Ani Nyɔŋmɔ Baakpata Je lɛ Hiɛ?

TAAKƐ Paapa John Paul II tsɔɔ lɛ, adesai baanyɛ akwɛ wɔsɛɛ be kɛ hekɛnɔfɔɔ. Etsɔɔ akɛ, “gbɔmɛi etee nɔ amɛfee eshai, ekolɛ edara fe nɔ ni atsɔɔ ni afee dani nu afua lɛ ba lɛ,” yɛ yinɔsane be fɛɛ mli. Fɛɛ sɛɛ po lɛ, paapa lɛ tsɔɔ mli akɛ, “wɔyɔseɔ kɛjɛɔ wiemɔi ni yɔɔ kpaŋmɔ ni Nyɔŋmɔ kɛ Noa fee lɛ mli akɛ, amrɔ nɛɛ esha ko bɛ ni baaha Nyɔŋmɔ akpata jeŋ ni lɛ diɛŋtsɛ ebɔ lɛ hiɛ.”

Ani eji anɔkwale akɛ Nyɔŋmɔ kpataŋ je lɛ hiɛ gbi ko gbi ko? Biblia lɛ kɛɔ akɛ, yɛ Nu Afua lɛ sɛɛ lɛ, Nyɔŋmɔ kɛɛ Noa akɛ: “Nu afua lɛ ebapleneeŋ heloo fɛɛ dɔŋŋ, ni asaŋ nu afua ko ebakpataŋ shikpɔŋ lɛ hiɛ gbi ko gbi ko.” (1 Mose 9:11) Paapa lɛ kɛɛ akɛ, kɛtsɔ nɛkɛ wiemɔi nɛɛ anɔ lɛ, Nyɔŋmɔ “kɛ sɔ̃ efɔ̃ enɔ akɛ lɛ diɛŋtsɛ ebaabaa [shikpɔŋ lɛ] yi kɛjɛ hiɛkpatamɔ mli.”

Biblia lɛ feɔ lɛ faŋŋ akɛ Bɔlɔ lɛ eŋmɛŋ gbɛ koni akpata wɔshibɔlemɔ ŋulami lɛ hiɛ. Biblia lɛ kɛɔ akɛ: “Shikpɔŋ lɛ ema shi kɛmiiya naanɔ.” (Jajelɔ 1:4) Shi babaoo yɛ ni abaakase kɛjɛ Nu Afua lɛ mli—nibii ni paapa lɛ ewieee he.

Yesu kɛɛ akɛ shihilɛi ni baahi shikpɔŋ lɛ nɔ yɛ ewɔsɛɛ be ba ni eba lɛ mli lɛ baatamɔ “Noa gbii lɛ,” be mli ni gbɔmɛi lɛ ‘ahiɛ bɛ amɛhe nɔ kɛyashi nu afua lɛ baloo amɛ fɛɛ kɛtee lɛ.’ (Mateo 24:37-39) Nakai nɔŋŋ bɔfo Petro ŋma akɛ, taakɛ bɔ ni “nu ŋɔ no be lɛŋ je lɛ ni ehiɛ kpata lɛ,” nakai nɔŋŋ hu “kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ gbi lɛ” woɔ ŋmɛnɛŋmɛnɛ je lɛ he gbeyei.—2 Petro 3:5-7.

Ani Yesu kɛ Petro hiɛ kpa Nyɔŋmɔ kpaŋmɔ ni ekɛ Noa fee lɛ nɔ? Dabida! Taakɛ bɔ ni ekɛɛ yɛ kpaŋmɔ ni ekɛ Noa fee lɛ mli lɛ, Nyɔŋmɔ kɛ nu afua tsuŋ nii koni ekɛ nibii agbɛjianɔtoo fɔŋ nɛɛ aba naagbee. Yɛ no najiaŋ lɛ, ekɛ “maŋtsɛmɛi a-Maŋtsɛ kɛ nuntsɔmɛi a-Nuntsɔ,” ni ji Yesu Kristo hewalɛ lɛ baatsu nii. (Kpojiemɔ [Apocalypse] 19:11-21) No hewɔ lɛ, taakɛ Biblia lɛ tsɔɔ lɛ, akpataŋ shikpɔŋ lɛ hiɛ, shi adesai fɔji ‘aje lɛ’ baaba naagbee kɛ̃. (Abɛi 2:21, 22; Kpojiemɔ 11:18) No sɛɛ lɛ, “jalɔi lɛ shikpɔŋ lɛ aaatsɔ amɛnɔ ni amɛaahi nɔ daa.”—Lala 37:29.