Nitsumɔ ni “Baanyɛ Atee Bulɛ Shi yɛ Gbɛ Fɛɛ Gbɛ Nɔ”

BƆFO Petro wo enanemɛi Kristofoi lɛ ŋaa akɛ: “Nyɛba nyɛjeŋ jogbaŋŋ yɛ jeŋmajiaŋbii lɛ ateŋ, koni nɔ mli ni amɛwieɔ nyɛhe yɛ akɛ efɔŋfeelɔi lɛ, nyɛnitsumɔi kpakpai lɛ ni amɛnaa lɛ amɛkɛwo Nyɔŋmɔ hiɛ nyam, yɛ saramɔ gbi lɛ nɔ.” (1 Petro 2:12) Yehowa Odasefoi ni yɔɔ Italy lɛ kɛ afii babaoo ejie nɛkɛ jeŋba kpakpa nɛɛ kpo faŋŋ yɛ maŋ. Yɛ mumɔ ni yɔɔ Yesu famɔ akɛ “nyɛshiɛaa yɛ tsũi ayiteŋ” lɛ kɛ gbee kpãmɔ naa lɛ, amɛtsuɔ amɛ Kristofoi anitsumɔ lɛ fɛɛ yɛ faŋŋ mli, yɛ maŋ fɛɛ hiɛ. (Mateo 10:27; Yohane 18:20) No hewɔ lɛ, beni Italynyo mla he nitsulɔ ko kɛ osɔfo ko kɛ amale naafolɔmɔ ŋma akɛ Yehowa Odasefoi lɛ ji “apasa jamɔ kuu” ni amɛbu amɛ ashi “teemɔŋ kui ni tsɔɔ gbɔmɛi tsɔne” lɛ nɔ lɛ, Odasefoi lɛ kpɛ amɛyiŋ akɛ amɛkɛ amɛ baaye yɛ mla naa yɛ heguɔgbee wiemɔi lɛ hewɔ.

Yɛ klɛŋklɛŋ saneyeli lɛ mli lɛ, saneyelihe lɛ mu naa akɛ mla he nitsulɔ lɛ kɛ osɔfo lɛ tɔ̃ko mla ko nɔ. Ni kɛlɛ, yɛ July 17, 1997 lɛ, Venice Court of Appeals lɛ te shi eshi klɛŋklɛŋ saneyelihe lɛ yiŋkpɛɛ lɛ, ni ebu mɛi enyɔ ni asama lɛ fɔ́. Court of Appeals lɛ wie akɛ: “Nɔ ni yɔɔ saji enyɔ ni aŋmala ni asusuɔ he lɛ mli lɛ ji wiemɔi kɛ wiemɔi kukuji ni baanyɛ afite mɛi ni nyiɛ ‘Yehowa Odasefoi’ ajamɔ lɛ sɛɛ lɛ bulɛ. Etamɔ nɔ ni eyɛ faŋŋ akɛ, yiŋtoo ni yɔɔ saji lɛ amli ji koni ejie esɛɛnyiɛlɔi lɛ eha maŋ heguɔgbee.” Saneyelihe lɛ jaje akɛ sane ni aŋmala lɛ “bɛ mla naa hegbɛ akɛ ebɔɔ nii ahe amaniɛ, ni ewieɔ eshiɔ lɛ nɔ.” Saneyelihe lɛ bɔ heguɔgbelɔi enyɔ lɛ toigbalamɔ shika he nyɔmɔ ni efã hu koni amɛwo saneyelihe he nyɔji fɛɛ, ni nɔ ni fata he ji saneyeli lɛ he nyɔji fɛɛ ni Odasefoi lɛ bɔ yɛ saji enyɔ lɛ fɛɛ mli lɛ.

Yɛ ekojomɔ ni aŋma afɔ̃ shi lɛ mli lɛ, Venice Court of Appeals lɛ wie akɛ: “Ja aŋmɛ pɛpɛɛpɛ ni abu hegbɛi fɛɛ ni akɛha yɛ [Italy] Mlawoo He Gbɛjianɔtoo lɛ mli lɛ he, dani abaanyɛ atsĩ basabasafeemɔ kɛ jamɔ he sɛkɛyeli ni baa yɛ gbɛ̀i srɔtoi anɔ lɛ naa.” Yiŋkpɛɛ lɛ jaje akɛ, Yehowa Odasefoi lɛ anitsumɔ lɛ jeee teemɔŋ nɔ loo apasa jamɔ nifeemɔ. Saneyelihe lɛ wie akɛ, “Ní aaabu Odasefoi lɛ ashi teemɔŋ kui komɛi anɔ lɛ etsɔɔɔ akɛ abuɔ yinɔsane mli anɔkwalei, ejaakɛ jamɔ lɛ yɛ maji babaoo mli ni ale hemɔkɛyeli tsakemɔ nitsumɔ ni egbɛ eshwã ni emlibii lɛ tsuɔ, titri lɛ yɛ Hɔgbaa kɛ hejɔɔmɔ gbii krokomɛi anɔ lɛ jogbaŋŋ, ni ebaanyɛ etee bulɛ shi yɛ gbɛ fɛɛ gbɛ nɔ yɛ mɔdɛŋ ni amɛbɔɔ lɛ hewɔ, yɛ nɔ fɛɛ nɔ ni ekolɛ mɔ ko baasusu yɛ tsɔɔmɔ ni amɛshiɛɔ lɛ he lɛ mli.” No hewɔ lɛ, ekãa ni Yehowa Odasefoi ni yɔɔ Italy lɛ kɛshiɛɔ kɛ jeŋba he nɔkwɛmɔnɔ kpakpa ni amɛfee ni aŋmala ashwie shi lɛ eye ebua ni akɛjie jwɛŋmɔ gbonyo ni ahiɛ yɛ amɛhe lɛ.—Mateo 5:14-16; 1 Petro 2:15.