Maŋtsɛyeli Jajelɔi Bɔ Amaniɛ

Ní Aaajɛ Heshibaa Mli ni Akɛ Yehowa Gbɛ lɛ Akpã Gbee

“NYƐTAOA Yehowa sɛɛgbɛ, nyɛ shikpɔŋ lɛ nɔ heshibalɔi fɛɛ.” Aakpã nɛkɛ ninefɔ̃ɔ ni Hebri gbalɔ Zefania jaje aaafee afii ohai 26 ni eho nɛ lɛ mli lolo aaha gbɔmɛi fɛɛ yɛ shikpɔŋ lɛ nɔ ŋmɛnɛ. (Zefania 2:3) Yehowa sɛɛgbɛ ni aaatao lɛ tsɔɔ mɛni? Nɔ ni akɛjeɔ enɛ feemɔ shishi ji, ni aaaná Yehowa, anɔkwa Nyɔŋmɔ koome ni hiɛ kã lɛ he nilee.—Yeremia 10:10; Yohane 17:3.

Shi kɛlɛ, jeee nilee ni aaaná lɛ diɛŋtsɛ ji nɔ ni haa Nyɔŋmɔ kpɛlɛɔ mɔ ko nɔ. Bɔni afee ni mɔ ko aná Nyɔŋmɔ nɔkpɛlɛmɔ lɛ, esa akɛ mɔ lɛ kɛ nilee lɛ atsu nii hu. Yɛ mɛɛ gbɛ nɔ? Kɛtsɔ heshibaa mli ni mɔ lɛ aaajɛ ni eha esusumɔ kɛ ejeŋba kɛ Nyɔŋmɔ tɛi ni efolɔ lɛ akpã gbee lɛ nɔ, taakɛ niiashikpamɔ ni nyiɛ sɛɛ ni jɛ Suriname lɛ tsɔɔ lɛ.—Efesobii 4:22-24.

Eddy ni ji skul tsɔɔlɔ ni eye kɛjɛ afii 30 kɛyaa lɛ ekpa gbɛ aahu akɛ eeená hetoo eha sanebimɔi tamɔ: ‘Mɛɛ gbɛhe he nii jamɔ tsuɔ yɛ ŋmɛnɛŋmɛnɛ shihilɛ mli?’ kɛ ‘Ani Biblia lɛ, ni ji blema wolo ko lɛ, kɛ ŋmɛnɛŋmɛnɛ jeŋ nilee kpãa gbee?’ Beni Yehowa Odasefoi tee Eddy ŋɔɔ ni amɛha esanebimɔi lɛ ahetoo kɛjɛ Biblia lɛ mli lɛ, ebo toi jogbaŋŋ. Eŋmala nibii po eshwie shi, bɔni afee ni ekwɛ akɛ sanemlitsɔɔmɔi ni Odasefoi lɛ kɛha lɛ ja lo.

Tsutsu ko lɛ Eddy kɛ jamɔ ko bɔɔ, ni amɛtsɔɔ akɛ, aduŋ ni Nyɔŋmɔ fee, ni tsake ehe lɛ mli ajɛ aná adesai. No hewɔ lɛ, beni Odasefoi lɛ kɛ wolo ni ji Life—How Did It Get Here? By Evolution or by Creation? lɛ ha lɛ lɛ, ehe amrɔ nɔŋŋ. Ená adebɔɔ he saji ni yɔɔ Biblia lɛ mli ni wolo lɛ egbala mli jogbaŋŋ lɛ he miishɛɛ waa. Kɛtsɔ Biblia lɛ ni ekase lɛ nɔ lɛ, ekpɛlɛ nɔ akɛ ena anɔkwale lɛ!

Shi agbɛnɛ ekɛ kaa kpe. Eddy hi shia ko mli ni juu kɛ amale ji amɛshihilɛ gbɛ. Enɛ hewɔ lɛ, akɛ nihalamɔ efɔ̃ ehiɛ: ákɛ eeenyiɛ mɛi ni ekɛyɔɔ tsũ kome mli lɛ ashihilɛ gbɛ fɔŋ lɛ sɛɛ aloo ekpoo jeŋba ni tamɔ nakai koni eba ejeŋ bɔ ni baawo Nyɔŋmɔ hiɛ nyam. Eddy kɛ nilee tsu nii, ni ehala sɛɛkpee nɔ lɛ. Ekɛ nanemɛi fɔji lɛ fɛɛ kpa bɔɔ, ni efã yɛ shia lɛ.—1 Korintobii 15:33, 34.

Eddy tee hiɛ oyayaayai, yɛ sɛɛ mli beni ebɔi kpeeiyaa yɛ Maŋtsɛyeli Asa lɛ nɔ lɛ. Etee hiɛ hu yɛ etadewoo kɛ hesaamɔ mli, ni ekɛ enanemɛi kɛ ewekumɛi bɔi anɔkwale lɛ he sanegbaa. Sɛɛ mli lɛ, emiishɛɛ lɛ bada beni akpɛlɛ enɔ akɛ ená “sanekpakpa” shiɛmɔ nitsumɔ lɛ mli gbɛfaŋnɔ yɛ maŋ lɛ mli lɛ. (Mateo 24:14; Bɔfoi lɛ Asaji 20:20) Yɛ December 1996 mli lɛ, gbi ní ekpa lɛ gbɛ aahu lɛ bashɛ, beni efee ehenɔjɔɔmɔ kɛha Yehowa lɛ he okadi kɛtsɔ nu mli baptisimɔ nɔ lɛ.

Daa afi lɛ, gbɔmɛi akpei ohai abɔ ni hiɛ tsui kpakpa hereɔ ninefɔ̃ɔ akɛ ‘atao Yehowa sɛɛgbɛ’ lɛ nɔ. Yɛ nakai feemɔ mli lɛ amɛnaa bɔ ni Abɛi 22:4 lɛ ji anɔkwale ha, he ni kɛɔ akɛ: “Heshibaa kɛ Yehowa gbeyeishemɔ nyɔmɔwoo ji nii kɛ hiɛnyam kɛ wala.” Hɛɛ, kɛtsɔ heshibaa mli ni mɛi ni sumɔɔ anɔkwale lɛ jɛɔ amɛkɛ Yehowa gbɛ lɛ kpãa gbee lɛ nɔ lɛ, amɛnáa jɔɔmɔi ni tamɔ nakai amli ŋɔɔmɔ, ni amɛkɛ ekãa kpaa naanɔ jɔɔmɔi agbɛ yɛ biɛ yɛ shikpɔŋ lɛ nɔ.—Lala 37:29.

[Shikpɔŋ he mfonirii babaoo ni yɔɔ baafa 18]

(For fully formatted text, see publication.)

Caribbean Ŋshɔ

SURINAME

GUYANA

FRENCH GUIANA

BRAZIL

[He ni Sane lɛ Jɛ]

Shikpɔŋ kokoroo: Gɔŋ Kwɔlɛ Shikpɔji Ahe Mfoniri® Copyright © 1997 Digital Wisdom, Inc.