“Nibii Babaoo yɛ ni Wɔ ni Ji Katolikbii lɛ Baakase Kɛjɛ Amɛdɛŋ”

TSƆƆLƆ ko ni yɔɔ Bari yɛ Italy lɛ ji mɔ ni wie enɛ yɛ Yehowa Odasefoi ahe, beni etsɔɔ klasbii ni yɔɔ nɔtsamɔ skul ko mli lɛ jamɔ he yinɔsane he nii lɛ. Tsɔɔlɔ lɛ ekɛɛ klasbii lɛ akɛ ekɛ vidio kasɛtii baatsɔɔ nii. Beni nikaselɔi lɛ ateŋ mɔ kome, Roberto ni eye afii 18 lɛ nu enɛ lɛ, ebi koni akɛ ejamɔ lɛ he sanegbaa afata he. Ekɛ Jehovah’s Witnesses—The Organization Behind the Name vidio lɛ ha lɛ. Ekpɛlɛ Roberto nibimɔ lɛ nɔ, ni klasbii ni amɛ fɛɛ amɛyibɔ aaashɛ 30 lɛ kwɛ vidio lɛ. Roberto kɛɛ: “Amɛ fɛɛ amɛná ekomefeemɔ, gbɛjianɔtoo lɛ, kɛ suɔmɔ ni mli kwɔ ni yɔɔ Yehowa Odasefoi ateŋ lɛ he miishɛɛ waa. Amɛnaa kpɛ amɛhe waa po akɛ amɛaale akɛ akalaa Buu-Mɔɔ ekomekomei akpekpei 40 kɛ Awake! lɛ ekomekomei akpekpei 36 daa nyɔŋ nɔ.”

Beni akwɛ vidio lɛ agbe naa lɛ, Roberto klasbii lɛ ateŋ mɛi babaoo kɛɛ akɛ: “Misusuko he pɛŋ akɛ ato nyɛ he gbɛjianɔ waa nakai.” Tsɔɔlɔ lɛ wie Yehowa Odasefoi ahe etsɔɔ klasbii lɛ akɛ: “Nyɛkwɛa bɔ ni amɛhemɔkɛyeli tsirɛɔ amɛ koni amɛfee ekome ni eha amɛfee mɛi ni ato amɛhe gbɛjianɔ waa nakai lɛ. Nibii babaoo yɛ ni wɔ ni ji Katolikbii lɛ baakase kɛjɛ amɛdɛŋ.” Vidio lɛ kɛ klas sanegbaa ni nyiɛ sɛɛ lɛ tsu babaoo koni eha anu Yehowa Odasefoi ashishi jogbaŋŋ.