“Namɔ kɛ Nilee Wo Sabai Amli”?

“KƐ NYƐNA atatu miiwo yɛ anai lɛ, amrɔ lɛ nyɛkɛɔ akɛ: Nyɔŋmɔ baanɛ; ni ebaa mli nakai; ni kɛ́ wuoyi kɔɔyɔɔ miitswa lɛ, nyɛkɛɔ akɛ: Latsaa baaba; ni ebaa mli.” Nɛkɛ Yesu wiemɔi nɛɛ, ní Sanekpakpa ŋmalɔ Luka ŋma lɛ ji kɔɔyɔŋ tsakemɔ he saji ni agbaa afɔ̃ɔ shi lɛ he nɔkwɛmɔnii taakɛ akɛha yɛ blema Palestina lɛ. (Luka 12:54, 55) Yɛ shihilɛi komɛi amli lɛ, blemabii lɛ nyɛɔ amɛbuɔ okadii lɛ ni amɛgbaa ehe saji ni ja yɛ be kukuoo mli amɛfɔ̃ɔ shi.

Ŋmɛnɛ, kɔɔyɔŋ tsakemɔ he nilelɔi kɛ tsɔji ni yɔɔ ŋwanyaŋŋ tamɔ ŋulamii bibii ni gbɔmɛi efee ni bɔleɔ shikpɔŋ lɛ nɔ, rada loo Tsɔne ni kɛ Kɔɔyɔŋ Hewalɛ tsuɔ nii ni haa akɛ mɔ ko yeɔ sharamɔ, kɛ kɔmpiutai wuji tsuɔ nii ni amɛkɛ naa kɔɔyɔɔ shikamɔ yɛ be kakadaŋŋ mli. Shi bei pii lɛ, nɔ ni amɛgbaa amɛfɔ̃ɔ shi lɛ ejaaa. Mɛni hewɔ?

Nibii babaoo haa kɔɔyɔŋ tsakemɔ he saji ni ja ni aaagba afɔ̃ shi lɛ waa. Ákɛ nɔkwɛmɔnɔ lɛ, kɔɔyɔŋ tsakemɔi, latsaa, kɔɔyɔŋ hewalɛ kɛ foi ni kɔɔyɔɔ lɛ kɛtswaa kɛ he ni etswaa kɛyaa lɛ baanyɛ aha nibii amli awo wu. Nɔ ni fata enɛ he ji hulu lɛ, atatui lɛ, kɛ ŋshɔ lɛ anifeemɔi ni yɔɔ ŋwanyaŋŋ, ní jeŋ nilelɔi lɛ nuuu shishi jogbaŋŋ lɛ. Yɛ enɛ hewɔ lɛ, kɔɔyɔŋ tsakemɔ he saji ni agbaa afɔ̃ɔ shi lɛ kã he eji jeŋ nilee ni ejaaa.

Adesai anilee yɛ kɔɔyɔŋ tsakemɔi ahe ni faaa lɛ kaiɔ wɔ saji ni abi Hiob lɛ akɛ: “Namɔ fɔ bɔ́ kulibii lɛ hu? Namɔ musu mli nutɛ jɛ? . . . Ani bo owoɔ ogbee nɔ kɛyaa atatuiaŋ, ni nu afua bahaa ohe lɛ? . . . Namɔ kɛ nilee wo sabai amli? loo namɔ kɛ jwɛŋmɔ wo yitsoŋ? Namɔ nyɛɔ kaneɔ atatui kɛ nilee? Ni ŋwɛi tɔi lɛ, namɔ kpoɔ amɛnaa shi?”—Hiob 38:28-37.

Sane hetoo kɛha sanebimɔi nɛɛ fɛɛ ji, Jeee gbɔmɔ shi Yehowa Nyɔŋmɔ. Hɛɛ, ekɔɔɔ he eko bɔ ni adesai anilee baatamɔ aha lɛ, wɔ-Bɔlɔ lɛ nilee lɛ nɔ kwɔ fe fɛɛ. Eji nɔ ni suɔmɔ yɔɔ mli yɛ egbɛfaŋ akɛ ekɛ enilee lɛ eha wɔ yɛ Biblia mli baafai lɛ amli, bɔni afee ni wɔnyɛ wɔha wɔgbɛ lɛ aye omanye.—Abɛi 5:1, 2.