Jeŋba Kpakpa Kɛ Yijiemɔ Baa

ITALY adafitswaa wolo, La Gazzetta del Mezzogiorno jie Yehowa Odasefoi ayi yɛ “Matera—City of Unique Cave Dwellings” (Matera—Tɛkpolo Shiai ni Yɔɔ Sɔrɔto Maŋtiase) lɛ he sane ni amɛŋma lɛ hewɔ. Sane nɛɛ je kpo yɛ July 8, 1997 Awake! wolo tɛtrɛɛ ní aja yɛ hei pii yɛ wiemɔi babaoo amli lɛ mli. Amrɔ nɛɛ lɛ, aatsɔɔ Awake! lɛ shishi kɛmiiya wiemɔi 81 mli, ni ajaa nɔ ni fa fe akpekpei 19 yɛ jeŋ fɛɛ. Adafitswaa wolo lɛ kɛɛ akɛ: “Kɛ eba akɛ aawie [Matera] maŋtiase lɛ he koni aha eyinɔsane kɛ enitɛŋmɔ ni ji gboshinii aya hiɛ lɛ,” belɛ Awake! lɛ eto hulutsoo be mli okadi ni fe fɛɛ.

Adafitswaa wolo lɛ jie Odasefoi lɛ ayi yɛ “Nyɔŋmɔ Wiemɔ lɛ Mli Hemɔkɛyeli” Kpokpaa Wulu nɔ Kpee ni afee yɛ Matera yɛ 1997 lɛ hewɔ. Sane ni aŋma lɛ tsɔɔ akɛ, Odasefoi lɛ bɔ mɔdɛŋ ni “amɛnine shɛ gbɔmɛi 4,000 nɔ kɛba [maŋtiase] lɛ XXI Settembre Stadium lɛ mli yɛ hulutsoo be lɛ teŋgbɛ mli, yɛ hulu ni naa wa lɛ shishi; amɛtsu jɛmɛ falefalefeemɔ he nii, amɛpɛnte jɛmɛ ekoŋŋ, ni amɛha nɛkɛ kpɔiaŋgbɔlemɔhe nɛɛ fee fɛo (niiasɛɛyaahei lɛ titri) ni amɛbiii nyɔmɔwoo ko kwraa, shi amɛ diɛŋtsɛ amɛkɛ amɛshika hé nibii ni he hiaa lɛ.”

Yehowa Odasefoi bɔɔ mɔdɛŋ koni amɛfee akutsoŋbii kpakpai. (Mateo 22:37-39) Amɛnyiɛɔ Ŋmalɛ naa ŋaawoo nɛɛ hu sɛɛ akɛ: “Nyɛbaa nyɛjeŋ jogbaŋŋ yɛ jeŋmajiaŋbii lɛ ateŋ, koni . . . nyɛ nitsumɔi kpakpai lɛ ni amɛnaa lɛ amɛkɛwo Nyɔŋmɔ hiɛ nyam, yɛ saramɔ gbi lɛ nɔ.”—1 Petro 2:12.