Gbɛ Kadimɔnii yɛ Wala Gbɛ lɛ Nɔ

KƐ OOFÃ gbɛ yɛ gbɛ loo nane gbɛ ko ni oleee nɔ lɛ, ani obaabu gbɛ kadimɔnii akɛ gbɛtsii nii? Enyɛŋ efee nakai! Eka shi faŋŋ akɛ obaabu amɛ akɛ yelikɛbuamɔ nii ni baaye abua bo koni okaje gbɛ ni yaa he ni oyaa lɛ nɔ.

Ni kɛlɛ, wala gbɛ lɛ nɔ gbɛfaa hu? Ani abaanyɛ aye omanye ni gbɛ kadimɔnii bɛ mli? Nyɔŋmɔ blema gbalɔ ko na adesai ahusui yɛ enɛ gbɛfaŋ. Ekɛɛ akɛ: “Mile, O NUNTSƆ, akɛ adesai nyɛŋ ahala amɛ diɛŋtsɛ amɛgbɛ; ni adesa nyɛŋ atsɔɔ eshihilɛ gbɛ.”—Yeremia 10:23, The New English Bible.

Belɛ, nɛgbɛ abaanyɛ aná gbɛtsɔɔmɔ ni he hiaa lɛ yɛ? Gbɛtsɔɔmɔ ni tamɔ nɛkɛ jɛɛhe ni anyɛɔ akɛhe fɔ̃ɔ nɔ ji adesai a-Bɔlɔ lɛ, ni abaanyɛ ana mfonirifeemɔ gbɛ kadimɔnii lɛ yɛ Biblia lɛ mli. Yehowa wie kɛtsɔ e-Wiemɔ lɛ nɔ akɛ: “Otoii hu aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ jio, abɛkugbɛ nyɛtsɔ jio.”—Yesaia 30:21.

Hɛɛ, Nyɔŋmɔ Wiemɔ lɛ kɛ gbɛtsɔɔmɔ ni anyɛɔ akɛ he fɔ̃ɔ nɔ haa yɛ wɔ shihilɛ mli nɔ fɛɛ nɔ mli. (Yesaia 48:17; 2 Timoteo 3:16, 17) Shi, mɔbɔ sane ji akɛ, adesai babaoo fãa wala gbɛ lɛ ni amɛtaooo ŋwɛi gbɛtsɔɔmɔ. (Mateo 7:13) Shi kɛlɛ, akɛ gbɛ kadimɔnii lɛ emamɔ shi jogbaŋŋ ni anyɛɔ anaa faŋŋ! Ani obaafee toiboo oha amɛ yɛ be mli ni onyiɛɔ wala gbɛ lɛ nɔ lɛ?