“Wao Kome Biblia” Lɛ

YƐ BE mli ni etsɔ obubuafo yɛ hela ni mɔ lɛ lɛ sɛɛ lɛ, Joseph Schereschewsky baanyɛ aŋma nii kɛtsɔ taipraita tswaa nɔ, ni ekɛ ewao kome tswaa. Ni kɛlɛ, eshɛ oti ni ma ehiɛ—akɛ ebaatsɔɔ Biblia lɛ shishi kɛya China wiemɔ, ni ji wiemɔi ni wa waa kɛha maŋsɛɛnyo akɛ eeenu jogbaŋŋ lɛ ekome mli lɛ he.

Ákɛ Yudafonyo lɛ, Schereschewsky pɛi nibii amli ni ekpɛlɛ Kristojamɔ nɔ beni ebatsɔ onukpa lɛ. Yɛ naagbee mli lɛ, ebatsɔ maŋsɛɛ sanekpakpa shiɛlɔ yɛ China. Jɛmɛ ji he ni ekɛ ehe wo shishitsɔɔmɔ nitsumɔi pii amli, ni eje shishi yɛ afi 1866 mli tɔ̃ɔ, ni etsa nɔ kɛyabote afii ohai 20 lɛ shishijee afii lɛ amli. Akɛni eji Yudanyo hewɔ lɛ, Schereschewsky le Hebri wiemɔ lɛ jogbaŋŋ fe enanemɛi woloŋlelɔi lɛ. No hewɔ lɛ, atu Hebri Ŋmalɛi lɛ fɛɛ ashishitsɔɔmɔ lɛ awo edɛŋ. Beni ebɛŋkɛɔ enitsumɔ ni sɛɛ jɛkɛ lɛ naagbee lɛ, etsɔɔ Biblia muu lɛ fɛɛ ni ŋmalɛi asɛɛtsɛmɔi yɔɔ mli lɛ hu shishi kɛtee Chinabii awiemɔ mli.

Akɛ Biblia shishitsɔɔlɔ lɛ, Joseph Schereschewsky ji bibliai sɔrɔtoi ni yɔɔ gbɔmɛi foji lɛ awiemɔ mli lɛ hefalɔ ni yɔɔ ekãa. Shi enitsumɔ lɛ jeee nɔ ni yɔɔ mlɛo. Gbɛfaŋnɔ ni ená yɛ Biblia lɛ shishitsɔɔmɔ kɛtee Chinabii awiemɔ mli lɛ ekaaa, taakɛ The Book of a Thousand Tongues wolo lɛ kɛɔ lɛ, “ejaakɛ anuɔ shishi jogbaŋŋ ni atsu he nii yɛ najiaŋwoi babaoo mli.”

Yɛ beni Schereschewsky niji egboi sɛɛ lɛ, etee nɔ lolo yɛ enitsumɔ lɛ mli. Akɛni enyɛɛɛ ekɛ eniji atsu nii jogbaŋŋ tamɔ bɔ ni efɔɔ feemɔ lɛ hewɔ lɛ, taipraita lɛ tswaa bahia mɔdɛŋbɔɔ kpele diɛŋtsɛ. No hewɔ lɛ etsɛ eshishitsɔɔmɔ lɛ akɛ ewao kome Biblia. Bɔni afee ni egbe naa yɛ egbɛtsii nii lɛ fɛɛ sɛɛ lɛ, Schereschewsky kɛ afii 25 mia ehiɛ. Akɛni enijiaŋ ejeee wui hewɔ lɛ, efata he ni aha anu Nyɔŋmɔ Wiemɔ lɛ shishi yɛ China wiemɔ—ni ji wiemɔ ni mɛi babaoo wieɔ fe ekrokomɛi fɛɛ lɛ mli lɛ mli.

[He ni Sane lɛ Jɛ]

Mfonirii enyɔ lɛ fɛɛ: American Bible Society Archives ji mɛi ni kɛha