Datrɛfoi, Kojolɔi, kɛ Yehowa Odasefoi

MRA mli yɛ March 1995 lɛ, Yehowa Odasefoi to kpeei enyɔ ahe gbɛjianɔ yɛ Brazil. Mɛni ji yiŋtoo lɛ? Koni amɛkɛtao ekomefeemɔ yɛ tsofafeemɔ mli nitsulɔi kɛ mla he nitsulɔi ateŋ kɛ́ helatsɛ ni kã helatsamɔhe lɛ ji Yehowa Odasefoi lɛ ateŋ mɔ kome ni ekpɛlɛɛɛ lá ni agbalaa awoɔ mɔ mli lɛ nɔ lɛ.—Bɔfoi lɛ Asaji 15:29.

Mɔbɔ sane ji akɛ, yɛ shihilɛi komɛi amli lɛ datrɛfoi eku amɛhiɛ amɛfɔ̃ helatsɛmɛi ni ji Odasefoi lɛ asuɔmɔnaa nii anɔ, ni amɛtao saneyelihe famɔi koni amɛkɛnyɛ amɛnɔ ni akɛgbala lá awo amɛ mli. Yɛ shihilɛi ni tamɔ nakai mli lɛ, Odasefoi lɛ kɛ mla naa hegbɛi fɛɛ ni yɔɔ lɛ tsuɔ nii koni amɛkɛbu amɛhe. Kɛlɛ, amɛsumɔɔ ekomefeemɔ fe naataamɔ. No hewɔ lɛ, kpeei lɛ ma nɔ mi akɛ tsofai babaoo yɛ ni akɛtoɔ lá ni je amɛhe ni agbalaa awoɔ mɛi amli najiaŋ, ni ákɛ, Yehowa Odasefoi kɛ miishɛɛ kpɛlɛ enɛɛmɛi anɔ.a

Kpee ko ni Tsofafeemɔ Mli Kpokpaa nɔ Gwabɔɔ yɛ São Paulo lɛ fee lɛ efi Odasefoi lɛ ashidaamɔ lɛ sɛɛ momo. Yɛ January 1995 lɛ, ekpɛ eyiŋ akɛ kɛ akɛ tsofafeemɔ ko ni datrɛfonyo lɛ ejie yi lɛ kpãaa gbee lɛ, helatsɛ lɛ yɛ hegbɛ akɛ ekpoɔ ni ehalaa datrɛfonyo kroko.

Nɔ ni sa yijiemɔ ji akɛ, amrɔ nɛɛ, aaafee Brazil tsofafeemɔ nitsulɔi lɛ ateŋ mɛi ohai abɔ yɛ ni miisumɔ koni amɛkɛ tsofafeemɔ ni lá bɛ mli atsu amɛhelatsɛmɛi ni biɔ enɛ lɛ he nii. Kɛjɛ March 1995 kpeei lɛ asɛɛ kɛbaa nɛɛ, ekomefeemɔ ni yɔɔ datrɛfoi, kojolɔi, kɛ Yehowa Odasefoi ni yɔɔ Brazil lɛ ateŋ lɛ etee hiɛ waa. Yɛ 1997 lɛ, Brazilbii atsofafeemɔ wolo tɛtrɛɛ ni ji Âmbito Hospitalar fee wolo ko ni ma nɔ mi, ni akpɛlɛ hegbɛi ni Yehowa Odasefoi yɔɔ lɛ anɔ koni akɛ bulɛ aha shidaamɔ ni amɛkɔ yɛ lá sane he lɛ. Taakɛ bɔ ni Tsofafeemɔ Mli Kpokpaa nɔ Gwabɔi lɛ ŋma amɛha Rio de Janeiro kɛ São Paulo maŋtiasei lɛ, amrɔ nɛɛ ale yɛ he fɛɛ he akɛ “esaaa akɛ sɔ̃ ni kã datrɛfonyo lɛ nɔ akɛ ebuɔ ehelatsɛ lɛ wala he lɛ tekeɔ sɔ̃ ni kã enɔ akɛ efãa hegbɛ ni helatsɛ lɛ yɔɔ akɛ ehalaa nɔ ni esumɔɔ lɛ.”

[Shishigbɛ niŋmai]