃ ni ji nɛɛhu nɔ lɛ ŋma akɛ: “Paapai lɛ ateemɔŋ kpeei he yinɔsane nikasemɔ haa nikaselɔ lɛ leɔ akɛ aheɔ aloo ahɔɔ hegbɛ ni akɛhaa lɛ be fɛɛ be, ni yɛ bei babaoo mli lɛ, hegbɛ ni aheɔ aloo ahɔɔ yɛ teemɔŋ kpee lɛ mli lɛ ebafee hiɛgbejianii ni yɔɔ faŋŋ ni ehiii kwraa.”
Esa akɛ anɔkwa Kristofoi ni yɔɔ ŋmɛnɛ lɛ akwɛ amɛhe nɔ jogbaŋŋ yɛ hegbɛ ni aheɔ aloo ahɔɔ lɛ he. Ákɛ nɔkwɛmɔnɔ lɛ, ekolɛ mɛi komɛi baajie mɛi ni baanyɛ aha amɛná hegbɛ ko lɛ ayi babaoo aloo amɛkekee amɛ nibii pii. Ekolɛ yɛ sanegbaa mli lɛ mɛi ni baanyɛ amɛkɛ hegbɛ ko aha lɛ baasumɔ mɛi ni yɔɔ nyɛmɔ—ni jeɔ ekãa yɛ be babaoo mli—ni amɛkeɔ amɛ nii babaoo lɛ asane. Enɛɛmɛi fɛɛ tsɔɔ hegbɛ ni aheɔ kɛ shika loo ahɔɔ, ni Ŋmalɛi lɛ guɔ nifeemɔ gbɛ ni tamɔ enɛ yɛ faŋŋ mli. Petro wo Simon hewalɛ akɛ: “Nohewɔ lɛ agbɛnɛ shwa ohe yɛ onɔsha nɛɛ hewɔ, ni okpa Nyɔŋmɔ fai, akɛ aleenɔ aaaŋɔ otsuiŋ jwɛŋmɔ [“nɛkɛ ŋaa fɔ̃ŋ nɛɛ,” New Jerusalem Bible] lɛ afao lo. Ejaakɛ mina akɛ kɔlikɔ joomɔ lɛ kɛ nɔsha kpaa lɛ mli oka nɛɛ.”—Bɔfoi lɛ Asaji 8:22, 23.
Miishɛɛ sane ji akɛ, Simon na hiɛdɔɔ ni yɔɔ nɔ fɔŋ ni etaoɔ lɛ mli. Ekpa bɔfoi lɛ fai akɛ: “Nyɛ diɛŋtsɛ nyɛkpaa [Yehowa, NW] fai nyɛhaa mi, koni nibii ni nyɛwie nɛɛ eko akaba minɔ.” (Bɔfoi lɛ Asaji 8:24) Kɛ anɔkwa Kristofoi kɛ nikasemɔ ni he hiaa ni yɔɔ sane nɛɛ mli lɛ tsu nii lɛ, amɛbaabɔ mɔdɛŋ waa ni amɛtsi amɛhe kɛjɛ hegbɛ ni akɛ shika heɔ aloo ahɔɔ lɛ he kwraa yɛ gbɛ fɛɛ gbɛ nɔ.