Mɛni Hewɔ Amɛfeɔ Nakai?

DAA afi lɛ, Yehowa Odasefoi akpei abɔ ni yɔɔ je lɛŋ fɛɛ lɛ buaa amɛhe naa yɛ kpeei wuji ashishi. Amɛkɛ amɛhe bɔɔ naanyo ni amɛboɔ Biblia gbɛtsɔɔmɔi ni hi jogbaŋŋ toi yɛ jɛmɛ. Mɛi komɛi bɔɔ mɔdɛŋ waa ni amɛbaa nɛkɛ kpeei wuji nɛɛ ashishi. Ákɛ nɔkwɛmɔnɔ lɛ, nyɛsɛɛ afi lɛ, gbalashihilɛ mli hefatalɔi komɛi ni yɔɔ Malawi, ni amɛye fe afii 60 lɛ, kɛ amɛbinuu kɛ eŋa kɛ abifao, ta baisikel nɔ kɛfã gbɛ kilomitai 80 kɛtee kpee wulu ko shishi. Amɛshi amɛ akrowa lɛ leebi ŋmɛji ekpaa ni amɛyashɛ he ni afeɔ kpee lɛ yɛ lɛ yɛ ŋmɛlɛtswai 15 sɛɛ.

Yɛ Mozambique lɛ, kuu ko kɛ baisikel fã gbɛ gbii etɛ kɛtee kpee wulu ko shishi. Gbi ko gbɛkɛ, beni amɛshĩ buui yɛ agbo naa lɛ, amɛnu ni jatai miihũu yɛ amɛmasɛi nɔŋŋ. Eyɛ mli akɛ amɛfɔ̃ lai amɛwo he ni amɛnuɔ kooloi lɛ ahe yɛ lɛ moŋ, shi jatai lɛ eyaaa aahu kɛyashi jetsɛremɔ tɔ̃ɔ. Odasefonyo kroko hu ni miifã gbɛ kɛmiiba nakai kpee wulu lɛ nɔŋŋ shishi lɛ kɛ jata kpe hiɛ-kɛ-hiɛ yɛ gbɛ lɛ nɔ. Edamɔ shi diŋŋ ni etsiii ehe kɛyashi beni jata lɛ tee. Odasefoi nɛɛ kɛ miishɛɛ gba bɔ ni ‘ajie amɛ kɛjɛ jata lɛ daaŋ’ lɛ amɛtsɔɔ, yɛ kpee lɛ shishi.—2 Timoteo 4:17.

Yehowa Odasefoi babaoo bɔɔ mɔdɛŋ waa akɛ amɛaaya kpeei wuji loo daa otsi asafoŋ kpeei po kɛha jamɔ. Mɛni hewɔ? Saji ni nyiɛ sɛɛ lɛ baaye abua bo ni onu nɔ hewɔ ni henaabuamɔ kutuu he hiaa waa nakai lɛ shishi.