Ani Maria Gbo Kɛtsɔ Adebɔɔ Mli Nibii Anɔ?

TAAKƐ Vatican adafitswaa wolo L’Osservatore Romano tsɔɔ lɛ, Katolik tsɔɔmɔ ni kɔɔ Maria Ŋwɛiyaa yɛ heloo mli lɛ he lɛ kɛɔ akɛ: “Ashá Oblayoo Fro ni Esha Bɛ Ehe, ni abaa eyi ni shishijee esha he okadi ko bɛ ehe lɛ kɛtee ŋwɛi anunyam mli yɛ gbɔmɔtso kɛ susuma mli beni egbe eshikpɔŋ nɔ shihilɛ lɛ naa lɛ.” Wolo lɛ kɛɛ akɛ nɛkɛ tsɔɔmɔ nɛɛ eha Katolik Nyɔŋmɔ jamɔ he nilelɔi etsɔɔ akɛ Maria “gbooo ni awo enɔ amrɔ nɔŋŋ kɛjɛ shikpɔŋ nɔ shihilɛ mli kɛtee ŋwɛi anunyam mli.”a

Nyɛsɛɛ nɛɛ, Paapa John Paul II tsɔɔ sane lɛ mli yɛ gbɛ srɔto ko nɔ. Ewie yɛ Toibolɔi Babaoo ahiɛ yɛ Vatican yɛ June 25, 1997 mli akɛ: “Kpaŋmɔ Hee lɛ kɛ adafitswaa ko haaa yɛ shihilɛi amli ni Maria gbo yɛ lɛ he. Nɛkɛ dioofeemɔ nɛɛ haa mɔ ko susuɔ akɛ eba yɛ adebɔɔ naa, ni ehe ehiaaa ni atsĩ sane titri ko tã. . . . Etamɔ nɔ ni jwɛŋmɔi ni ahiɛ ni taoɔ atsɔɔ akɛ egbooo kɛtsɔ adebɔɔ mli nibii anɔ lɛ bɛ nɔdaamɔ nɔ̃.”

Paapa John Paul wiemɔ lɛ jieɔ tɔ̃mɔ ni hiɛdɔɔ yɔɔ mli kpo yɛ Hɔŋɔɔ ni Esha Bɛ He lɛ he tsɔɔmɔ ni abiii he sane lɛ he. Kɛ “abaa” Yesu nyɛ “yi ni shishijee esha he okadi bɛ ehe lɛ,” te fee tɛŋŋ ni Maria gbo “kɛtsɔ adebɔɔ mli nibii” ni jɛɔ esha ni aná kɛjɛ Adam esha lɛ mli lɛ “anɔ”? (Romabii 5:12) Nɛkɛ Nyɔŋmɔ jamɔ he yiŋkɔshikɔshifeemɔ nɛɛ ba lɛ nakai yɛ Yesu nyɛ he jwɛŋmɔ ni ejaaa ni Katolik Sɔlemɔ lɛ hiɛ lɛ hewɔ. Ebɛ naakpɛɛ akɛ mligbalamɔ kɛ yiŋfutumɔ ete shi yɛ Katolik Sɔlemɔ lɛ mli yɛ sane lɛ he.

Yɛ be mli ni Biblia lɛ wieɔ Maria he akɛ eji mɔ ni baa ehe shi, anɔkwafo, kɛ mɔ ni kɛ ehe eha Nyɔŋmɔ jamɔ kwraa lɛ, ewieee sui nɛɛ ahe akɛ ekɔɔ “hɔŋɔɔ ni esha bɛ mli” he. (Luka 1:38; Bɔfoi lɛ Asaji 1:13, 14) Biblia lɛ kɛɔ kuku akɛ: “Mɛi fɛɛ efee esha, ni Nyɔŋmɔ anunyam lɛ ebɔ amɛ.” (Romabii 3:23) Hɛɛ, Maria ná esha kɛ emuu ni ayeee taakɛ adesai fɛɛ ni eshwɛ lɛ ná lɛ, ni odaseyeli ko bɛ ni tsɔɔ akɛ egbooo kɛtsɔɔɔ adebɔɔ mli nibii anɔ.—Okɛto 1 Yohane 1:8-10 he.

[Shishigbɛ niŋmai]