Ani Owiemɔ Dũmɔɔ Mɔ, Aloo Etsaa mɔ?

YƐ BEI ni mli wawai nɛɛ amli lɛ, ebɛ naakpɛɛ kwraa akɛ gbɔmɛi pii ‘atsui ekumɔ,’ ni ‘amɛmumɔ tswiaa shi kɛ dɔlɛ.’ (Lala 34:19 ) No hewɔ lɛ, yɛ bɔfo Paulo wiemɔi lɛ amli lɛ, ehe miihia ni be fɛɛ be lɛ, ‘ashɛje mɛi ni tsui fãa lɛ amii,’ ni ‘ahere mɛi ni feɔ gbedee’ lɛ. (1 Tesalonikabii 5:14) Shi kɛ wɔnaanyo gbɔmɔ tɔ̃ wɔnɔ aloo efee wɔ efɔŋ ko ni hiɛdɔɔ yɔɔ mli hu? Yɛ shihilɛ ni tamɔ nɛkɛ mli lɛ, wɔbaanu he akɛ wɔsane ja kɛ́ wɔkɛ mɔ lɛ ye yɛ mlifu mli. Kɛlɛ, esa akɛ wɔkwɛ jogbaŋŋ. Ŋaawoo ni sa po baanyɛ aye awui, kɛ akɛha yɛ mlifu gbɛ nɔ. Abɛi 12:18 kɛɔ akɛ: “Mɔ ko yɛ ni wieɔ bambam, tamɔ adũmɔɔ klante.”

No hewɔ lɛ, kɛ wɔje shishi akɛ wɔɔjaje mɔ ko aloo wɔɔtsu bei ko he nii lɛ, ehe miihia koni wɔkai Abɛi 12:18 lɛ fã ni ji enyɔ lɛ, akɛ: “Nilelɔ lilɛi tsaa mɔ.” Daa nɛɛ bi ohe akɛ, ‘Kɛ ehe miihia koni ajaje mi lɛ, te masumɔ ni akɛ mi aye aha tɛŋŋ?’ Wɔteŋ mɛi pii boɔ hewalɛwoo toi fe nii ahe wiemɔ. No hewɔ lɛ feemɔ mɔ ni fɔɔ mɔ yijiemɔ. Bei pii lɛ enɛ woɔ nɔtɔ̃lɔ lɛ ekãa koni eya hiɛ, ni ekolɛ ebaada shi waa kɛha yelikɛbuamɔ fɛɛ ni akɛaaha.

Kwɛ bɔ ni ehe hiaa be fɛɛ be akɛ wɔkɛ mlijɔlɛ nifeemɔ aaawo wɔwiemɔi amli! Ekolɛ tsamɔ wiemɔi baaha toibolɔ lɛ anu he taakɛ lalatsɛ lɛ nu he ha lɛ pɛpɛɛpɛ, mɔ ni ŋma akɛ: “Ha jalɔ agba mi mã kɛ mlihilɛ ni ekã mi, yiteŋmu ji no ni miyitso kwaaa.”—Lala 141:5.