Ani Osɔfoi Fɛɛ Heɔ Nɔ ni Amɛtsɔɔ lɛ Amɛyeɔ?
YOO lɛ wu gbo etsɛko. Osɔfo lɛ tsɔɔ mli akɛ ewu lɛ efeko ekpakpa bɔ ni sa ni no baaha eya ŋwɛi tɛ̃ɛ, ni asaŋ efeko efɔŋ ko hu tsɔ̃ ni no baaha akɛ lɛ ayawo hɛl la mli. No hewɔ lɛ, nɔ ni osɔfo lɛ tsɔɔ ji akɛ, aapiŋ lɛ koni akɛgbala etoi kɛyashi be mli ni ebaatsɔ mɔ ni sa kɛha ŋwɛiyaa. Yoo lɛ ha osɔfo lɛ shika koni anyɛ ajie ewu lɛ mra kɛjɛ hetsuumɔhe lɛ. Enɛ ha yoo okulafo lɛ tsui nyɔ emli, ejaakɛ enuɔ he akɛ osɔfo lɛ kpɛlɛɔ anɔkwale hemɔkɛyeli ni eyɔɔ lɛ nɔ.
Ani osusuɔ akɛ abaanyɛ alaka okulafo lɛ kɛji ená ele akɛ osɔfo lɛ heee toigbalamɔ yɛ gbele sɛɛ eyeee diɛŋtsɛ? Sane lɛ gbaa mɛi pii anaa kɛ́ amɛná amɛle akɛ osɔfoi babaoo heee nibii pii ní amɛ diɛŋtsɛ amɛtsɔɔ lɛ amɛyeee lɛ. Beni National Catholic Reporter lɛ wieɔ nɔ ni atsɛɔ lɛ akɛ “osɔfoi lɛ anaagba ko ni mli wa fe bɔlɛnamɔ mli jeŋba shara lɛ” he lɛ, ekɛɛ akɛ: “Yɛ osɔfoi lɛ titri ateŋ lɛ, amɛteŋ mɛi pii heee amɛyeee dɔŋŋ akɛ Nyɔŋmɔ yɛ, aloo amɛheee tsɔɔmɔ ni kɔɔ nyɔmɔwoi kɛ toigbalamɔi aloo gbohiiashitee lɛ amɛyeee . . . ni ákɛ, osɔfoi lɛ anifeemɔ hiɛ nɛkɛ nii ni aheee ayeee nɛɛ mli akɛ amɛshihilɛ mli nifeemɔ lɛ fã, tamɔ afua ni mli ti waa.”
Sɔlemɔi krokomɛi kɛ naagba ni tamɔ nakai nɔŋŋ miikpe. Niiamlitaomɔ ko ni afee yɛ Church of England osɔfoi lɛ ateŋ ni Australia Canberra Times lɛ bɔ he amaniɛ lɛ tsɔɔ akɛ, amɛteŋ “mɛi pii heee shishijee nibii ni kɔɔ Kristofoi ahemɔkɛyeli lɛ he ní akɛtsu nii kɛjɛ blema lɛ amɛyeee, nibii tamɔ oblayoo fro ni fɔ́ lɛ nɛkɛ, Yesu naakpɛɛ nifeemɔi lɛ, kɛ mesia lɛ baa ni ji enyɔ lɛ.”
George R. Plagenz, ni ji jamɔ he niŋmalɔ lɛ bi sane ni kɔɔ osɔfo ko he akɛ, te eeefee tɛŋŋ ejɛ henilee kpakpa mli ejaje akpɔ ko ni lɛ diɛŋtsɛ lɛ eheee eyeee lɛ. Osɔfo ko kɛɛ akɛ ekɛ wiemɔ ni ji “Miheɔ miyeɔ” lɛ toɔ wiemɔ ni akɛyeɔ akpɔ ni awo lɛ najiaŋ kɛkɛ. Ekɛɛ akɛ: “Mijeɔ sanejajemɔ lɛ shishi kɛtsɔɔ enɛ kɛɛmɔ nɔ akɛ, ‘AMƐHEƆ Nyɔŋmɔ, ni ji Tsɛ Ofe lɛ amɛyeɔ . . .’ ” Plagenz tsɛ osatofeemɔ nifeemɔ ni tamɔ nɛkɛ akɛ, “shishiumɔ wulu ni fe fɛɛ ni yɔɔ maŋ lɛ mli.”
Mɔbɔ sane ji akɛ, nibii ni osɔfoi lɛ heee amɛyeee, kɛ anɔkwa ni amɛyeee lɛ elaka gbɔmɛi pii yɛ nɔ ni kɔɔ jamɔ he titri. Shi jeee no pɛ ji nii ni gbaa mɔ naa ŋmɛnɛ yɛ jamɔ he. Átsɔɔ sɔlemɔyalɔi pii akɛ Biblia lɛ ji Nyɔŋmɔ Wiemɔ. Ani ebaafee amɛ naakpɛɛ akɛ amɛaale akɛ tsɔɔmɔi komɛi ní ákpɛlɛ nɔ aahu yɛ sɔlemɔ lɛ mli lɛ bɛ Biblia lɛ mli? Sane ni nyiɛ sɛɛ lɛ baasusu emli ekome he.