Mpoatswaa Hetoo Ko

NYƐSƐƐ nɛɛ, Catholic Herald, ni ji Britania Roma Katolik adafitswaa wolo lɛ kala wolo ni nyiɛ sɛɛ nɛɛ kɛjɛ nikanelɔ ko ni yɔɔ Wales lɛ dɛŋ akɛ: “Gbi ko gbɛkɛ lɛ, Yehowa Odasefoi enyɔ ba mishinaa lɛ shi. Minyɛ mikɛɛ akɛ Katolik Sɔlemɔ lɛ ji mɔ ni kɛ nɔmimaa ha yɛ ja ni Kpaŋmɔ Hee ni amɛtsɛ sane yisɛɛ kɛjɛ mli lɛ ja ha lɛ he. Nɔ ni fee mi naakpɛɛ ji akɛ, amɛteŋ mɔ kome kpɛlɛ nɔ. Ekɛɛ akɛ, ‘hɛɛ, nyɛji mɛi ni ma nɔ mi akɛ eja, shi nyɛnyiɛɛɛ sɛɛ. Yesu kɛɛ akɛ, “Nyɛsumɔa nyɛhe tamɔ bɔ ni misumɔɔ nyɛ lɛ,” shi nyɛgbeɔ nyɛhe. Yɛ ta ni tsɔ hiɛ lɛ mli lɛ, Katolikbii gbe Katolikbii, shi Yehowa Odasefonyo ko egbeee [naanyo] Odasefonyo ko.’ Mɛni po manyɛ mafee akɛ ja mikpɛlɛ nɔ? Te wɔɔfee tɛŋŋ wɔsɔle koni wɔbi ni wɔkɛ ‘wɔnyɛmimɛi ni fataaa wɔhe’ lɛ afee ekome, yɛ be mli ni ekomefeemɔ diɛŋtsɛ bɛ wɔteŋ lɛ? Ani esaaa akɛ klɛŋklɛŋ lɛ wɔjajeɔ nɛkɛ hiɛgbejianii nɛɛ?”—Yohane 15:12.

Jeŋ tai enyɔ ni ba yɛ afii ohai 20 nɛɛ mli lɛ fɛɛ je shishi yɛ Kristendom, ni ekpata aaafee gbɔmɛi akpekpei 50 kɛmiiya akpekpei 60 awala hiɛ. Tsɛbelɛ, abaanyɛ akɛɛ yɛ anɔkwale mli akɛ, Yehowa Odasefoi kɛ amɛhe wooo nakai tai lɛ eko mli, ni amɛkɛ amɛhe wooo béi ni yaa nɔ amrɔ nɛɛ eko kwraa mli hu. Mɛɛ gbɛ nɔ enɛ aaanyɛ aba lɛ nakai? Ehe baaba sɛɛnamɔ aha bo, kɛji akɛ bo diɛŋtsɛ oootao ni ole babaoo yɛ Kristofoi asuɔmɔ kɛ ekomefeemɔ kpãai ni mli wa ni Yehowa Odasefoi fe akpekpei enumɔ ni yɔɔ jeŋ fɛɛ lɛ yɔɔ lɛ he.—Okɛto Yesaia 2:4 he.

[He ni Mfoniri ni yɔɔ baafa 32 lɛ Jɛ]

U.S. National Archives mfoniri