Amɛjieɔ Amɛ Bɔlɔ lɛ Yi yɛ Dioofeemɔ Mli

HULUSHINYƆƆ sɔrɔtoi yɛ fɛo waa diɛŋtsɛ yɛ adebɔɔ su naa. Shi ni aaakwɛ hulu lɛ ni miinyɔ shi yɛ nɛkɛ gɔŋ ni yɔɔ Apuan Alps yɛ Tuscany, Italy lɛ sɛɛ lɛ ji nɔ ni nɔ bɛ lɛɛlɛŋ.

Kɛ akwɛ kɛjɛ shɔŋŋ lɛ, hulu lɛ feɔ tamɔ nɔ ni egbee gɔŋ lɛ mli moŋ fe ni eenyɔ shi yɛ esɛɛ. Mɛni hewɔ? Ejaakɛ yɛ adebɔɔ naa lɛ, gɔŋ lɛ yiteŋ mli edɔ kokoroo, tamɔ nɔ ni aje gbɛ akpɛ gɔŋ lɛ mli. Lɛɛlɛŋ, nɛkɛ ninaa ni yɔɔ faŋŋ nɛɛ ha ená egbɛi ni ji, Monte Forato—Gɔŋ ni Atsu Mli Nɔ Ko. Bɔ ni shikpɔŋ lɛ bɔleɔ hulu lɛ hewɔ lɛ, gbɔmɛi ni kwɛɔ hulu lɛ nyɛɔ amɛnaa hulu ni feɔ tamɔ nɔ ni eegbee Monte Forato lɛ mli kɛtsɔɔ kokoroo lɛ mli shii enyɔ pɛ yɛ afi fɛɛ afi mli.

Taakɛ bɔɔnii krokomɛi anifeemɔi ji lɛ, nakai bɔɔnii ni yɔɔ ŋwɛi ni wala bɛ amɛmli lɛ jieɔ amɛ Bɔlɔ lɛ yi. Yɛ mɛɛ gbɛ nɔ? Tamɔ bɔ nɔŋŋ ni nɔ ko ni atɛŋ fɛfɛo ko kɛ yijiemɔ haa nitɛŋlɔ ni fee lɛ. Nakai nɔŋŋ, bɔɔnii ni yɔɔ ŋwɛi lɛ wieɔ Yehowa hewalɛ, nilee, kɛ egbojee lɛ he. Taakɛ lalatsɛ lɛ wie lɛ, “ŋwɛi gbaa Mawu anunyam lɛ, ni atatu tsɔɔ eninenaa nitsumɔ lɛ.” (Lala 19:2; 69:35 ) Akɛni hulu kɛ nibii krokomɛi ni wala bɛ amɛmli akui lɛ jieɔ amɛ Bɔlɔ lɛ yi hewɔ lɛ, belɛ kwɛ bɔ ni esa akɛ wɔfeɔ fe nakai kwraa!—Lala 148:1, 3, 12, 13.