Biblia Hee ko Yɛ Ŋmɛnɛŋmɛnɛ Beaŋ Hela Wiemɔ Mli

AUGUST 23, 1997 lɛ ji kpee krɛdɛɛ ko kɛha mɛi ni ebua amɛhe naa yɛ “Nyɔŋmɔ Wiemɔ Mli Hemɔkɛyeli” Kpokpaa Wulu nɔ Kpee lɛ shishi yɛ Greece. Shwane gbɛjianɔtoo lɛ naagbee mli lɛ, ajie Biblia hee ko kpo—ni ji New World Translation of the Holy Scriptures yɛ ŋmɛnɛŋmɛnɛ beaŋ Hela wiemɔ mli. Toibolɔi ni naa ekpɛ amɛhe lɛ kɛ miishɛɛ yaafonui kɛ dɛtswaa ni sɛɛ tsɛ here nɔ amrɔ nɔŋŋ!

Kɛjɛ afi 1905 lɛ, Yehowa Odasefoi kɛ afii ohai 19 mli lɛ Biblia shishitsɔɔmɔ ko ni Greek Ortɔdɔks osɔfo ko fee lɛ miitsu nii. Nɛkɛ Biblia nɛɛ he ba sɛɛnamɔ waa kɛha amɛ afii babaoo. Ni kɛlɛ, yɛ be ko sɛɛ lɛ, Yehowa Odasefoi nu he akɛ ehe miihia koni aná Biblia shishitsɔɔmɔ ko ni ja jogbaŋŋ ni shishinumɔ waaa. Yɛ afi 1993 lɛ, amɛná miishɛɛ beni amɛnine shɛ New World Translation of the Christian Greek Scriptures Hela shishitsɔɔmɔ lɛ nɔ lɛ. Shi kɛlɛ, amrɔ nɛɛ, amɛmiishɛɛ lɛ da waa diɛŋtsɛ beni amɛnine shɛ Biblia muu lɛ fɛɛ nɔ yɛ ŋmɛnɛŋmɛnɛ beaŋ Hela wiemɔ mli lɛ.

Odasefonyo ko ni ná hiɛsɔɔ lɛ tsɛ́ New World Translation lɛ akɛ “lalafoo wiemɔ ko, kɔɔyɔɔ ŋmaii ko ni hiɛɔ Yehowa gbee, nɔ ni wɔbaanyɛ wɔnu shishi jogbaŋŋ yɛ wɔ diɛŋtsɛ wɔ wiemɔ mli klɛŋklɛŋ kwraa.” Mɛi komɛi bɔi amɛ Biblia hee lɛ kanemɔ yɛ be mli ni amɛyashɛ shia nɔŋŋ. Kpeeiyalɔi lɛ ateŋ mɔ kome ni ná miishɛɛ lɛ kɛ e-Biblia lɛ efɔɔɔ shi kɛyashi leebi ŋmɛlɛ kome mli, yɛ be mli ni egbe Hiob wolo muu lɛ fɛɛ kanemɔ naa sɛɛ!

New World Translation of the Holy Scriptures yɛ Hela wiemɔ mli lɛ ji nɔ ni jɛ nitsumɔ dɛŋdɛŋ ni akɛ nɔ ni shɛɔ afii kpawo tsu lɛ mli kɛba. Wolo ko ni nine shɛ nɔ lɛ kɛɛ akɛ: “Obaanyɛ oná nɔmimaa akɛ New World Translation lɛ baaye abua wɔ waa diɛŋtsɛ yɛ gbɔmɛi kpakpai ni wɔɔye wɔbua amɛ koni amɛkase Yehowa he nii lɛ mli.”