‘Emli Wa ni Ekɔneɔ Mɔ Yiŋ’

“KƐJƐ wɔ́ kɛyaa lɛ, mikɛbaatsu nii yɛ shiɛmɔ nitsumɔ lɛ mli, ejaakɛ sane naataamɔi ni yɔɔ mli lɛ amli wa ni amɛkɔneɔ mɔ yiŋ hu,” taakɛ Yehowa Odasefonyo ko ni jɛ France lɛ ŋma lɛ. Odasefonyo ko ni jɛ United States ŋma akɛ: “Mikane amrɔ nɔŋŋ, ni miisumɔ ni mikɛbɔi nitsumɔ yɛ shiɛmɔ nitsumɔ lɛ mli, ejaakɛ wɔkɛ mɛi pii kpeɔ ní amɛfee shikpilikpii, ní amɛbɛ hekɛnɔfɔɔ ko kwraa yɛ Biblia lɛ mli.” Mɛni he amɛwieɔ nɛɛ? No ji wolo bibioo ni hiɛ baafai 32, ni gbɛi ji Wolo Kɛha Gbɔmɛi Fɛɛ, ní Buu Mɔɔ Asafo lɛ jie lɛ kpo yɛ “Nyɔŋmɔ Wiemɔ Mli Hemɔkɛyeli” Kpokpaa Wulu nɔ Kpeei ni afee yɛ 1997/98 mli lɛ ashishi lɛ.

Afee wolo nɛɛ yɛ toibolɔi pɔtɛɛ komɛi ahewɔ—mɛi ni ekolɛ amɛná skul nikasemɔ kɛtee hiɛ saŋŋ, shi nɔ ko bibioo pɛ amɛle yɛ Biblia lɛ he lɛ. Nɛkɛ aŋkroaŋkroi nɛɛ ateŋ mɛi pii hiɛ susumɔi pɔtɛɛ komɛi yɛ Biblia lɛ he, tsɛbelɛ ekolɛ amɛ diɛŋtsɛ amɛkaneko pɛŋ. Yiŋtoo ni akɛfee wolo bibioo nɛɛ ji ní ekɔne nikanelɔ lɛ yiŋ akɛ, kɛ hoo kwraa lɛ, esa akɛ apɛi Biblia lɛ mli akwɛ. Wolo bibioo lɛ ebɔɔɔ mɔdɛŋ akɛ eeekɔne nikanelɔ lɛ yiŋ ni ekpɛlɛ susumɔ ni ahiɛ akɛ Biblia lɛ jɛ Nyɔŋmɔ mumɔ mli lɛ nɔ. Shi moŋ, ehaa anɔkwa saji lɛ diɛŋtsɛ wieɔ haa amɛhe. Emli wiemɔi lɛ waaa, shi moŋ eyɛ faŋŋ ni eyɛ tɛ̃ɛ.

Taakɛ wiemɔi ni atsɛ yisɛɛ yɛ yiteŋgbɛ lɛ tsɔɔ lɛ, mɛi ni tee kpeei lɛ miishwe waa ni amɛkɛ wolo bibioo nɛɛ atsu nii yɛ amɛ shiɛmɔ nitsumɔ lɛ mli. Ákɛ nɔkwɛmɔnɔ lɛ, yɛ France nɛkɛ lɛ, ato odaseyeli tafãa krɛdɛɛ ko he gbɛjianɔ kɛha August 23 kɛ 24, be mli ni gbɔi akpei abɔ ni ji obalahii kɛ obalayei bibii baajɛ je lɛŋ fɛɛ amɛbabua amɛhe naa yɛ Paris kɛha Jeŋ Obalahii kɛ Obalayei Bibii Agbi lɛ. Odasefoi aaashɛ 2,500 (ni amɛteŋ mɛi pii eye kɛjɛ afii 16 kɛyashi afii 30) kɛ wolo bibioo lɛ ekomekomei 18,000 hã yɛ Blɔfo, French, Germany, Italy, Poland, kɛ Spain wiemɔi amli.

Bɔ fɛɛ bɔ ni fee lɛ, nyɛhaa wɔkɛ wolo bibioo nɛɛ, ni ji Wolo Kɛha Gbɔmɛi Fɛɛ lɛ, atsua nii yɛ wɔ sɔɔmɔ nitsumɔ lɛ mli. Eba akɛ wolo nɛɛ he aaaba sɛɛnamɔ, ní ekɔne mɛi ni hiɛ jwɛŋmɔ ni ja lɛ ayiŋ akɛ esa akɛ amɛpɛi Biblia lɛ mli amɛha amɛ diɛŋtsɛ amɛhe.